ଭୋଗରାଇ,୧୨।୨(ଡି.ଏନ.ଏ.)-ବାଲେଶ୍ୱର ଜିଲା ଭୋଗରାଇ ବ୍ଲକ ଅଧୀନ କୁମ୍ଭାରମୂଳୀ ପ୍ରାଥମିକ ବିଦ୍ୟାଳୟରେ ପାଚିକା ଚୟନ ପ୍ରତିବାଦରେ ମଙ୍ଗଳବାର ଗ୍ରାମବାସୀ ଓ ଛାତ୍ରୀଛାତ୍ରମାନେ ପୂର୍ବାହ୍ନ ସ୍କୁଲ ଖୋଲିବା ପୂର୍ବରୁ ମୁଖ୍ୟ ଫାଟକରେ ତାଲା ପକାଇ ପ୍ରତୀକ ଧାରଣା ଦେଇଥିଲେ। ଭୋଗରାଇ ଗୋଷ୍ଠୀ ସହକାରୀ ଶିକ୍ଷାଧିକାରୀ ଧରଣୀଧର ରାଉତ ଓ ସିଆର୍ସିସି ଗୌତମ ଦତ୍ତ ସେଠାକୁ ଯାଇ ଆନ୍ଦୋଳନରତ ଗ୍ରାମବାସୀଙ୍କ ସହିତ ଆଲୋଚନା କରି ପ୍ରତିଶ୍ରୁତି ଦେବା ପରେ ଆନ୍ଦୋଳନକାରୀମାନେ ଧାରଣା ସ୍ଥଗିତ ରଖିଥିଲେ।
ଏହି ବିଦ୍ୟାଳୟରେ ୧ରୁ ୫ମ ଶ୍ରେଣୀ ପର୍ଯ୍ୟନ୍ତ ୯୨ଜଣ ଛାତ୍ରୀଛାତ୍ର ଅଧ୍ୟୟନ କରୁଥିବାବେଳେ ଦୁଇଜଣ ପାଚିକା କାର୍ଯ୍ୟ କରୁଥିଲେ। ଜଣେ ପାଚିକାଙ୍କର କାର୍ଯ୍ୟକାଳ ଶେଷ ହେବା ପରେ ପ୍ରଧାନଶିକ୍ଷକଙ୍କ ସହ ସ୍କୁଲର ମ୍ୟାନେଜିଂ କମିଟି ଏକ ନୋଟିସ୍ ଜରିଆରେ ପାଚିକା ନିଯୁକ୍ତି ନିମନ୍ତେ ଗତ ୧୩।୧।୨୦୨୦ରେ ଦରଖାସ୍ତ ଆହ୍ବାନ କରିଥିଲେ। ପାଚିକା କର୍ମନିଯୁକ୍ତିରେ ୭ଜଣ ପ୍ରାର୍ଥୀ ଆବେଦନ କରିଥିବାିବେଳେ ସ୍କୁଲ ମ୍ୟାନେଜିଂ କମିଟି ଜଣେ ମହିଳାଙ୍କୁ ସର୍ବସମ୍ମତିକ୍ରମେ ମନୋନୀତ କରିଥିଲେ। ଏହି ପ୍ରାର୍ଥୀ ଚୟନକୁ ଗ୍ରାମବାସୀ ବିରୋଧ କରିଛନ୍ତି। ପାଚିକା ଚୟନ ନୋଟିସ୍ ବୋର୍ଡ଼ରେ କେଉଁ ବର୍ଗର ପ୍ରାର୍ଥୀ ଆବେଦନ କରିପାରିବେ ସେ ସମ୍ପର୍କରେ ଲେଖା ନ ଥିବାରୁ ଗ୍ରାମବାସୀ ପଛୁଆବର୍ଗଙ୍କୁ ଅଣଦେଖା କରାଯାଇଛି ବୋଲି ଅଭିଯୋଗ କରି ଗୋଷ୍ଠୀ ଶିକ୍ଷାଧିକାରୀଙ୍କ ଦୃଷ୍ଟି ଆକର୍ଷଣ କରିଛନ୍ତି। ଏହି ନୋଟିସକୁ ଅବିଳମ୍ବେ ରଦ୍ଦ କରାଯାଇ ଗ୍ରାମର ଅଧିକାଂଶ ପଛୁଆବର୍ଗ ଲୋକ ଥିବାବେଳେ ଅଗ୍ରାଧିକାର ଭିତ୍ତିରେ ଯୋଗ୍ୟା ପ୍ରାର୍ଥୀଙ୍କୁ ମନୋନୀତ କରାଯାଉ ବୋଲି ଗ୍ରାମବାସୀ ଦାବି କରିଥିଲେ। ଭୋଗରାଇ ଗୋଷ୍ଠୀ ଶିକ୍ଷାକେନ୍ଦ୍ରର ସହକାରୀ ଶିକ୍ଷାଧିକାରୀ ଓ ଆଞ୍ଚଳିକ ଗୋଷ୍ଠୀ ଶିକ୍ଷାକେନ୍ଦ୍ରର ସଂଯୋଜକ ସ୍ଥାନୀୟ ଲୋକଙ୍କ ଦାବିକୁ ଗ୍ରହଣ କରି ଶିକ୍ଷାଧିକାରୀଙ୍କ ସହିତ ଆଲୋଚନା ଓ ପ୍ରାର୍ଥୀ ମନୋନୟନର ଯାଞ୍ଚ କରି ପରବର୍ତ୍ତୀ କାର୍ଯ୍ୟ କରାଯିବ ବୋଲି ପ୍ରତିଶ୍ରୁତି ଦେଇଥିଲେ।