ଯାଜପୁର ସଦର, ୨୦ା୧୧ (ସମର ବିଜୟ ଶରଣ): ଯାଜପୁର ବ୍ଲକ ଅନ୍ତର୍ଗତ ମହେଶ୍ୱରପୁର ପଞ୍ଚାୟତର ନିଶ୍ଚନ୍ତା ଗ୍ରାମ ନିକଟରେ ନିର୍ମାଣାଧୀନ ପାନୀୟ ଜଳଯୋଗାଣ ପ୍ରକଳ୍ପର ଟାଙ୍କି ଭିତରୁ ସୋମବାର ପୂର୍ବାହ୍ନରେ ୨ଟି କଙ୍କାଳ ଜବତ ହୋଇଛି। ତାହା ମାନବକଙ୍କାଳ ବୋଲି ସ୍ଥାନୀୟ ଲୋକେ କହିବା ସହ ଏହାକୁ ନେଇ ନାନା ଆଲୋଚନା ହେଉଛି। କିନ୍ତୁ ତାହା ମାଙ୍କଡ଼ କଙ୍କାଳ ବୋଲି ଯାଜପୁର ସଦର ଥାନା ଅଧିକାରୀ ଅନିରୁଦ୍ଧ ନାୟକ କହିଛନ୍ତି। ଏହି ଘଟଣା ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ହୋଇଛି।
ସୂଚନା ଅନୁସାରେ ଗ୍ରାମର ପିଲାମାନେ ଲୁଚକାଳି ଖେଳ ଖେଳୁଥିଲେ। ଦୁଇଜଣ ପିଲା ଲୁଚିବା ପାଇଁ ପାଣିଟାଙ୍କି ଉପରକୁ ଚଢ଼ିଥିଲେ। ସେମାନେ ଟାଙ୍କି ଉପରେ ଥିବା ଫାଙ୍କରେ ଦୁଇଟି ଖପୁରି ଦେଖିବାକୁ ପାଇଥିଲେ। ଏହି ଖବର ପ୍ରଚାରିତ ହୋଇଯିବାରୁ ଘଟଣାସ୍ଥଳରେ ଶତାଧିକ ଲୋକଙ୍କ ଭିଡ଼ ଲାଗିଥିଲା। ଖବର ପାଇ ସଦର ଥାନା ଅଧିକାରୀ ଘଟଣାସ୍ଥଳରେ ପହଞ୍ଚି ବରୁଆଁ ଅଗ୍ନିଶମ ବାହିନୀ ସହ ଯୋଗାଯୋଗ କରିଥିଲେ। ବରୁଆଁ ଅଗ୍ନିଶମ ବାହିନୀର ଅଫିସର ରବୀନ୍ଦ୍ର କେତନ ସାହୁ ସଦଳବଳ ଘଟଣାସ୍ଥଳରେ ପହଞ୍ଚି ଟାଙ୍କି ମଧ୍ୟରୁ କଙ୍କାଳ ଦୁଇଟିକୁ ବାହାର କରି ତଳକୁ ଆଣିଥିଲେ। ଖବର ପାଇ ଏସ୍ପି ବିନିତ୍ ଅଗ୍ରୱାଲ, ଏସ୍ଡିପିଓ ସତ୍ୟବ୍ରତ ଲେଙ୍କା, ସଦର ଥାନା ଅଧିକାରୀ ଅନିରୁଦ୍ଧ ନାୟକ, ସାଇଣ୍ଟିଫିକ ଟିମ୍ ଓ ସ୍ଥାନୀୟ ସରପଞ୍ଚ ସୁଜିତ ରାୟଙ୍କ ଉପସ୍ଥିତିରେ କଙ୍କାଳ ଦୁଇଟିକୁ ଜିଲା ମୁଖ୍ୟ ଚିକିତ୍ସାଳୟ ପରୀକ୍ଷାଗାରକୁ ପଠାଇଥିଲେ। ତେବେ କଙ୍କାଳ ସହ କୌଣସି ପୋଷାକ ମିଳି ନ ଥିବାବେଳେ ଲୋମ ମିଳିଛି। ପରୀକ୍ଷାନିରୀକ୍ଷାରୁ ଏହି କଙ୍କାଳ ମାଙ୍କଡ଼ର ବୋଲି ଜଣାପଡ଼ିଥିବା ଥାନାଧିକାରୀ ନାୟକ କହିଛନ୍ତି।