ପାରାଦୀପ, ୩୦ା୧(ସ୍ବ.ପ୍ର.): ପାରାଦୀପରେ ଗତ ଜାନୁୟାରୀ ୩ରୁ କାଉମଡ଼କ ଜାରି ରହିଥିଲେ ସୁଦ୍ଧା ଏ କ୍ଷେତ୍ରରେ କୌଣସି ଆଖିଦୃଶିଆ ପଦକ୍ଷେପ ନିଆଯାଉନାହିଁ। ଏପରି କି ପ୍ରାଣୀଧନ ଚିକିତ୍ସା ବିଭାଗ ପକ୍ଷରୁ ଗତ ୪ ତାରିଖରୁ କାଉର ଲାଳ ନମୁନା ପରୀକ୍ଷା ପାଇଁ ଭୋପାଳ ଯାଇଥିଲେ ହେଁ ଏ ପର୍ଯ୍ୟନ୍ତ ମରିବାର କାରଣ ସମ୍ପର୍କରେ ରିପୋର୍ଟ ଆସିନାହିଁ ବୋଲି ପ୍ରାଣୀଧନ ଚିକିତ୍ସା ବିଭାଗ ପକ୍ଷରୁ କୁହାଯାଇଛି। ଅପରପକ୍ଷେ ପାରାଦୀପ ଓ ଏହାର ଆଖପାଖ ଅଞ୍ଚଳରେ କୁକୁଡ଼ା ମାଂସ ବିକ୍ରି ଅବାଧରେ ଚାଲିଛି ଏବଂ ଘରେ-ହୋଟେଲରେ ଲୋକେ କୁକୁଡ଼ା ମାଂସ ଓ ଅଣ୍ଡା ଖାଉଛନ୍ତି।
ପାରାଦୀପ ବନ୍ଦରରେ ବିଶ୍ୱର ଅନେକ ଦେଶରୁ ପଣ୍ୟବାହୀ ଜାହାଜ ଲାଗୁଛି। ସେଥିରେ ପ୍ରାୟତଃ ବିଦେଶୀ ନାବିକମାନେ ଆସୁଛନ୍ତି। କରୋନା ଭାଇରସ ପାଇଁ ସରକାରୀ ଭାବେ କଟକଣା ଲାଗୁ ହେବା ପରେ ବନ୍ଦର କର୍ତ୍ତୃପକ୍ଷ ମଧ୍ୟ କେତେକ କଠୋର କଟକଣା ଲଗାଇଛନ୍ତି। ବିଶେଷକରି ଏସିଆ ମହାଦେଶ ଭାଇରସ୍ ଥିବା ବନ୍ଦର ଦେଇ ଆସୁଥିବା ଜାହାଜଗୁଡ଼ିକୁ ପାରାଦୀପ ବନ୍ଦରରେ ପ୍ରବେଶ କରାଯିବ ନାହିଁ ବୋଲି ବନ୍ଦର ମୁଖ୍ୟ ଚିକିତ୍ସାଧିକାରୀ ଡା. ପ୍ରହରାଜ ପଣ୍ଡା କହିଛନ୍ତି। ଏପରିକି ଜିଲା ପ୍ରଶାସନ ପକ୍ଷରୁ ମଧ୍ୟ ପ୍ରତିକାତ୍ମକ ବ୍ୟବସ୍ଥା ଉପରେ ସମୀକ୍ଷା କରାଯାଇଛି ଏବଂ ବନ୍ଦର କର୍ତ୍ତୃପକ୍ଷ ୪ନଂ. ଗେଟ୍ଠାରେ ଏକ ସ୍କ୍ରିନିଂ ମେଶିନ୍ ଲଗାଇଛନ୍ତି। ଗୋଟିଏ ପଟେ ଭାଇରସ ଭୟ, ଅପରପକ୍ଷେ କାଉ ମଡ଼କକୁ ନେଇ ପାରାଦୀପ ଲୋକଙ୍କ ମଧ୍ୟରେ ଭୟ ସୃଷ୍ଟି ହୋଇଛି। କାଉ ମଡ଼କ ସମ୍ପର୍କରେ ପ୍ରାଣୀଧନ ଚିକିତ୍ସକ ଡା. ଦେବାଶିଷ ରାଉତଙ୍କୁ ପଚାରିବାରେ ସେ କୁହନ୍ତି, ମଲା କାଉର ଲାଳ ନମୁନା ଜାନୁୟାରୀ ୪ରେ ଭୋପାଳ ପଠାଯାଇଛି। ରିପୋର୍ଟରେ ଯଦି ପଜେଟିଭ ଆସିଥାନ୍ତା ସେମାନେ ସିଧା କେନ୍ଦ୍ର ସରକାରଙ୍କୁ ଅବଗତ କରାଇଥାନ୍ତେ। ଏବେ ସୁଦ୍ଧା କୌଣସି ରିପୋର୍ଟ ଆସି ନ ଥିବାରୁ ଆମ୍ଭେ ନେଗେଟିଭ୍ ବୋଲି ବିଚାର କରୁଛୁ। ଏବେ ସରକାରୀ ଭାବେ ଆମକୁ ସତର୍କ ରହିବାକୁ ଏବଂ ସବୁବେଳେ ସ୍ଥିତି ସମ୍ପର୍କରେ ସମୀକ୍ଷା କରାଯିବାକୁ କୁହାଯାଇଛି ବୋଲି ସେ କହିଛନ୍ତି।