ଲକ୍ଷ୍ନୌ: କୌଣସି କାର୍ଯ୍ୟାଳୟରେ କିଛି ଭୁଲ ହେଲେ ବରିଷ୍ଠ କର୍ମଚାରୀ ବର୍ତ୍ତି ଯାଉଥିବା ବେଳେ ତଳିଆ କର୍ମଚାରୀ ଫସିଯାଆନ୍ତି। ବେଳେବେଳେ ଏଥିପାଇଁ ସେମାନଙ୍କୁ ଅସୁବିଧା ମଧ୍ୟ ଭୋଗିବାକୁ ପଡ଼ିଥାଏ। ହେଲେ ଉତ୍ତରପ୍ରଦେଶର ଗାଜିଆବାଦରୁ ଏଭଳି ଏକ ଘଟଣା ସାମ୍ନାକୁ ଆସିଛି, ଯେଉଁଠାରେ କର୍ମଚାରୀଙ୍କ ଭୁଲ ପାଇଁ ଜିଲାପାଳ ନିଜକୁ ଦାୟୀ କରିବା ସହ ନିଜ ଉପରେ ଜରିମାନା ଲଗାଇଥିବା ଜଣାପଡ଼ିଛି। ସୂଚନାଯୋଗ୍ୟ, କାର୍ଯ୍ୟାଳୟରେ ପାଣିଟାଙ୍କି ପୂରଣ ହୋଇ ଓଭର ଫ୍ଲୋ ହେବାରୁ ଜିଲାପାଳ ଅଜୟ ଶଙ୍କର ପାଣ୍ଡେ ନିଜ ଉପରେ ଓ କର୍ମଚାରୀଙ୍କ ଉପରେ ୧୦ହଜାର ଟଙ୍କା ଜରିମାନା ଲଗାଇଥିବା ଖବର ସାମ୍ନାକୁ ଆସିଛି। ଏହି ଖବର ପ୍ରଚାର ହେବା ପରେ ଏବେ ଚର୍ଚ୍ଚାର ବିଷୟ ପାଲଟିଛି। କଥାଟି ହେଲା, କାର୍ଯ୍ୟାଳୟରେ ପାଣିଟାଙ୍କି ପୂରଣ ହୋଇ ଓଭର ଫ୍ଲୋ ହେଉଥିଲା। ଏହାକୁ ଦେଖି ଜିଲାପାଳ ବିରକ୍ତ ହେବା ସହ ପାଣି କେତେବେଳୁ ନଷ୍ଟ ହେଉଛି ବୋଲି ଜଣେ କର୍ମଚାରୀଙ୍କୁ ପ୍ରଶ୍ନ କରିଥିଲେ। ୧୦ମିନିଟ୍ରୁ ପାଣି ନଷ୍ଟ ହେଉଥିବା ଜାଣିବା ପରେ ସେ ନିଜ ଉପରେ ଓ କର୍ମଚାରୀଙ୍କ ଉପରେ ସାମୂହିକ ୧୦ହଜାର ଟଙ୍କା ଜରିମାନା ଲଗାଇଥିଲେ। ଏଥିସହ ସେ କହିଥିଲେ, ପାଣି ସଂରକ୍ଷଣ କରିବା ସମସ୍ତଙ୍କର ଦାୟିତ୍ୱ ଏବଂ ଏହାକୁ ବଞ୍ଚାଇବା ମଧ୍ୟ ସମସ୍ତଙ୍କର କର୍ତ୍ତବ୍ୟ। ଏହା ଭୁଲ ନୁହେଁ ବରଂ ଦାୟିତ୍ୱହୀନତା। ତେଣୁ ସମସ୍ତଙ୍କ ସହ ମୋ ଉପରେ ମଧ୍ୟ ଏହା ଲାଗୁ ହୋଇଥିବାରୁ ଏହି ଜରିମାନା ଲଗାଯାଇଛି ବୋଲି ଅଜୟ କହିଛନ୍ତି। ତେବେ ୩୦ଜଣ ଅଧିକାରୀଙ୍କଠାରୁ ଶହେ ଟଙ୍କା ଓ କର୍ମଚାରୀଙ୍କଠାରୁ ୭୦ଟଙ୍କା ଲେଖାଏଁ ମାସିକ ଦରମାରୁ କାଟିବା ପାଇଁ ସେ ନିର୍ଦ୍ଦେଶ ଦେଇଥିଲେ। ଏହାପରେ ଏହି ଜରିମାନା ରାଶିକୁ ଜଳ ସଂରକ୍ଷଣ ବିଭାଗରେ ଜମା କରାଯାଇଛି। ଯାହାଦ୍ୱାରା ଜଳ ସଂରକ୍ଷଣ ଉନ୍ନତି କାର୍ଯ୍ୟରେ ଲଗାଯାଇପାରିବ। ତେବେ ଜିଲାପାଳଙ୍କ ଏହି ସଚ୍ଚୋଟତା ଏବେ ସବୁ ମହଲରେ ଭୂରି ଭୂରି ପ୍ରଶଂସା କରାଯାଇଛି।