ପାଟଣା, ୨୪।୫(ସ୍ବ.ପ୍ର.): କେନ୍ଦୁଝର ଜିଲା ୨୩ ନମ୍ବର ପାଟଣା ଏସ୍ଟି ସଂରକ୍ଷିତ ନିର୍ବାଚନମଣ୍ଡଳୀ ପାଇଁ ଚମ୍ପୁଆସ୍ଥିତ ଚନ୍ଦ୍ରଶେଖର ମହାବିଦ୍ୟାଳୟରେ ଭୋଟ ଗଣତି ଆରମ୍ଭ ହୋଇଥିବା ବେଳେ ରାତି ୯ଟାରେ ଶେଷ ହୋଇଛି। ଭୋଟ ଗଣତି ପାଇଁ ମୋଟ ୧୦୩ ସରକାରୀ କର୍ମଚାରୀ ନିୟୋଜିତ ହୋଇଥିଲେ। ଚୂଡାନ୍ତ ୨୮ଟି ପର୍ଯ୍ୟାୟ ଭୋଟ ଗଣତି ପରେ ବିଜେଡି ବିଧାୟକ ପ୍ରାର୍ଥୀ ଜଗନ୍ନାଥ ନାଏକ ମୋଟ ୭୦୩୧୦ ଖଣ୍ଡ ଭୋଟ ପାଇଥିବା ବେଳେ ତାଙ୍କ ନିକଟତମ ପ୍ରତିଦ୍ବନ୍ଦ୍ୱୀ ଭଜପାର ବିଧାୟକ ପ୍ରାର୍ଥୀ ଭବାନୀ ଶଙ୍କର ନାୟକ ୬୨୫୧୪ ଭୋଟ ପାଇଁ ଦ୍ୱିତୀୟ ସ୍ଥାନରେ ରହିଛନ୍ତି ।
ସର୍ବଶେଷ ତଥ୍ୟ ଅନୁଯାୟୀ, ଜଗନ୍ନାଥ ତାଙ୍କ ନିକଟତମ ପ୍ରତିଦ୍ବନ୍ଦୀ ଭବାନିଶଙ୍କରଙ୍କ ଠାରୁ ୭୭୯୬ ଖଣ୍ଡ ଅଧିକ ଭୋଟରେ ନିର୍ବାଚିତ ହୋଇଛନ୍ତି। ଜଗନ୍ନାଥ ତାଙ୍କ ଜିତିବାର ଶ୍ରେୟ ପାଟଣା ଅଞ୍ଚଳବାସୀ ଓ ନବୀନ ପଟ୍ଟନାୟକଙ୍କୁ ଦେଇଛନ୍ତି। ପାଟଣା ନିର୍ବାନମଣ୍ଡଳୀର ସର୍ବାଙ୍ଗୀନ ବିକାଶ ପାଇଁ ସେ କାମ କରିବେ ବୋଲି କହିଛନ୍ତି।
ତୃତୀୟ ସ୍ଥାନରେ କଂଗ୍ରେସ ବିଧାୟକ ପ୍ରାର୍ଥୀ ବିନୋଦବିହାରି ନାଏକ ୧୩୦୨୯ ଖଣ୍ଡ ଭୋଟ ପାଇଥିବା ବେଳେ ସ୍ବାଧୀନ ପ୍ରାର୍ଥୀ ଅଖିଳ ଚନ୍ଦ୍ର ନାଏକ ୮୦୪୩ ଖଣ୍ଡ ଭୋଟ ପାଇ ଚତୁର୍ଥ ସ୍ଥାନରେ ରହିଛନ୍ତି। ଅତିରିକ୍ତ ଜିଲାପାଳ ଓ ନିର୍ବାଚନ ଅଧିକାରୀ ଭକ୍ତଚରଣ ପ୍ରଧାନଙ୍କ ସୂଚନା ମୁତାବକ ଦୁଇଟି ଇଭିଏମ୍ରେ ଯାନ୍ତ୍ରିକ ତ୍ରୁଟି ରହିଥିବାରୁ ଉକ୍ତ ବୁଥ୍ରେ ଭୋଟ ଗଣତି ହୋଇପାରି ନାହିଁ। ଆଗକୁ ମଧ୍ୟ ସେଠାରେ ଭୋଟ ଗଣତି ହେବାର ନ ଥିବା ସୂଚନା ମିଳିଛି।