ଇସ୍ଲାମାବାଦ,୧୪।୪: ପାକିସ୍ତାନରେ କରୋନା ତା’ର କାୟା ବିସ୍ତାର କରି ଚାଲିଥିବା ବେଳେ ଏବେ ସେଠାରେ ସଂକ୍ରମିତଙ୍କ ସଂଖ୍ୟା ୫ ହଜାର ଅତିକ୍ରମ କରି ସାରିଛି। ଏହାର ପଞ୍ଜାବ ଅଞ୍ଚଳରେ ସର୍ବାଧିକ କରୋନା ସଂକ୍ରମିତଙ୍କୁ ଚିହ୍ନଟ କରାଯାଇଛି। ଗୁରୁତ୍ୱପୂର୍ଣ୍ଣ କଥା ହେଲା ଏବେ ପାକିସ୍ତାନର ଆଉ ୨୦ ଡାକ୍ତର କରୋନାରେ ସଂକ୍ରମିତ ହୋଇଥିବା ଖବର ସମସ୍ତଙ୍କୁ ଚିନ୍ତାରେ ପକାଇ ଦେଇଛି। ପୂର୍ବରୁ ପ୍ରାୟ ୫୦ ଜଣ ଡାକ୍ତର କରୋନାରେ ସଂକ୍ରମିତ ହୋଇଥିବା ଖବର ଆସିଥିଲା। ଇତି ମଧ୍ୟରେ ପାକିସ୍ତାନରେ ପାଖାପାଖି ୧୦୦ଜଣ ଡାକ୍ତର କରୋନା ଭାଇରସ ଦ୍ୱାରା ସଂକ୍ରମିତ ହୋଇଥିବା କୁହାଯାଉଛି। ତେଣୁ ଏତେ ପରିମାଣର ଡାକ୍ତର କରୋନାରେ ସଂକ୍ରମିତ ହେବା ଫଳରେ ପାକିସ୍ତାନରେ ସ୍ବାସ୍ଥ୍ୟ ସେବା ଭୁଷୁଡି ପଡିବା ଆଶଙ୍କା କରାଯାଉଛି। ଏହାସହ ରବିବାର ଓ ସୋମବାର ପଞ୍ଜାବ ଅଞ୍ଚଳରେ ଥିବା ନିସ୍ତାର ହସ୍ପିଟାଲରେ ୬ ଜଣ ନର୍ସ କରୋନାରେ ସଂକ୍ରମିତ ହେବା ସୂଚନା ମିଳିବା ଫଳରେ ଏବେ ପାକିସ୍ତାନରେ ଡାକ୍ତରଙ୍କୁ ମିଶାଇ ପାଖାପାଖି ୧୬୦ ଜଣ ସ୍ବାସ୍ଥ୍ୟକର୍ମୀ କରୋନାରେ ପୀଡିତ ହୋଇଥିବା ଜଣାପଡିଛି। ଏପରି ସ୍ଥଳେ ସାଧାରଣ ସଂକ୍ରମିତଙ୍କ ଚିକିତ୍ସାକୁ ନେଇ ଚିନ୍ତା ପ୍ରକଟ ହୋଇଛି। ଏହାକୁ ନେଇ ଏବେ ଡାକ୍ତରମାନେ ପ୍ରତିବାଦ କରିବେ ବୋଲି ଶୁଣିବାକୁ ମିଳିଛି।