ଇସଲାମାବାଦ୍,୧୨।୭(ଆଇଏଏନ୍ଏସ୍):ପାକିସ୍ତାନର ପଞ୍ଜାବ ପ୍ରଦେଶରେ ଏକ ଯାତ୍ରୀବାହୀ ଟ୍ରେନ ଏକ ମାଲବାହୀ ଟ୍ରେନ ସହ ଦୁର୍ଘଟଣାର ସମ୍ମୁଖୀନ ହେବାରୁ ୧୪ ଜଣ ବ୍ୟକ୍ତିଙ୍କ ପ୍ରାଣହାନି ଘଟିଥିବାବେଳେ ୭୯ ଜଣ ଆହତ ହୋଇଥିବା ଜଣାପଡ଼ିଛି। ସାଦିକାବାଦ୍ସ୍ଥିତ ଓ୍ବାଲ୍ହର ରେଲଓ୍ବେ ଷ୍ଟେଶନରେ ଗୁରୁବାର ଭୋର୍ ୪ଟାରେ ଏହି ଦୁର୍ଘଟଣା ହୋଇଥିଲା। କ୍ୱେଟ୍ଟାକୁ ଯାଉଥିବା ଆକବର ଏକ୍ସପ୍ରେସରୁ ସମସ୍ତ ଯାତ୍ରୀଙ୍କୁ ବାହାର କରାଯିବା ସହ ରେଳଧାରଣା କାମ ଜାରି ରହିଥିବା ଡେପୁଟି କମିଶନର ଜମିଲ ଅହମଦ ଜମିଲ ପ୍ରକାଶ କରିଛନ୍ତି। ଏହି ଦୁର୍ଘଟଣାକୁ ନେଇ ପାକିସ୍ତାନ ପ୍ରଧାନମନ୍ତ୍ରୀ ଦୁଃଖପ୍ରକାଶ କରିବା ସହ ମୃତକଙ୍କ ପରିବାର ପ୍ରତି ସମବେଦନା ଜଣାଇଛନ୍ତି। ମୃତକଙ୍କ ନିକଟ ସମ୍ପର୍କୀୟଙ୍କୁ ୧.୫ ନିୟୁତ ପାକିସ୍ତାନୀ ଟଙ୍କା ପ୍ରଦାନ କରିବା ଲାଗି ରେଳମନ୍ତ୍ରୀ ଶେଖ୍ ରସିଦ ଅହମଦ ଘୋଷଣା କରିଛନ୍ତି।