ଭୁବନେଶ୍ୱର, ୧୯ା୧୦(ବ୍ୟୁରୋ): ବ୍ୟବସାୟିକ ପ୍ରତିଷ୍ଠାନ, ସିନେମା ହଲ, ମଲ୍, ଆପାର୍ଟମେଣ୍ଟ, ହସ୍ପିଟାଲରେ ଲୋକଙ୍କ ପାଇଁ ପାର୍କିଂ ସମ୍ପୂର୍ଣ୍ଣ ମାଗଣା କରିବାକୁ ଭୁବନେଶ୍ୱର ଉନ୍ନୟନ କର୍ତ୍ତୃପକ୍ଷ (ବିଡିଏ) ନିର୍ଦ୍ଦେଶ ଦେଇଛି। ମାତ୍ର ଏହି ନିର୍ଦ୍ଦେଶକୁ ଅବମାନନା କରି ବେଆଇନ୍ ଭାବେ ପାର୍କିଂ ଫି ଆଦାୟ କରାଯାଉଛି। ଏଭଳି ଅଭିଯୋଗରେ ଶୁକ୍ରବାର ଏସ୍ପ୍ଲାନେଡ ଓ୍ବାନ୍, ବିଏମ୍ସି ଭବାନୀ ମଲ, ଖାରବେଳନଗର ଫୋରମ୍ ମାର୍ଟ, ସିମ୍ଫୋନୀ, ଡିଏନ୍ ରେଗାଲିଆ ଆଦି ୧୦ଟି ମଲ୍କୁ ନୋଟିସ୍ କରାଯାଇଥିବା ବିଡିଏ ପ୍ଲାନିଂମେମ୍ବର ଗୌରୀଶଙ୍କର ଭୂୟଁ। କହିଛନ୍ତି। ଶନିବାର ବିଭିନ୍ନ ଘରୋଇ ହସ୍ପିଟାଲକୁ ନୋଟିସ ଦିଆଯିବ।
ପ୍ଲାନିଂମେମ୍ବର ଭୂୟଁ। କହିଛନ୍ତି, ଉପରୋକ୍ତ ମଲଗୁଡ଼ିକରେ ବେଆଇନ ଭାବେ ପାର୍କିଂ ଫି ଆଦାୟ ହେଉଥିବା ବିଡିଏ ଟିମ୍ ଜାଣିବାକୁ ପାଇବା ପରେ ନୋଟିସ୍ ଦିଆଯାଇଛି। ପାର୍କିଂ ଫି ଆଦାୟ ବନ୍ଦ କରିବା, ବିଡିଏ ଦ୍ୱାରା ଦିଆଯାଇଥିବା ପ୍ଲାନ୍ ଅନୁସାରେ କାର୍ଯ୍ୟକରିବା, ୭ଦିନ ମଧ୍ୟରେ ଏହାର ସବିଶେଷ ରିପୋର୍ଟ ପ୍ରଦାନ କରିବାକୁ ନୋଟିସ୍ରେ କୁହାଯାଇଛି। ବିଡିଏର ନିର୍ଦ୍ଦେଶ ଅନୁସାରେ କାର୍ଯ୍ୟ ନ ହେଲେ ଦୃଢ କାର୍ଯ୍ୟାନୁଷ୍ଠାନ ସ୍ବରୂପ ରେଗୁଲେଶନ୍ ୩୭ର ସବ୍ ରେଗୁଲେଶନ୍ (୭) ଅନୁଯାୟୀ ଉକ୍ତ ବିଲ୍ଡିଂକୁ ସିଲ୍ କରାଯିବ, ନଚେତ୍ ପ୍ଲାନ୍ ଆପ୍ରୁଭାଲକୁ ଅବୈଧ ଦର୍ଶାଇ ବିଲ୍ଡିଂକୁ ଭାଙ୍ଗିଦେବ। ବିଡିଏ ପ୍ଲାନିଂ ଓ ବିଲ୍ଡିଂ ଷ୍ଟାଣ୍ଡାର୍ଡସ୍ ଅନୁସାରେ ଫ୍ଲୋର ଏରିଆ ରେସିଓ (ଏଫଏଆର)କୁ ଭିତ୍ତିକରି ଉକ୍ତ ବିଲ୍ଡିଂ ପାର୍କିଂ ଯୋଗାଇ ଦେବାକୁ ବାଧ୍ୟ ବୋଲି ଭୂୟଁ। କହିଛନ୍ତି।
ବିଏମ୍ସି ଭବାନୀ ମଲ୍ରୁ ପିଓଏସ୍ ମେଶିନ ଜବତ
ବେଆଇନ ପାର୍କିଂ ଫି ଆଦାୟ କରୁଥିବାରୁ ଶହୀଦନଗରସ୍ଥିତ ବିଏମ୍ସି ଭବାନୀ ମଲକୁ ଭୁବନେଶ୍ୱର ମହାନଗର ନିଗମ (ବିଏମ୍ସି) କାରଣ ଦର୍ଶାଅ ନୋଟିସ ଜାରି କରିଛି। ବିଏମ୍ସି ପକ୍ଷରୁ ଗୁରୁବାର ପାର୍କିଂ ଫି ଆଦାୟ ବନ୍ଦ କରିବାକୁ କୁହାଯାଇଥିଲା। ଏହା ସତ୍ତ୍ୱେ ସେଠାରେ ପାର୍କିଂ ଫି ଆଦାୟ କରାଯାଉଥିବା ବିଏମ୍ସି ସେଣ୍ଟ୍ରାଲ୍ ସ୍କ୍ବାଡ୍ ଦେଖିବାକୁ ପାଇଥିଲା। ଏପରି କି ସ୍ବାଡ୍ ସେଠାରୁ ସୁରକ୍ଷା କର୍ମୀଙ୍କଠାରୁ ପାର୍କିଂ ଫି ଆଦାୟରେ ବ୍ୟବହୃତ ୨ଟି ପିଓଏସ୍ ମେଶିନ ଜବତ କରିଥିଲା।