କରାଚୀ, ୧ା୬(ପି.ଟି.):୧୯୮୩ରେ ହଂକଂ ଟୁର୍ରୁ ଫେରିବା ବେଳେ ପାକିସ୍ତାନ ହକି ଦଳର କେତେଜଣ ସଦସ୍ୟ ମୂଲ୍ୟବାନ ସାମଗ୍ରୀ ଚୋରାରେ ଦେଶକୁ ଆଣିଥିଲେ। ବହୁବର୍ଷ ପରେ ଏହି ଅଭିଯୋଗ ଆଣିଛନ୍ତି ତତ୍କାଳୀନ ହକି ଅଧିନାୟକ ହନିଫ୍ ଖାଁ। କେତେଜଣ ଟିମ୍ ଅଫିସିଆଲ ମଧ୍ୟ ଏହି କାର୍ଯ୍ୟରେ ଲିପ୍ତ ଥିଲେ। ୧୯୮୩ରେ ହଂକଂରେ ଏକ ଇଣ୍ଟରନ୍ୟାଶନାଲ ଇଭେଣ୍ଟରେ ଭାଗନେଇ ଆମେ ଫେରୁଥିଲୁ। ସ୍ମଗ୍ଲିଂ ସାମଗ୍ରୀ ମଧ୍ୟରେ କାର୍ ସ୍ପେୟାର ପାଟର୍ସ, ଭିସିଆର, ଗ୍ଲାସଫ୍ରେମ ରହିଥିଲା। ସେ ସମୟରେ ଏସବୁ ଦେଶକୁ ସ୍ମଗ୍ଲିଂ କରି ଆଣିବାରେ କଟକଣା ରହିଥିଲା। ଟିମ୍ର ଲଗେଜ ଭିତରେ ଏସବୁ ଆସିଥିଲା ବୋଲି ହନିଫ୍ ଦାବି କରିଛନ୍ତି। ସେ ସମୟରେ ଏହାର ମୂଲ୍ୟ ୧୫ ନିୟୁତ ଟଙ୍କା ହେବ। ବହିଃଶୁଳ୍କ କର୍ତ୍ତୃପକ୍ଷଙ୍କ ଦ୍ୱାରା ହୋଇଥିବା ଏକ ତଦନ୍ତ ଦ୍ୱାରା ଜଣାପଡ଼ିଥିଲା ଯେ, ଟିମ୍ର କେତେଜଣ ଖେଳାଳି ଓ ଅଫିସିଆଲ ସ୍ମଗ୍ଲିଂ ର଼୍ୟାକେଟ୍ରେ ସମ୍ପୃକ୍ତ। ମାତ୍ର କୌଣସି କାରଣରୁ ଏହି ଖବରକୁ ସେ ସମୟରେ ଚପାଇ ଦିଆଯାଇଥିଲା। ସୂଚନାଯୋଗ୍ୟ, ହନିଫ୍ କିଛିବର୍ଷ ହେଲା ଜାତୀୟ ଦଳର ମୁଖ୍ୟ କୋଚ୍ ଓ ମ୍ୟାନେଜର ଭାବେ କାର୍ଯ୍ୟ କରୁଛନ୍ତି।