କଟକ ଅଫିସ,୨୦ା୪: ପାସ୍ ଦେଇଛି କମିଶନରେଟ ପୋଲିସ। ହେଲେ ପାସ୍ ଦେଖାଇଲେ ସୁଦ୍ଧା ପୋଲିସ ଛାଡ଼ୁନି। ଗାଡ଼ି ଅଟକାଉଛି, ଏପରି କି ଜରିମାନା ମଧ୍ୟ ଲଦୁଛି। ମାଲଗୋଦାମର ଜଣେ ବ୍ୟବସାୟୀ ପ୍ରୀତମ କୁମାର ସାହୁ ମଧୁପାଟଣା ଥାନାରେ ରବିବାର ସନ୍ଧ୍ୟାରେ ଏଭଳି ଅଭିଯୋଗ ଆଣିଛନ୍ତି। ଗୋଦାମ ଯିବା ପାଇଁ ତାଙ୍କ ନିକଟରେ ପାସ୍ ରହିଥିଲେ ସୁଦ୍ଧା ପୋଲିସ କାହିଁକି ଏଭଳି କାର୍ଯ୍ୟାନୁଷ୍ଠାନ ଗ୍ରହଣ କରୁଛି ବୋଲି ସେ ପ୍ରଶ୍ନ କରିଛନ୍ତି।
ଲକଡାଉନ ଯୋଗୁ ପ୍ରତ୍ୟେକ ଛକରେ ଜଗିଛି ପୋଲିସ। ବିନା କାରଣରେ ରାସ୍ତାକୁ ଆସିଲେ ପଚରାଉଚରା କରିବା ସହ ବାଇକ ଚାଳକଙ୍କ ଉପରେ ଜରିମାନା ଲଦୁଛି। ତେଣୁ କମିଶନରେଟ ପୋଲିସ ପକ୍ଷରୁ ଜରୁରିକାଳୀନ ସେବା ଯୋଗାଉଥିବା ବ୍ୟକ୍ତିବିଶେଷଙ୍କ ପାଇଁ ସ୍ବତନ୍ତ୍ର ପାସ୍ ବ୍ୟବସ୍ଥା କରାଯାଇଛି। ଇତିମଧ୍ୟରେ ମାଲଗୋଦାମର ବ୍ୟବସାୟୀମାନେ କଟକ ଡିସିପିଙ୍କଠାରୁ ପାସ୍ ସଂଗ୍ରହ କରିଛନ୍ତି। ହେଲେ ମାଲଗୋଦାମର ବ୍ୟବସାୟୀ ପ୍ରୀତମ ପାସ୍ ନେଇ ପ୍ରତ୍ୟେକ ଦିନ ଗୋଦାମକୁ ଯାଉଥିଲେ ସୁଦ୍ଧା ତାଙ୍କ ଉପରେ ଦୁଇଟି ପର୍ଯ୍ୟାୟରେ ୧୫୦୦ଟଙ୍କା ଫାଇନ କରିଛି ମଧୁପାଟଣା ଥାନା। ଗତ ୨୭ ତାରିଖରେ ୧୦୦୦ ଟଙ୍କା ଓ ଏପ୍ରିଲ ୧୩ରେ ୫୦୦ ଟଙ୍କାର ଇ-ଚାଲାଣ ତାଙ୍କ ନାମରେ କଟିଛି। ଗତ ୧୩ ତାରିଖରେ ପ୍ରୀତମଙ୍କ ବଡଭାଇ ଶୁଭମ ପାସ୍ ମିଳିଥିବା ବାଇକ୍ ନେଇ ଗୋଦାମକୁ ଯାଉଥିବାବେଳେ ତାଙ୍କୁ ପୋଲିସ ମଧୁପାଟଣା ଛକରେ ଅଟକାଇଥିଲା। ସେହି ସମୟରେ ସେଠାରେ ଅନ୍ୟ ବାଇକ ଚାଳକଙ୍କୁ ମଧ୍ୟ ପୋଲିସ ଅଟକାଇ ପଚରାଉଚରା କରୁଥିଲା। ଶୁଭମ ପାସ୍ ଦେଖାଇବାରୁ ଗାଡ଼ି ରଖିଦେଇ ଯାଅ, ଆଉ କିଛି ସମୟ ପରେ ଆସି ନେଇଯିବ ବୋଲି ଜଣେ ପୋଲିସ ଅଧିକାରୀ କହିଥିଲେ। ଶୁଭମ ଗାଡ଼ି ରଖି ଦେବା ସହ ପରଦିନ ଆସି ନେଇଥିଲେ। ହେଲେ ରବିବାର ଏମ୍ ପରିବହନ ଆପ୍ଲିକେଶନ ଜରିଆରେ ଯାଞ୍ଚ କରିବା ପରେ ପାସ୍ ଥିବା ଗାଡ଼ି ନାମରେ ମୋଟ ୧୫୦୦ ଟଙ୍କା ଇ-ଚାଲାଣ କଟିଛି ବୋଲି ସେ ଦେଖିବାକୁ ପାଇଥିଲେ। ପ୍ରୀତମ ଏ ସମ୍ପର୍କରେ ଥାନାକୁ ଯାଇ ପଚରାଉଚରା କରିବାରୁ ‘ଆମେ କିଛି ଜାଣିନାହୁଁ’ ବୋଲି ମଧୁପାଟଣା ଥାନାର ଜଣେ କର୍ମଚାରୀ କହିଥିବା ସେ ପ୍ରକାଶ କରିଛନ୍ତି। ଏ ନେଇ ଡିସିପି ଅଖିଳେଶ୍ୱର ସିଂ ଏବଂ ଟ୍ରାଫିକ ଥାନା ଏସିପି ଦିବ୍ୟଜ୍ୟୋତି ଦାସଙ୍କ ସହ ଯୋଗାଯୋଗ କରାଯାଇଥିଲେ ସୁଦ୍ଧା କୌଣସି ପ୍ରତିକ୍ରିୟା ମିଳିପାରିନାହିଁ।