ଖଜୁରିପଡ଼ା (ଡି.ଏନ.ଏ.)/ ବଲସକୁମ୍ପା,୧୬ା୧୨-ସରକାର କୋଟି କୋଟି ଟଙ୍କା ଖର୍ଚ୍ଚ କରି ବିଭିନ୍ନ ଯୋଜନା ମାଧ୍ୟମରେ ପାନୀୟ ଜଳ ପ୍ରକଳ୍ପ ନିର୍ମାଣ କରୁଛନ୍ତି। ଏଥିସହ କେତେକ ଅଞ୍ଚଳରେ ଉଠା ଜଳସେଚନ ବ୍ୟବସ୍ଥା କରି ଲୋକଙ୍କ ପାଖରେ ପାନୀୟ ଜଳ ଯୋଗାଉଛନ୍ତି। ହେଲେ ଏବେ ମଧ୍ୟ ଅନେକ ସ୍ଥାନରେ ପାନୀୟ ଜଳ ସମସ୍ୟା ଲାଗି ରହିଛି। ଏହା ଦେଖିବାକୁ ମିଳିଛି ଖଜୁରିପଡ଼ା ବ୍ଲକ ଅଧୀନରେ ଥିବା ବଲସକୁମ୍ପା ଗ୍ରାମପଞ୍ଚାୟତର (ନବଗୁବା) ଜାମ୍ବୁ ସାହିରେ। ଗ୍ରାମପଞ୍ଚାୟତଠାରୁ ୩ କିମି ଦୂରରେ ଅବସ୍ଥିତ ଏହି ଗ୍ରାମ।
ଗ୍ରାମରେ ପ୍ରାୟ ୧୮ ବସ୍ତିବାସିନ୍ଦା ରହୁଛନ୍ତି। କିନ୍ତୁ ଏଠାରେ ବର୍ତ୍ତମାନ ପର୍ଯ୍ୟନ୍ତ ପକ୍କା ରାସ୍ତା ନ ଥିବା ବେଳେ ଜଳସେଚନ ବ୍ୟବସ୍ଥା ନାହିଁ। ଏହି ଅଞ୍ଚଳରେ ଥିବା ଗୋଟିଏ ନଳକୂପ ଖରାପ ହୋଇଯାଇଛି। ତେଣୁ ଲୋକମାନେ ନଦୀ ଏବଂ ଚୁଆର ପାଣି ବ୍ୟବହାର କରୁଛନ୍ତି, ଯାହାଦ୍ୱାରା ଜନସାଧାରଣ ରୋଗଗ୍ରସ୍ତ ହେବାର ଆଶଙ୍କା ରହିଛି। ଏ ନେଇ ଲୋକେ ସରପଞ୍ଚ ଅଜୟ କୁମାର ମଲ୍ଲିକଙ୍କ ଜରିଆରେ ସରକାରଙ୍କୁ ଅନୁରୋଧ ଓ ଆବେଦନ କରିଛନ୍ତି। ସରପଞ୍ଚ ଅଜୟ ମଲ୍ଲିକ କହିଛନ୍ତି, ସେ ଏହି ସମସ୍ୟା ଉପରିସ୍ଥ ଅଧିକାରୀମାନଙ୍କୁ ଜଣାଇବା ସହିତ ସରକାରଙ୍କ ଦୃଷ୍ଟି ଆକର୍ଷଣ କରି ଜଳ ସମସ୍ୟାକୁ ଶୀଘ୍ର ସମାଧାନ କରାଯିବ। ଜଳ ସମସ୍ୟା ଦୂରୀକରଣ କରିବା ପାଇଁ ପ୍ରକାଶ ବେହେରା, କର୍ଣ୍ଣ ବେହେରା, ରଥିଆ ବେହେରା, କାଳିଆ ବେହେରା, ପ୍ରମୋଦ କହଁର, ଶ୍ରୀକାନ୍ତ ବେହେରା, ବିଦୁର ବେହେରା ସରକାରଙ୍କ ନିକଟରେ ଅନୁରୋଧ କରିଛନ୍ତି।