କଳିଙ୍ଗନଗର,୬।୧୨ (ଡି.ଏନ୍.ଏ.)- କଳିଙ୍ଗନଗର ଶିଳ୍ପାଞ୍ଚଳ ସାତବାଇଁଶିଆ ଛକ ନିକଟ ଏକ ଘରୋଇ ଟ୍ରକ୍ ପାର୍କିଂ ୟାଡ୍ରୁ ଗୁରୁବାର ଦାନଗଦୀ ପୋଲିସ ଜଣେ ଟ୍ରେଲର ହେଲ୍ପରଙ୍କ ମୃତଦେହ ଉଦ୍ଧାର କରିଛି। ମୃତକ ଜଣ ହେଲେ ବିହାରର କୁମୁଡା ଥାନା ସିତାମ୍ବରୀ ଜିଲା ବିସିନିପୁର ଗ୍ରାମର ପାରସନାଥ ମିଶ୍ରାଙ୍କ ପୁଅ ବିଚୁ ମିଶ୍ରା(୩୨) । ଏ ନେଇ ପୋଲିସ ଏକ ଅପମୃତ୍ୟୁ ମାମଲା (ନଂ.୪୧୯/୧୯) ରୁଜୁକରି ଦାନଗଦୀ ଡାକ୍ତରଖାନାରେ ବ୍ୟବଚ୍ଛେଦ କରି ତଦନ୍ତ ଚଳାଇଛି। ପ୍ରକାଶ ଯେ, ବୁଧବାର ରାତିରେ ପାର୍କିଂ ୟାର୍ଡରେ ଥିବା ମାଲ ବୋଝେଇ ଟ୍ରେଲ୍ର (ଓଡି୧୯ପି ୫୯୩୧) ତଳୁ ଦୁର୍ଗନ୍ଧ ବାହାରୁଥିଲା। ଅନ୍ୟ ଗାଡି ଡ୍ରାଇଭରମାନେ ଘଟଣାସ୍ଥଳରେ ପହଞ୍ଚତ୍ବା ପରେ ଏକ ମୃତଦେହ ପଡିଥିବା ଦେଖିଥିଲେ। ଏ ନେଇ ସୁରକ୍ଷା କର୍ମୀଙ୍କୁ ଜଣାଇଥିଲେ। ପରେ ସୁରକ୍ଷା କର୍ମୀ ଦାନଗଦୀ ପୋଲିସକୁ ଅବଗତ କରିଥିଲେ। ଖବର ପାଇ ଦାନଗଦୀ ଫାଣ୍ଡି ପୋଲିସ୍ ଘଟଣାସ୍ଥଳରେ ପହଞ୍ଚତ୍ ମୃତଦେହ ଜବତ କରିଥିଲା। ତେବେ ପାର୍କିଂ ୟାର୍ଡରେ କଡ଼ାକଡି ସୁରକ୍ଷା ବ୍ୟବସ୍ଥା ରହିଥିଲେ ମଧ୍ୟ ହେଲ୍ପରଙ୍କ ମୃତ୍ୟୁ ବିଷୟରେ କେହି ନ ଜାଣି ପାରିବା ନେଇ ସାଧାରଣରେ ଅନେକ ପ୍ରଶ୍ନବାଚୀ ସୃଷ୍ଟି ହୋଇଛି। ଅପରପକ୍ଷେ ଦୁର୍ଘଟଣା ପରେ ଘଟଣାସ୍ଥଳରୁ ଟ୍ରେଲର ଡ୍ରାଇଭର ଫେରାର ଥିବାରୁ ଏହା ଏକ ହତ୍ୟାକାଣ୍ଡ ହୋଇଥାଇପାରେ ବୋଲି ସାଧାରଣରେ ଚର୍ଚ୍ଚା ହେଉଛି। ସୂଚନାଯୋଗ୍ୟ, ଗତ ବର୍ଷ ମଧ୍ୟ ଏଠାରେ ଜଣେ ଟ୍ରେଲର ହେଲ୍ପରଙ୍କ ସନ୍ଦେହଜନକ ଭାବେ ମୃତ୍ୟୁ ଘଟିଥିଲା।