ନର୍ଥ ସାଉଣ୍ଡ (ଆଣ୍ଟିଗୁଆ), ୧୭।୭ (ପି.ଟି.): ଅଧିନାୟକ ମନୀଷ ପାଣ୍ଡେଙ୍କ ଦମ୍ଦାର ଶତକ ସାଙ୍ଗକୁ ସ୍ପିନର କ୍ରୁନାଲ ପାଣ୍ଡ୍ୟାଙ୍କ ୫ ଉଇକେଟ୍ ସଫଳତା ବଳରେ ଏଠାରେ ଅନୁଷ୍ଠିତ ୩ୟ ଅନ୍ଅଫିସିଆଲ ଦିନିକିଆ ମ୍ୟାଚ୍ରେ ଭାରତ-ଏ ୧୪୮ ରନରେ ଘରୋଇ ଓ୍ବେଷ୍ଟଇଣ୍ଡିଜ-ଏ’କୁ ପରାସ୍ତ କରିଛି। ଏହି ବିଜୟ ସହ ଭ୍ରମଣକାରୀ ଭାରତ-ଏ ୫ ମ୍ୟାଚ୍ବିଶିଷ୍ଟ ସିରିଜକୁ ଆଗୁଆ ୩-୦ରେ କବ୍ଜା କରିନେଇଛି। ପୂର୍ବରୁ ଖେଳାଯାଇଥିବା ପ୍ରଥମ ଓ ୨ୟ ମ୍ୟାଚ୍କୁ ଭାରତ ୬୫ ରନର ସମାନ ବ୍ୟବଧାନରେ ଜିତିନେଇଥିଲା। ସିରିଜର ୪ର୍ଥ ମ୍ୟାଚ୍ ଶୁକ୍ରବାର ଖେଳାଯିବ।
ସ୍ଥାନୀୟ ସାର୍ ଭିଭିଆନ ରିଚାଡର୍ସ ଷ୍ଟାଡିୟମରେ ଟସ୍ ଜିତି ବ୍ୟାଟିଂ କରିଥିବା ଭାରତ-ଏ ଅଧିନାୟକ ପାଣ୍ଡେ (୧୦୦ ରନ, ୮୭ ବଲ, ୬ ଚୌକା, ୫ ଛକା)ଙ୍କ ଶତକ ସାଙ୍ଗକୁ ଯୁବ ଓପନର୍ ଶୁବମନ ଗିଲ (୭୭) ଓ ଶ୍ରେୟାସ ଆୟାର (୪୭)ଙ୍କ ଉଲ୍ଲେଖନୀୟ ଇନିଂସ ବଳରେ ନିର୍ଦ୍ଧାରିତ ୫୦ ଓଭରରେ ୬ ଉଇକେଟ୍ ହରାଇ ୨୯୫ ରନ ସଂଗ୍ରହ କରିଥିଲା। ଉଭୟ ଗିଲ୍ ଓ ଆୟାର ୨ୟ ଉଇକେଟ୍ ଯୋଡ଼ିରେ ମହତ୍ତ୍ୱପୂର୍ଣ୍ଣ ୧୦୯ ରନର ଭାଗୀଦାରି କରିଥିଲେ। ଗିଲ୍ ଆଉଟ୍ ହେବାପରେ ପାଣ୍ଡେ ଇନିଂସକୁ ଆଗେଇ ନେଇଥିଲେ। ଚତୁର୍ଥ ଉଇକେଟ୍ରେ ପାଣ୍ଡେ ଓ ହନୁମା ବିହାରୀ (୨୯ ରନ) ୧୧୦ ରନ ସଂଗ୍ରହ କରିଥିଲେ। ଜବାବରେ ୨୯୬ ରନର ଚ୍ୟାଲେଞ୍ଜିଂପୂର୍ଣ୍ଣ ଟାର୍ଗେଟ୍କୁ ପିଛା କରି ଓ୍ବେଷ୍ଟଇଣ୍ଡିଜ-ଏ ବାମହାତୀ ସ୍ପିନର କ୍ରୁନାଲ ପାଣ୍ଡ୍ୟାଙ୍କୁ ସାମ୍ନା କରି ନ ପାରି ୩୪.୨ ଓଭରରେ ୧୪୭ ରନରେ ସୀମିତ ରହିଥିଲା। ୧୦ ନମ୍ବର ସ୍ଥାନରେ ବ୍ୟାଟିଂ କରିବାକୁ ଆସିଥିବା କେମୋ ପଲ୍ ସର୍ବାଧିକ ୩୪ ଓ ଓପନର୍ ସୁନୀଲ ଆମ୍ବ୍ରିସ ୩୦ ରନ କରିଥିଲେ। ପାଣ୍ଡ୍ୟା ୭ ଓଭରରେ ୨୫ ରନ ବ୍ୟୟରେ ସର୍ବାଧିକ ୫ ଉଇକେଟ୍ ଅକ୍ତିଆର କରିଥିଲେ। ଶତକୀୟ ଇନିଂସ ଲାଗି ମନୀଷଙ୍କୁ ମ୍ୟାଚ୍ର ଶ୍ରେଷ୍ଠ ଖେଳାଳି ପୁରସ୍କାର ପ୍ରଦାନ କରାଯାଇଥିଲା।