ଭୁବନେଶ୍ୱର,୭।୭(ବ୍ୟୁରୋ): ଆସନ୍ତା ଜୁଲାଇ ୨୦ରେ ପାଟକୁରା ବିଧାନସଭା ନିର୍ବାଚନ। ଏହା ପୂର୍ବରୁ ରାଜନୈତିକ ବାକ୍ ବିତଣ୍ଡା ଆରମ୍ଭ ହୋଇସାରିଛି। କଂଗ୍ରେସ ଭାଜପା ଓ ବିଜେଡିକୁ କଟାକ୍ଷ କରୁଥିବା ବେଳେ ଭାଜପା ନେତାମାନେ ବିଜେଡିକୁ ସମାଲୋଚନା କରିବାକୁ ପଛାଉନାହାନ୍ତି। ଏହି କ୍ରମରେ ଭାଜପାର ବରିଷ୍ଠ ନେତା ଦାମୋଦର ରାଉତ ପାଟକୁରାରେ ସ୍ବାଭିମାନର ପ୍ରଶ୍ନ ରହିଥିବା କହିଛନ୍ତି। ଏଥିରେ ଆଞ୍ଚ ଆସିଲେ ସ୍ବାଭିମାନ ଜଳିବ। ଲୋକେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ନୁହେଁ, ଅଫିସରଙ୍କୁ ଭୋଟ ଦେଉଛନ୍ତି। ବିଜୟଙ୍କୁ ବିଧାନସଭାରେ ପୂରାଇ ନ ଦେବାକୁ ନବୀନ ପଣ କରିଛନ୍ତି। ଅଧ ଡଜନ ମନ୍ତ୍ରୀ ଓ ନେତାଙ୍କୁ ପାଟକୁରାରେ ପ୍ରଚାର କରିବା ଲାଗି ପଠାଇଛନ୍ତି। ହେଲେ ପାଟକୁରାବାସୀ ସଚେନତଶୀଳ। ଏଠାରେ ଟେବୁଲ ତଳ କାରବାର ହେବନାହିଁ। ୧୯୮୦ରେ ବିଜୁ ବାବୁ ବିଜୟଙ୍କୁ ପ୍ରାର୍ଥୀ କରାଇଥିଲେ। ସେହି ସମୟରେ ସେ କହିଥିଲେ, ମୁଁ ବଡ଼ ବିଜୁ, ବିଜୟ ସାନ ବିଜୁ। ସାନ ନଦୀର ସୁଅ ଭାରି ଟାଣ। ମାତ୍ର ନବୀନଙ୍କ କ୍ରୁରତା ଯୋଗୁ ସେ ବିଜୟଙ୍କୁ ୨୦ ବର୍ଷ ହେଲା ବିଧାନସଭାରୁ ଦୂରେଇ ରଖିଛନ୍ତି ବୋଲି ଦାମ କହିଛନ୍ତି।
ପ୍ରକାଶଯୋଗ୍ୟ, ଦାମଙ୍କ ପୂର୍ବରୁ କଂଗ୍ରେସ ବିଧାୟକ ତାରା ପ୍ରସାଦ ବାହିନୀପତି ଓ ପାଟକୁରାରୁ ଭାଜପା ପ୍ରାର୍ଥୀ ତଥା ଦଳୀୟ ନେତା ବିଜୟ ମହାପାତ୍ରଙ୍କ ମଧ୍ୟରେ କଥା କଟାକଟି ହୋଇଛି। ତାରା ଉଭୟ ଦଳ ମଧ୍ୟରେ ମ୍ୟାଚ୍ ଫିକ୍ସିଂ ହୋଇଥିବା କହି କଟାକ୍ଷ କରିଥିବା ବେଳେ ପାଟକୁରାରେ ସ୍ବାଭିମାନର ଲଢ଼େଇ ହେଉଛି ବୋଲି ବିଜୟ ମତ ରଖିଛନ୍ତି।