ବଳାତ୍କାର କରି ଜେଲ୍ ଯାଇଥିଲେ। ଜାମିନରେ ଫେରି ଜାଳିଦେଲେ। ମାନବିକତାକୁ ଲଜ୍ଜିତ କରି ସଭ୍ୟ ସମାଜର ମୁଣ୍ଡ ତଳକୁ କରିଦେବା ଭଳି ପୁଣି ଏକ ବର୍ବରକାଣ୍ଡ ଘଟିଛି ଉତ୍ତରପ୍ରଦେଶର ଉନ୍ନାଓରେ। ଜଣେ ବଳାତ୍କାର ପୀଡ଼ିତାଙ୍କୁ ଗୁରୁବାର ସକାଳେ ନିଆଁରେ ଜାଳି ମାରିଦେବା ପାଇଁ ଉଦ୍ୟମ କରିଛନ୍ତି ଅଭିଯୁକ୍ତମାନେ। ପୀଡ଼ିତାଙ୍କ ଶରୀରର ୯୦ ପ୍ରତିଶତ ପୋଡ଼ି ହୋଇଯାଇଥିବାରୁ ଅବସ୍ଥା ସଙ୍କଟାପନ୍ନ ରହିଛି। ତାଙ୍କୁ ଅଧିକ ଚିକିତ୍ସା ପାଇଁ ଏକ ବିମାନରେ ଦିଲ୍ଲୀର ସଫ୍ଦରଜଙ୍ଗ ହସ୍ପିଟାଲକୁ ନିଆଯାଇଛି। ସେପଟେ ମାମଲାର ମୁଖ୍ୟ ଅଭିଯୁକ୍ତ ଆମତ୍ସମର୍ପଣ କରିଥିବାବେଳେ ଅନ୍ୟ ୪ ଅଭିଯୁକ୍ତଙ୍କୁ ଗିରଫ କରି ତନାଘନା କରୁଛି ପୋଲିସ। ହାଇଦ୍ରାବାଦର ମହିଳା ପ୍ରାଣୀ ଚିକିତ୍ସକଙ୍କୁ ବଳାତ୍କାର ଓ ହତ୍ୟା ପରେ ପୋଡ଼ିଦିଆଯିବା ଘଟଣାକୁ ନେଇ ସାରା ଦେଶରେ ଜନାକ୍ରୋଶ ଲାଗିରହିଥିବାବେଳେ ଦିନକୁ ଦିନ ଯୌନ ବିକୃତ ପୁରୁଷଙ୍କ ନୂଆ ନୂଆ ବର୍ବରତା ସାମ୍ନାକୁ ଆସିବାରେ ଲାଗିଛି। ଏହିକ୍ରମରେ ୨୦୧୭ରେ ତତ୍କାଳୀନ ଭାଜପା ବିଧାୟକ କୁଲଦୀପ ସିଂ ସେନ୍ଗାରଙ୍କ କାର୍ନାମାକୁ ନେଇ ଚର୍ଚ୍ଚାରେ ଥିବା ଉନ୍ନାଓ ପୁଣିଥରେ ମୁଣ୍ଡାଇଛି ବଦନାମର କଳଙ୍କ।
ନୂଆଦିଲ୍ଲୀ,୬।୧୨(ପି.ଟି./ଆଇଏଏନ୍ଏସ୍):ଉନ୍ନାଓ ଗଣବଳାତ୍କାର ପୀଡ଼ିତାଙ୍କୁ ପୋଡ଼ି ହତ୍ୟା ଉଦ୍ୟମ କରାଯିବା ନେଇ ଗୁରୁବାର ପାର୍ଲାମେଣ୍ଟରେ ଝଡ଼ ଉଠିଛି। କଂଗ୍ରେସ ସମେତ ବିରୋଧୀ ଦଳଗୁଡ଼ିକ ଉଭୟ ଗୃହରେ କେନ୍ଦ୍ର ଓ ଉତ୍ତରପ୍ରଦେଶ ସରକାରଙ୍କୁ ଘେରିଛନ୍ତି। ପ୍ରବଳ ହଟ୍ଟଗୋଳ ମଧ୍ୟରେ ରାଜ୍ୟ ସଭାକୁ ଅଧଘଣ୍ଟା ପାଇଁ ମୁଲତବୀ କରାଯାଇଥିଲା। ଉଚ୍ଚ ସଦନରେ ଟିକସ ଆଇନ (ସଂଶୋଧନ) ବିଲ୍, ୨୦୧୯ ଆଲୋଚନା ଆରମ୍ଭ ହୋଇଥିବାବେଳେ ବିରୋଧୀ ସଦସ୍ୟ ଗୃହର ମଧ୍ୟଭାଗକୁ ଯାଇ ହୋହଲ୍ଲା କରିଥିଲେ। କଂଗ୍ରେସ ନେତା ଆନନ୍ଦ ଶର୍ମା ଉନ୍ନାଓ ପୀଡ଼ିତାଙ୍କ ସମ୍ପର୍କରେ ଆଲୋଚନା ଲାଗି ବିରୋଧୀଙ୍କ ଦାବି ଶୁଣିବା ପାଇଁ ଉପାଧ୍ୟକ୍ଷ ହରିବଂଶଙ୍କୁ ଅନୁରୋଧ କରିଥିଲେ। ହେଲେ ଉପାଧ୍ୟକ୍ଷ ସେମାନଙ୍କ ଦାବିକୁ ଗୁରୁତ୍ୱ ଦେଇ ନ ଥିଲେ। ସମାଜବାଦୀ ପାର୍ଟି ନେତା ରାମଗୋପାଳ ଯାଦବ ୟୁପିର ଆଇନଶୃଙ୍ଖଳା ସ୍ଥିତିକୁ ନେଇ ଯୋଗୀ ସରକାରଙ୍କୁ ଘେରିବା ସହ ରାଜ୍ୟରେ ରାଷ୍ଟ୍ରପତି ଶାସନ ଜାରି ପାଇଁ ଦାବି କରିଥିଲେ। ପରେ ରାଜ୍ୟ ସଭା ଅଧ୍ୟକ୍ଷ ଏମ୍. ଭେଙ୍କାୟା ନାଇଡ଼ୁ ମଧ୍ୟ ଏହାକୁ ନିନ୍ଦା କରିଥିଲେ। ସେ ଉତ୍ତରପ୍ରଦେଶ ମୁଖ୍ୟ ଶାସନ ସଚିବଙ୍କ ସହ ଏନେଇ ଆଲୋଚନା କରିଛନ୍ତି। ଅଭିଯୁକ୍ତମାନଙ୍କୁ ଗିରଫ କରାଯାଇଛି ବୋଲି ମୁଖ୍ୟ ଶାସନ ସଚିବ ତାଙ୍କୁ ଅବଗତ କରାଇଛନ୍ତି। ତେବେ କେବଳ ଗିରଫଦାରି ପର୍ଯ୍ୟାପ୍ତ ନୁହେଁ । ଏଭଳି ଘଟଣାରେ ତୁରନ୍ତ ତତ୍ପରତା ସହ ଏଭଳି କାର୍ଯ୍ୟାନୁଷ୍ଠାନ ନିଆଯିବା ଦରକାର ଯେପରି କି ସମାଜ ଓ ଦେଶକୁ ଏକ ସନ୍ଦେଶ ଯିବ ବୋଲି ନାଇଡ଼ୁ କହିଛନ୍ତି।