ପୁରୁଷୋତ୍ତମ ପୁର, ୨୨।୧(ଡି.ଏନ୍.ଏ.): ଗଞ୍ଜାମ ଜିଲା ପୁରୁଷୋତ୍ତମପୁର ବ୍ଲକ ଅନ୍ତର୍ଗତ କେଏନ୍ ପୁର ଗ୍ରାମରେ ଏକ ପାଗଳ ହନୁମାଙ୍କଡ଼ ଆକ୍ରମଣରେ ବୁଧବାର ଜଣେ ବୃଦ୍ଧାଙ୍କ ମୃତ୍ୟୁ ଘଟିଛି। ମୃତକ ହେଲେ ଜମ୍ଭୁ ଗୌଡ଼(୬୨)। ଘଟଣା ପରେ ଲୋକେ ଆତଙ୍କିତ ହୋଇ ଘରୁ ବାହାରକୁ ବାହାରି ପାରୁ ନ ଥିବା ଜଣାପଡ଼ିଛି।
ସୂଚନାନୁଯାୟୀ, ଜମ୍ଭୁ ନିଜ ଘର ବାରିପଟେ ବାସନ ମାଜୁଥିବା ବେଳେ ହଠାତ ହନୁମାଙ୍କଡ଼ଟି ଆସି ଅତର୍କିତ ଭାବେ କାମୁଡି କ୍ଷତ ବିକ୍ଷତ କରିଥିଲା। ତାଙ୍କ ଚିତ୍କାର ଶୁଣି ପରିବାରଲୋକେ ପହଞ୍ଚି ମାଙ୍କଡ଼ କବଳରୁ ଜମ୍ଭୁଙ୍କୁ ରକ୍ତ ଜୁଡୁବୁଡୁ ଅବସ୍ଥାରେ ଉଦ୍ଧାର କରି ଚିକିତ୍ସା ନିମନ୍ତେ ପୁରୁଷୋତ୍ତମପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଆଣିଥିଲେ। ମାତ୍ର ପ୍ରବଳ ରକ୍ତସ୍ରାବ କାରଣରୁ ଚିକିତ୍ସାଧିନ ଅବସ୍ଥାରେ ତାଙ୍କର ମତ୍ୟୁ ଘଟିଥିଲା । ଖବର ପାଇ ପୁରୁଷୋତ୍ତମପୁର ଥାନା ଏସ୍ଆଇ ଚମ୍ପାବତି ମାରାଣ୍ଡି ସ୍ବାସ୍ଥ୍ୟକେନ୍ଦ୍ରରେ ପହଞ୍ଚି ମୃତଦେହକୁ ଜବତ କରି ଥାନାରେ ଅପମୃତ୍ୟୁ ମାମଲା(ନଂ.୧/୨୦) ପ୍ରକାରେ ବ୍ୟବଚ୍ଛେଦ କରାଇ ପରିବାରକୁ ହସ୍ତାନ୍ତର କରିଛନ୍ତି । ଏହାକୁ ନେଇ ଗ୍ରାମବାସୀଙ୍କ ମଧ୍ୟରେ ତିବ୍ର ପ୍ରତିକ୍ରିୟା ଦେଖା ଦେଇଛି । ମୃତ ପରିବାରଙ୍କୁ ତୁରନ୍ତ ସରକାରୀ ସହାୟତା ଯୋଗାଇ ଦେବା ସହ ଉକ୍ତ ମାଙ୍କଡ଼କୁ କାବୁ କରିବାଲାଗି ଖଲ୍ଲିକୋଟ ବିଭାଗୀୟ ଅଧିକାରୀଙ୍କଠାରେ ଗ୍ରାମବାସୀ ଦାବି କରିଛନ୍ତି ।