ପାଟଣା,୮ା୬(ସ୍ବ.ପ୍ର.) : କେନ୍ଦୁଝର ଜିଲା ପାଟଣା ବ୍ଲକ ଯମୁନାପଶି ପଞ୍ଚାୟତର ଜଣେ ୩୬ ବର୍ଷୀୟ ବିବାହିତ ଯୁବକଙ୍କ ସୋମବାର କରୋନା ପଜିଟିଭ୍ ଥିବା ରାଜ୍ୟ ସୂଚନା ଓ ଲୋକସମ୍ପର୍କ ବିଭାଗ ପକ୍ଷରୁ ଟୁଇଟ୍ ଯୋଗେ ସୂଚନା ଦିଆଯାଇଛି। ଏଥିସହ ପାଟଣା ବ୍ଲକରେ ପଜିଟିଭ୍ ସଂଖ୍ୟା ୪ରେ ପହଞ୍ଚିଛି। ଏହି ବ୍ୟକ୍ତି ଜଣକ ଉକ୍ତ ପଞ୍ଚାୟତ ବିଶୋଇପାଟ ସରକାରୀ ଉଚ୍ଚ ବିଦ୍ୟାଳୟ, ଯମୁନାପଶିର କ୍ୱାରାଣ୍ଟାଇନ୍ ସେଣ୍ଟରରେ ରହୁଥିଲେ। ସେ ୪ ମାସ ପୂର୍ବରୁ ବାଙ୍ଗାଲୋର ଯାଇ ଶ୍ରମିକ ଭାବେ ଘର ସିଲିଂ କାମ କରୁଥିଲେ। ମେ’ ୨୬ ରେ ସେ ଓଡ଼ିଶା ଆସି ପଞ୍ଚାୟତ କ୍ୱାରାଣ୍ଟାଇନ୍ ସେଣ୍ଟରରେ ରହୁଥିଲେ। ସେ ରହୁଥିବା କକ୍ଷର ଆଉ ୬ ଜଣ ବ୍ୟକ୍ତିଙ୍କର ସ୍ବାବ୍ ଟେଷ୍ଟ ହେବ ବୋଲି ଜଣାପଡ଼ିଛି। ପାଟଣା ତହସିଲଦାର ଶିବପ୍ରସଦ ମୁର୍ମୁ, ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଡା. ଶୁଭେନ୍ଦୁ ସାଗର କୁମାର ନାଏକ, ତୁରୁମୁଙ୍ଗା ଥାନାଧିକାରୀ ବରେନ୍ଦ୍ର ଶିଆଲ ଓ ବିପି ଏମ୍ ଦୀପକ କୁମାର ନାୟକଙ୍କ ଉପସ୍ଥିତିରେ ତାଙ୍କୁ କେନ୍ଦୁଝର ରାଙ୍କିସ୍ଥିତ କୋଭିଡ୍ ହସ୍ପିଟାଲକୁ ଚିକିତ୍ସା ପାଇଁ ପଠାଯାଇଛି।