ପାରାଦୀପ,୧୦।୧ (ସ୍ବ.ପ୍ର.): ପାରାଦୀପ ଟ୍ରକ ମାଲିକ ସଂଘଗୁଡ଼ିକ ମଧ୍ୟରେ ଚାଲିଥିବା ବିବାଦ ସମାଧାନ ପାଇଁ ଗୁରୁବାର ପ୍ରଶାସନିକ ଅଧିକାରୀଙ୍କ ଉପସ୍ଥିତିରେ ତ୍ରିପାକ୍ଷିକ ବୈଠକ ବସିଥିଲେ ବି କିଛି ନିଷ୍କର୍ଷ ବାହାରି ପାରିନାହିଁ। ହାଇକୋର୍ଟ ନିଷ୍ପତ୍ତିକୁ ନେଇ ଅଙ୍କ ଛିଡୁ ନ ଥିବାରୁ ପୁଣି ଥରେ ବୈଠକ ବସିବ ବୋଲି ଏଡିଏମ୍ କାହ୍ନୁଚରଣ ଧୀର୍ କହିଛନ୍ତି।
ପାରାଦୀପର ୩ ଟ୍ରକ ମାଲିକ ସଂଘ (ପାରାଦୀପ ଟ୍ରକ ମାଲିକ ସଂଘ, ଜଗନ୍ନାଥ ଟ୍ରକ ମାଲିକ ସଂଘ ଓ ଜଗତ୍ସିଂପୁର ଜିଲା ଟ୍ରକ ମାଲିକ ସଂଘ) ପାରାଦୀରେ ପରିରବହନକୁ ବ୍ୟବସ୍ଥିତ କରିବା ପାଇଁ ଜଏଣ୍ଟ କୋଅର୍ଡିନେଶନ କମିଟି (ଜେସିସି) ଗଠନ କରିଛନ୍ତି। ଏଥିରେ ସଂଘ ମଧ୍ୟରେ ପଣ୍ୟ ପରିବହନ ପାଇଁ ବ୍ୟବସ୍ଥା ହୋଇଛି। ଅର୍ଥାତ୍ ୧୦୦ ଗାଡ଼ି ଆବଶ୍ୟକ ହେଲେ ସେଥିରେ ପାରାଦୀପ ସଂଘ ୫୨, ଜଗନ୍ନାଥ ସଂଘ ୩୩ ଓ ଜଗତ୍ସିଂହପୁର ସଂଘ ୧୫ଟି ଗାଡ଼ି ଦେବେ। ଏଥିସହ ଯେକୌଣସି ସଂସ୍ଥାର ପଣ୍ୟ ପରିବହନ କ୍ଷେତ୍ରରେ ଜାଲିଆତି, ଚୋରି ଆଦି ହେଲେ ଜେସିସି ଉତ୍ତରଦାୟୀ ରୁହେ। ଏହା ମଧ୍ୟରେ କୌଣସି ନୂଆ ମାଲିକଙ୍କ ସଦସ୍ୟତା ଗ୍ରହଣ କରିବା କ୍ଷେତ୍ରରେ ଅଙ୍କୁଶ ଲଗାଯାଇଥିବାରୁ ବର୍ଷେ ହେଲା ୪-ଟି (ଟ୍ରକ୍, ଟିପ୍ପ, ଟ୍ରଲର ଓ ଟ୍ୟାଙ୍କର) ସଂଘ ମୁଣ୍ଡ ଟେକିଛି। ଏହି ସଂଘ ପ୍ରଥମ କରି ପିପିଏଲ୍ରେ ଜିପସମ୍ ପରିବହନ ପାଇଁ ଗତ ଡିସେମ୍ବରରେ ଅଗ୍ରାଧିକାର ପାଇଥିଲା। ମାତ୍ର ୪-ଟି ସଂଘ ପିପିଏଲ୍ ଭିତରକୁ ଯାଉଥିବା ବେଳେ ଅନ୍ୟ ୩ ପୁରୁଣା ସଂଘ ଏହାକୁ ବିରୋଧ କରିଥିଲେ। ଏପରିକି ପରିବହନ କାମ ଉଦ୍ଘାଟନ କରିବାକୁ ଆସିଥିବା ମନ୍ତ୍ରୀ, ବିଧାୟକ ଅଧାରୁ ଫେରି ଯାଇଥିଲେ। ଏହା ବିରୋଧରେ ଗତ ୨ ତାରିଖରେ ୪-ଟି ସଂଘ ଏଡିଏମ୍ ଅଫିସ୍ ଆଗରେ ଧାରଣା ଦେଇଥିଲେ। ସେହି ଆଧାରରେ ଗୁରୁବାର ଆଲୋଚନା ପାଇଁ ଦିନ ସ୍ଥିର କରାଯାଇଥିଲା। ଆଲୋଚନାରେ ଜେସିସି ଦର୍ଶାଇଥିଲା ଯେ, ୨୦୧୨ରେ ସେମାନେ ଜିପସମ୍ ପରିବହନ ପାଇଁ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ସେତେବେଳେ ହାଇକୋର୍ଟ ତାଙ୍କ ଜିପସମ୍ ପରିବହନର ୩୦ ପ୍ରତିଶତ ଟ୍ରକ ସଂଘକୁ ଦେବେ ବୋଲି ନିଷ୍ପତ୍ତି ହୋଇଥିଲା। ନିଷ୍ପତ୍ତି ମୁତାବକ, ସେହି ୩୦ ପ୍ରତିଶତକୁ କିଏ ପରିବହନ କରିବ ତାହା ସ୍ପଷ୍ଟ କରନ୍ତୁ ବୋଲି ଯୁକ୍ତି ବାଢ଼ିଥିଲେ। ତେଣୁ ଆଗାମୀ ବୈଠକରେ ହାଇକୋର୍ଟଙ୍କ ନିଷ୍ପତ୍ତି ସମ୍ପର୍କରେ ତର୍ଜମା କରାଯିବ। ସେତେବେଳେ ବୈଠକରେ ସଂଘ ବ୍ୟତୀତ ପିପିଏଲ୍, ଟ୍ରାନ୍ସପୋର୍ଟ ସଂସ୍ଥା ପ୍ରମୁଖ ଉପସ୍ଥିତ ରହିବେ ବୋଲି ଏଡିଏମ୍ ଧୀର କହିଛନ୍ତି।