ଗୁଆହାଟୀ,୨୮ା୫: ଆସାମରେ ବର୍ଷର ପ୍ରଥମ ବନ୍ୟା ଦେଖିବାକୁ ମିଳିଥିବା ବେଳେ ରାଜ୍ୟର ୧୧ ଜିଲା ଜଳମଗ୍ନ ହୋଇପଡ଼ିଛି। ପ୍ରାୟ ୩ ଲକ୍ଷ ଲୋକ ଏହାଦ୍ୱାରା ପ୍ରଭାବିତ ହୋଇଛନ୍ତି। ଗୋଆଲପାରା ଜିଲାରେ ଜଣେ ବ୍ୟକ୍ତି ପ୍ରାଣ ହରାଇଥିବା ବେଳେ ୨୧ ରାଜସ୍ବ ଗ୍ରାମର ୩୨୧ ଗ୍ରାମ ପ୍ରଭାବିତ ହୋଇଛି। ଢେମାଜି, ଲକ୍ଷ୍ମୀପୁର, ନଗାଓଁ, ହୋଜାଇ, ବର୍ପେଟା, ଡାରାଙ୍ଗ, ନଳବାରି, ଗୋଆଲପାରା, ପଶ୍ଚିମ କାର୍ବି ଆଙ୍ଗ୍ଲଙ୍ଗ, ଦିବ୍ରୁଗଡ଼ ଓ ତିନ୍ସୁକିଆ ଜିଲା ବନ୍ୟା ଦ୍ୱାରା କ୍ଷତିଗ୍ରସ୍ତ ହୋଇଛି। ମୋଟ ୨,୬୭୮ ହେକ୍ଟର ଚାଷଜମି ଜଳଚର ହୋଇପଡ଼ିଥିବା ବେଳେ ୫୭ ରିଲିଫ କ୍ୟାମ୍ପ୍ରେ ୧୬,୭୨୦ ଲୋକଙ୍କୁ ରଖାଯାଇଛି। ଚିରାଙ୍ଗା, ବକ୍ସା ଜିଲାରେ ପୋଲ ଭୁଶୁଡ଼ି ପଡ଼ିଥିବା ବେଳେ ଅନେକ ରାସ୍ତାଘାଟ ନଷ୍ଟ ହୋଇଯାଇଛି। ଡିମା ହୋସାଓରେ ଭୂସ୍ଖଳନ ଯୋଗୁ ୩୦ ଘର ଭାଙ୍ଗିଯାଇଛି। ଲଗାଣ ବର୍ଷା ଯୋଗୁ ବ୍ରହ୍ମପୁତ୍ର ନଦୀରେ ଜଳସ୍ତର ବଢ଼ୁଥିବା ବେଳେ ଆଗାମୀ ୪ ଦିନ ବର୍ଷା ବିତ୍ପାତ ଲାଗିରହିବ ବୋଲି ଭାରତୀୟ ପାଣିପାଗ ବିଭାଗ ପକ୍ଷରୁ ଚେତାବନୀ ଦିଆଯାଇଛି। ମୁଖ୍ୟମନ୍ତ୍ରୀ ସର୍ବାନନ୍ଦ ସୋନୋଓ୍ବାଲ ବନ୍ୟାକ୍ଲିଷ୍ଟ ଅଞ୍ଚଳର ସ୍ଥିତି ସମୀକ୍ଷା କରି ସାହାଯ୍ୟ ଲାଗି ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି।