ରାଜନଗର, ୮।୭(ଡି.ଏନ.ଏ.): ଗତ ଏକ ସପ୍ତାହ ଧରି ବର୍ଷା ଲାଗି ରହିଛି। ତେବେ ବର୍ଷା ଯୋଗୁ ରାଜନଗର ବ୍ଲକ ଗୁପ୍ତି ପଞ୍ଚାୟତର ବଗପାଟିଆ ଠାରେ ବସବାସ କରୁଥିବା ସାତଭାୟାବାସୀଙ୍କ ଦୁର୍ଦ୍ଦଶା ଦିନକୁ ଦିନ ବଢିବାରେ ଲାଗିଛି। ଅଧିକାଂଶ ସ୍ଥାନରେ ବର୍ଷାଜଳ ଜମି ସେମାନଙ୍କୁ ଏକପ୍ରକାର ଜଳବନ୍ଦୀ କରି ରଖିଛି। ପାଣି ଘେରରେ ପ୍ରାୟ ୫ ଶହ ପରିବାର ରହିଛନ୍ତି। ଲୋକେ ବାହାରକୁ ବାହାରିବା କଷ୍ଟକର ହୋଇପଡିଛି। ସାତଭାୟାବାସୀଙ୍କୁ ବଗପାଟିଆରେ ଥଇଥାନ କରାଯାଇଥିବା ବେଳେ ବର୍ଷାରେ ସେମାନଙ୍କ ଦୁର୍ଦ୍ଦଶା ଆଖିରେ ନ ଦେଖିଲେ ବିଶ୍ୱାସ କରି ହେବନି। ଏକ ସପ୍ତାହ ବିତି ଯାଇଥିଲେ ମଧ୍ୟ ଜିଲା କିମ୍ବା ବ୍ଲକ ପ୍ରଶାସନର ଅଧିକାରୀମାନେ ଲୋକଙ୍କ ପାଖରେ ପହଞ୍ଚତ୍ ନ ଥିବାରୁ ସେମାନଙ୍କ ମଧ୍ୟରେ ଅସନ୍ତୋଷ ଲାଗି ରହିଛି।
ଏଠାରେ ସୂଚନାଯୋଗ୍ୟ ଯେ, କେନ୍ଦ୍ରାପଡା ଜିଲା ରାଜନଗର ବ୍ଲକର ବଙ୍ଗୋପସାଗର ତଟବର୍ତ୍ତୀ ସାତଭାୟାର ୫୭୧ ପରିବାରଙ୍କୁ ସମୁଦ୍ର ଗ୍ରାସରୁ ରକ୍ଷା କରିବା ପାଇଁ ରାଜ୍ୟ ସରକାର ଗୁପ୍ତି ପଞ୍ଚାୟତ ଅଧୀନ ବଗପାଟିଆ ଠାରେ ୨୦୧୮ ଏପ୍ରିa ୨୦ ତାରିଖରେ ଥଇଥାନ କରିଛନ୍ତି। ପ୍ରତି ପରିବାରକୁ ୧୦ ଡେସିମିଲ ଜାଗା ସହିତ ବିଜୁ ପକ୍କାଘର ପ୍ରଦାନ କରିଥିଲେ। ତେବେ ବଗପାଟିଆରେ ଥଇଥାନ କରାଯାଇଥିବା ସ୍ଥାନ ମୁଖ୍ୟରାସ୍ତା ଠାରୁ ବହୁ ତଳେ ଥିବାରୁ ପ୍ରତି ପରିବାରକୁ ଢିଅ ବାନ୍ଧିବାକୁ ୧୦ ହଜାର ଟଙ୍କା ଲେଖାଏଁ ଆର୍ଥତ୍କ ସାହାଯ୍ୟ ପ୍ରଦାନ କରାଯାଇଥିଲା। ସାତଭାୟାବାସୀ ନୂଆ ଠିକଣାରେ ନୂଆ ଜୀବନ ଆରମ୍ଭ କରିଥିଲେ ମଧ୍ୟ ଜଳ ନିଷ୍କାସନ ବ୍ୟବସ୍ଥା ନ ଥିବାରୁ ଅସରାଏ ବର୍ଷାରେ ଅଧିକାଂଶ ଘର ଚାରିପଟେ ପାଣି ଜମି ରହୁଛି। ଫଳରେ ସେମାନଙ୍କ ଦୈନନ୍ଦିନ ଜୀବନରେ ନା ନା ସମସ୍ୟା ଦେଖା ଦେଇଛି।
ଏହାଛଡା ଅଧିକାଂଶ ସମୟରେ ବିଦ୍ୟୁତ୍ ରହୁ ନ ଥିବାରୁ ଅନ୍ଧାରରେ ହନ୍ତସନ୍ତ ହେବାକୁ ପଡୁଛି।ଗୋଟିଏ ପଟେ ବର୍ଷାଜଳ ସେମାନଙ୍କୁ ଅଣନିଃଶ୍ୱାସୀ କରି ପକାଉ ଥିବା ବେଳେ ବିଦ୍ୟୁତ ବିଭାଗର ଅବହେଳା ଯୋଗୁ ବର୍ଷାରାତିରେ ସେମାନଙ୍କ ହୀନସ୍ତା ଦୁଇଗୁଣ ହେବାରେ ଲାଗିଛି। ତୁରନ୍ତ ମୌଳିକ ସୁବିଧା ଯୋଗାଇ ଦିଆ ନ ଗଲେ ସେମାନେ ଆନ୍ଦୋଳନକୁ ଓହ୍ଲାଇବେ ବୋଲି ବଗପାଟିଆରେ ଥଇଥାନ ହୋଇଥିବା ସାତଭାୟାବାସୀ ଚେତାବନୀ ଦେଇଛନ୍ତି।