ପାରାଦୀପ,୧୦ା୭(ସ୍ବ.ପ୍ର.): ପାରାଦୀପ ବନ୍ଦରରେ ୩୦ ବର୍ଷିୟା ଲିଜ୍ ନେଇଥିବା କମ୍ପାନୀ ପିଆଇସିଟି (ପାରାଦୀପ ଇଣ୍ଟରନ୍ୟାଶନାଲ କାର୍ଗୋ ଟର୍ମିନାଲ) ଆଗରେ ମଙ୍ଗଳବାର ୩୦୦ରୁ ଊର୍ଦ୍ଧ୍ୱ ଠିକା ଶ୍ରମିକ ବିକ୍ଷୋଭ ପ୍ରଦର୍ଶନ କରିଛନ୍ତି। ପିଆଇସିଟିରେ କାମ କରୁଥିବା କେଣ୍ଟକୋ ନାମକ ଠିକା ସଂସ୍ଥା ଅଧୀନରେ ସମ୍ପୃକ୍ତ ଶ୍ରମିକମାନେ କାମ କରନ୍ତି। ସେମାନଙ୍କୁ ୩ମାସ ହେଲା ଦରମା ମିଳି ନ ଥିବାରୁ ଏଭଳି ବିରୋଧ ପ୍ରଦର୍ଶନ କରିଥିବା କହିଛନ୍ତି। ଏପରି କି କେତେକ ଶ୍ରମିକଙ୍କୁ ମାସରେ ମାତ୍ର ୭ ରୁ ୧୦ ଦିନ କାମ ମିଳୁଛି। ଶ୍ରମିକଙ୍କ ସୁରକ୍ଷା ନିରାପତ୍ତା ଉପକରଣ ମିଳୁନାହିଁ। ଏହାର ପ୍ରତିବାଦ କରୁଥିବା ଶ୍ରମିକଙ୍କୁ କାମରୁ ବାହାର କରି ପୁଣି ଜଣଙ୍କୁ ନିଯୁକ୍ତ କରାଯାଉଛି ବୋଲି ଶ୍ରମିକ ନିରାକାର ବେହେରା କହିଛନ୍ତି। ଯେଉଁ ଠିକା ସଂସ୍ଥାର ଏହି କାମ ଚାଲିଛି, ସେଠାରେ ବାସ୍ତବରେ ଅତି ବେଶିରେ ୨୦୦ ଶ୍ରମିକ ରହିବା କଥା। କିନ୍ତୁ ୩୬୦ ଜଣଙ୍କୁ ନିଯୁକ୍ତି ଦିଆଯାଇଛି। ଯେଉଁମାନଙ୍କୁ ସେଠାରେ ଚାକିରି ମିଳିବ ବୋଲି କୁହାଯାଉଛି, ସେମାନଙ୍କଠାରୁ କେତେକ ଦଲାଲ ୨୦ରୁ ୫୦ ହଜାର ଟଙ୍କା ପର୍ଯ୍ୟନ୍ତ ନେଇଯାଉଛନ୍ତି। ସପ୍ତାହେ କାମ କଲେ ୧୦ଦିନ ବସିବାକୁ ପଡୁଛି ବୋଲି କହିଛନ୍ତି ଶ୍ରମିକ ବିକାଶ ସ୍ବାଇଁ। ମଙ୍ଗଳବାର ସାମୟିକ ଭାବେ ପ୍ରତିବାଦ ପ୍ରଦର୍ଶନ କରାଯାଇଛି। ଆଗାମୀ ଦିନରେ ଏହା ଉପରେ ସବୁ ଘଟଣାର ପର୍ଦ୍ଦାଫାଶ କରିବା ସହ ଧାରଣା ଦେବେ ବୋଲି ଶ୍ରମିକମାନେ କହିଛନ୍ତି। ଏ ସମ୍ପର୍କରେ ପିଆଇସିଟିର ମାନବ ସମ୍ବଳ ଅଧିକାରୀ କୁଳମଣି ପଣ୍ଡାଙ୍କୁ ପଚାରିବାରେ ସେ କହିଲେ ଯେ ବ୍ୟାଗିଂ ପ୍ଲାଣ୍ଟରେ ଅଳ୍ପ କେତେଜଣ ଲୋକ ଏପରି ମିଥ୍ୟା ଆରୋପ ଲଗାଇ ଏସବୁ କରିଛନ୍ତି। ସେମିତି କିଛି ଧାରଣା ବା ଆନ୍ଦୋଳନ ହୋଇନାହିଁ। ସମ୍ପୃକ୍ତ ଠିକାସଂସ୍ଥାର ସୁପରଭାଇଙ୍କୁ ଡାକି ଏ ବିଷୟରେ କୁହାଯାଇଛି ବୋଲି ସେ କହିଛନ୍ତି।