ପୋଲସରା, ୨୦।୪: ପୋଲସରା ବିଜ୍ଞାପିତ ଅଞ୍ଚଳ ପରିଷଦ କାଶୀନାଥପୁର ଡାବୁରିଆ ନାଳରେ ନିର୍ମିତ ପାଞ୍ଚୋଟି ଚ୍ୟାକ୍ ଡ୍ୟାମ୍ର ମାଟି ବ୍ୟାଙ୍କ, ଗାର୍ଡ ୱାଲ, ପଥର ପ୍ୟାକିଙ୍କି, ଆବଶ୍ୟକ କଂକ୍ରିଟ କେନାଲ ନିର୍ମାଣ କରିବା, କାଶୀନାଥପୁର ଚ୍ୟାକ୍ ଡ୍ୟାମ୍ ଅର୍ଥାତ ପ୍ରାୟ ୧ ମିଟର ଉଚ୍ଚା କରିବା, କାଶୀନାଥପୁର ଡ଼ାବୁରିଆ ନାଳ ଏମଆଇପି ଓ ହରିଜନ ଆଗୁଳ ଏମଆଇପି, କେନ୍ଦୁବଗଡ ଚ୍ୟକ୍ ଡ୍ୟାମ ପୁନଃଉଦ୍ଧାର ପାଇଁ ଅଭିଯୋଗ ଆଣିଲେ ଋଷିକୂଲ୍ୟା ରୟତ ମହାସଭାର ସଭାପତି ସତ୍ୟବାନ ପ୍ରଧାନ। ଅଭିଯୋଗ ପ୍ରକାରେ ଡ଼ାବୁରିଆ ନାଳ ଓ କଇଁଫୁଲିଆ ନାଳ (ଖଜୁରିଆ) ଚିରସ୍ରୋତ ନାଳ ଅଟେ। ଖରାଦିନେ ମଧ୍ୟ ଯଥେଷ୍ଟ ଜଳ ପ୍ରଭାବିତ ହୁଏ। ଡ଼ାବୁରିଆ ନାଳର ଉଭୟ ପାଶର୍ବରେ ଥିବା ବାଲିଘାଇ, ସିଦ୍ଧିପୁର, କାଶୀନାଥପୁର, ପୋଲସରା ଓ ପାଟିଗଡ ଏହି ପାଞ୍ଚ ଗୋଟି ଗ୍ରାମର ବହୁ ଚାଷୀ ଏହି ନାଳ ଉପରେ ନିର୍ଭର କରନ୍ତି। ଉକ୍ତ ନାଳ ପାଣି ଦ୍ୱାରା ରବି ଓ ଖରିଫ ଫସଲ ହୋଇଥାଏ। ସରକାର ଉକ୍ତ ନାଳରେ ପ୍ରାୟ ୧ କୋଟି ଟଙ୍କା ଖର୍ଚ୍ଚ କରି ୫ଟି ଚ୍ୟାକ୍ଡ୍ୟାମ ନିର୍ମାଣ କରାଇଛନ୍ତି। କିନ୍ତୁ ଚାଷୀମାନେ ନିଜ ଜମିରେ ଜଳସେଚନ କରିବା ପାଇଁ ଟୋପାଏ ପାଣି ମିଳିବା ତ ଦୂରର କଥା, ଡ଼ାବୁରିଆ ନାଳର ବନ୍ୟା ଜଳ ଦ୍ୱାରା ନାଳର ଉଭୟ ପାଶର୍ବରେ ଥିବା ଜମିଗୁଡ଼ିକ ଅତଡ଼ା ଖାଇ ଫାଳେଫାଳେ ହୋଇ ନାଳରେ ମିଶିଗଲାଣି। ବହୁବାର ଗଞ୍ଜାମ ଜିଲାପାଳ, ଦକ୍ଷିଣାଞ୍ଚଳ ରାଜସ୍ବ କମିଶନର, କ୍ଷୁଦ୍ର ଜଳସେଚନ ବିଭାଗ, ନିର୍ବାହୀ ଯନ୍ତ୍ରୀ, ଅଧିକ୍ଷଣ ଯନ୍ତ୍ରୀ, ସହକାରୀ ଯନ୍ତ୍ରୀ, କନିଷ୍ଠ ଯନ୍ତ୍ରୀମାନଙ୍କୁ ଲିଖିତ ଅଭିଯୋଗ କରିଥିଲେ ମଧ୍ୟ କେହି କର୍ଣ୍ଣପାତ କରୁନାହାନ୍ତି। ଦୀର୍ଘ ୭ ବର୍ଷ ବିତି ଯାଇଥିଲେ ସୁଦ୍ଧା ଉକ୍ତ କାର୍ଯ୍ୟଗୁଡ଼ିକ ନିର୍ମାଣ ହୋଇପାରିଲା ନାହିଁ। ଶୀଘ୍ର ଡ଼ାବୁରିଆ ନାଳ ଓ ଶାଖା ଖଜୁରିଆ ନାଳ ଉଭୟ ନାଳର ହୁଡ଼ା ମାଟି ବ୍ୟାଙ୍କ୍ ନିର୍ମାଣ କରାଯାଇ ଭାଙ୍ଗିଯାଇଥିବା ନାଳର ହୁଡାକୁ ବନ୍ଧାଇ ଆବଶ୍ୟକ ଆଉଟ୍ ଲେଟ୍ ଗାର୍ଡ ୱାଲ୍ ନିର୍ମାଣ କଲେ ଚାଷୀମାନେ ଉପକୃତ ହୋଇପାରିବେ ବୋଲି କହିଛନ୍ତି। ଅନ୍ୟପଟେ କ୍ଷୁଦ୍ର ଜଳସେଚନ ବିଭାଗ ଗଞ୍ଜାମ (୨) କନିଷ୍ଠ ଯନ୍ତ୍ରୀ ସତୀଶ ଜେନା ଅନୁଧ୍ୟାନ କରି ପ୍ରପୋଜାଲ ୪ ମାସ ହେବ ଦେଇଛୁ। କିନ୍ତୁ ଫଣ୍ଡ କିଛି ଆସି ନାହିଁ। ଆମେ ଚେଷ୍ଟା କରିବୁ ବୋଲି କହିଛନ୍ତି।