ପାରାଦୀପ,୧୫ା୩(ସ୍ବ.ପ୍ର.): ପାରାଦୀପ-ହରିଦାସପୁର ରେଳପଥରେ ଆସନ୍ତା ଅଗଷ୍ଟରୁ ଟ୍ରେନ୍ ଚଳାଚଳ କରିବ ବୋଲି ଜଗତ୍ସିଂହପୁର ଜିଲାପାଳ ସଂଗ୍ରାମ କେଶରୀ ମହାପାତ୍ର ସୂଚନା ଦେଇଛନ୍ତି। ଟ୍ରେନ୍ ଚଳାଚଳ କଲେ ପରିବହନ ଜନିତ ପ୍ରଦୂଷଣ ହ୍ରାସ ପାଇବ ବୋଲି ସେ ମତ ରଖିଛନ୍ତି। ଗତ ଶୁକ୍ରବାର ସନ୍ଧ୍ୟାରେ ଜିଲାପାଳ ମହାପାତ୍ର ଓ ଅନ୍ୟ ଅଧିକାରୀମାନେ ପାରାଦୀପର ବିଭିନ୍ନ ସମସ୍ୟା ଉପରେ ସମୀକ୍ଷା କରିଥିଲେ। ବୈଠକ ପରେ ଗଣମାଧ୍ୟମକୁ ସୂଚନା ଦେଇ ଜିଲାପାଳ କହିଥିଲେ, ପାରାଦୀପର ପ୍ରଦୂଷଣ ରୋକିବା ଦିଗରେ କେତେକ ପଦକ୍ଷେପ ନିଆଯାଉଛି। ପାରାଦୀପ ବନ୍ଦରର ଅଠରବାଙ୍କିଠାରୁ ଦୋଛକି ପର୍ଯ୍ୟଟନ୍ତ ଏକ ଫ୍ଲାଏଓଭର ନିର୍ମାଣ କରାଯିବ। ଯାହା ଏବେ ଟେଣ୍ଡର ପର୍ଯ୍ୟାୟରେ ପହଞ୍ଚତ୍ଛି। ଏଥିସହ ଅଗଷ୍ଟ ମାସରୁ ପାରାଦୀପ-ହରିଦାସପୁର ରେଳ ଚଳାଚଳ କଲେ ଟ୍ରକ୍ ଦ୍ୱାରା ମାଲ୍ ପରିବହନ ହ୍ରାସ ପାଇବ। ଟ୍ରକ୍ ଦ୍ୱାରା ମାଲ୍ ପରିବହନ ଯୋଗୁ ରାସ୍ତାରେ ଧୂଳି ଆସ୍ତରଣ ଅଧିକ ହେଉଛି। ସେ ସବୁ ଆଉ ହେବ ନାହିଁ। ଅନ୍ୟପକ୍ଷରେ ରେଳ ଚଳାଚଳ କରିବା ପରେ ପାରାଦୀପରେ ଥିବା ୧୦ ହଜାରରୁ ଊର୍ଦ୍ଧ୍ୱ ଟ୍ରକଗୁଡିକର ଭବିଷ୍ୟତ କ’ଣ ହେବ ବୋଲି ଜିଲାପାଳଙ୍କୁ ଗଣମାଧ୍ୟମ ପ୍ରତିନିଧିମାନେ ପ୍ରଶ୍ନ କରିଥିଲେ, ଏ ପ୍ରସଙ୍ଗରେ ଜିଲାପାଳ କହିଥିଲେ, ଏବେ ପାରାଦୀପରେ ଶିଳ୍ପ ବଢ଼ୁଛି। ସେଥିରେ ଅନ୍ୟ ବ୍ୟବସାୟ କରି ଟ୍ରକ୍ ମାଲିକ ରୋଜଗାରକ୍ଷମ ହୋଇପାରିବେ।
ସୂଚନାଯୋଗ୍ୟ, ପାରାଦୀପରେ ବର୍ଷେ ହେଲା ଟ୍ରକ ସଂଘକୁ ନେଇ ଅନେକ ବିବାଦ ଦେଖାଦେଇଛି। ସଂଘ ଜରିଆରେ ଟ୍ରକ୍ ମାଲିକମାନେ ପଣ୍ୟ ପରିବହନ ମୂଲ୍ୟ ସ୍ଥିର କରି ଅନେକ ପରିବହନକାରୀ ସଂସ୍ଥାକୁ ଶୋଷଣ କରୁଛନ୍ତି ବୋଲି ଅଭିଯୋଗ ହେଉଛି। ଏହିଭଳି ଏକ ବୃହତ୍ ପରିବହନକାରୀ ସଂସ୍ଥା ୨୦୧୮ରେ ଟ୍ରକ୍ରେ ପଣ୍ୟ ପରିବହନ ବନ୍ଦ କରି ଟ୍ରେନ୍ରେ ପରିବହନ କରିଥିଲେ। ଯାହାକୁ ଜିଲାପାଳ ମହାପାତ୍ର କଥା ପ୍ରସଙ୍ଗରେ କହିଥିଲେ ଯେ, ଏପରି ମୂଲ୍ୟ ଦୁନିଆରେ କେଉଁଠି ହେଉ ନ ଥିବ। ଏମିତି ସ୍ଥିତିରେ ସଂଘଗୁଡିକ ଧାରଣା-ଧର୍ମଘଟ କରି ଅଡ଼ୁଆରେ ପକାଇଥାନ୍ତି। ଟ୍ରେନ୍ରେ ପଣ୍ୟ ପରିବହନ ହେଲେ ଟ୍ରକ ବ୍ୟବସାୟ ପାଇଁ ନକରାତ୍ମକ ସ୍ଥିତି ଆଣିପାରେ ବୋଲି ଚର୍ଚ୍ଚା ହେଲାଣି। ଅପରପକ୍ଷେ ୪ଟି ଟ୍ରକ ମାଲିକ ସଂଘ ସେମାନଙ୍କ ସଦସ୍ୟ ସଂଖ୍ୟା ବୃଦ୍ଧି ପାଇଁ ମାସେ ହେଲା ନୋଟିସ୍ ଜାରି କରିଛନ୍ତି। କେତେକ ବେକାର ଯୁବକ ନୂଆ ଟ୍ରକ୍ କରିବା ପାଇଁ ସଂଘରେ ଲବି ଚଳାଇଛନ୍ତି। ଏହିଭଳି ସ୍ଥିତିରେ ପ୍ରଶାସନର ଟ୍ରକ ଚଳାଚଳ ଉପରେ ଅଙ୍କୁଶ ଲଗାଇବା ପ୍ରୟାସ ଆଗାମୀ ଦିନରେ କି ପ୍ରଭାବ ପକାଇବ ତାହା ଦେଖିବାକୁ ବାକି ରହିଲା।