ଲଣ୍ଡନ,୧।୧୧(ଏଏଫ୍ପି)- ଟ୍ରିପଲ ଅଲିମ୍ପିକ୍ ରୋଇଂ (ନୌଚାଳନା) ଚାମ୍ପିୟନ ପିଟ ରିଡ୍ ପକ୍ଷାଘାତରେ ପୀଡ଼ିତ ହୋଇଛନ୍ତି। ମେରୁଦଣ୍ଡରେ ଷ୍ଟ୍ରୋକ୍ ଯୋଗୁ ତାଙ୍କ ଛାତି ତଳ ସମ୍ପୂର୍ଣ୍ଣ ଅକ୍ଷମ ହୋଇଯାଇଥିବା ସେ ଘୋଷଣା କରିଛନ୍ତି। ରୟାଲ ନେଭିରେ ଲ୍ୟୁଟ୍ନାଣ୍ଟ କମାଣ୍ଡର ଭାବେ କାର୍ଯ୍ୟରତ ୩୮ ବର୍ଷୀୟ ରିଡ୍ ୨୦୦୮ ବେଜିଂ ଅଲିମ୍ପିକ୍ସରେ କକ୍ସଲେସ ଫୋରରେ ସ୍ବର୍ଣ୍ଣ ପଦକ ଜିତିଥିଲେ। ୨୦୧୨ ଲଣ୍ଡନ ଓ ୨୦୧୬ ରିଓ ଅଲିମ୍ପିକ୍ସରେ ସମାନ ଇଭେଣ୍ଟରେ ମଧ୍ୟ ସ୍ବର୍ଣ୍ଣ ପଦକ ପାଇଥିଲେ। ଚଳିତ ମାସରେ ରିଡ୍ ସ୍ପାଇନାଲ ଷ୍ଟ୍ରୋକ୍ର ସମ୍ମୁଖୀନ ହୋଇଥିବା ଇନ୍ଷ୍ଟାଗ୍ରାମ୍ରେ ଟୁଇଟ୍ କରିଥିଲେ। ମୁଁ ସମ୍ପୂର୍ଣ୍ଣ ଫିଟ୍ ହେବାର ଖୁବ୍ କମ୍ ସମ୍ଭାବନା ଅଛି ବୋଲି ଉକ୍ତ ପୋଷ୍ଟରେ ଲେଖିଥିଲେ। ଗତବର୍ଷ ରୋଇଂରୁ ଅବସର ଘୋଷଣା କରିଥିବା ରିଡ୍ କହିଛନ୍ତି ଯେ, ଏହା ମୋ ମେରୁଦଣ୍ଡର ମଧ୍ୟଭାଗରେ ହୋଇଛି। ଏଣୁ ମୋ ଛାତି ତଳର ନିମ୍ନଭାଗ ସମ୍ପୂର୍ଣ୍ଣ ପକ୍ଷାଘାତ ହୋଇଯାଇଛି। ମୋ ହାତ ସମ୍ପୂର୍ଣ୍ଣ ଠିକ୍ ଥିବାବେଳେ ମୁଣ୍ଡ ଏବେ ମଧ୍ୟ କାର୍ଯ୍ୟକ୍ଷମ ଅଛି।
