ଭୁବନେଶ୍ୱର,୧୦।୧୨(ବ୍ୟୁରୋ): ପିଆଜର ଦରଦାମ ବୃଦ୍ଧି ପ୍ରତିବାଦରେ ଛାତ୍ର କଂଗ୍ରେସ ପକ୍ଷରୁ ରାଜ୍ୟ ଖାଦ୍ୟ ଓ ଯୋଗାଣ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ବାଇଁଙ୍କ ସରକାରୀ ବାସଭବନ ଉପରେ ପିଆଜ ମାଡ଼ କରାଯାଇଛି। ମଙ୍ଗଳବାର କଂଗ୍ରେସର ଶତାଧିକ ଯୁବକର୍ମୀ ଏକ ରାଲିରେ କଂଗ୍ରେସ ଭବନରୁ ବାହାରିଥିଲେ। ବେକରେ ପିଆଜ ମାଳ ପକାଇ ସେମାନେ ଯୋଗାଣ ମନ୍ତ୍ରୀଙ୍କ ବାସଭବନ ଅଭିମୁଖେ ଗସ୍ତ କରି ନାରାବାଜି କରିଥିଲେ। ତେବେ ମନ୍ତ୍ରୀଙ୍କ ବାସଭବନକୁ ଯିବା ପୂର୍ବରୁ ପୋଲିସ ସେମାନଙ୍କୁ ଅଟକାଇଥିଲା। ଫଳରେ କେତେକ ଛାତ୍ର ନେତା ପିଆଜ ମାଡ଼ କରି ପ୍ରତିବାଦ କରୁଥିବା ଦେଖିବାକୁ ମିଳିଥିଲା।
ପ୍ରକାଶଯୋଗ୍ୟ, ପିଆଜ ଏବେ କିଲୋପିଛା ୧୦୦ରୁ ୧୫୦ ଟଙ୍କାରେ ବିକ୍ରି ହେଉଛି। ଫଳରେ ଉଭୟ ଖାଉଟି ଏବଂ ସରକାର ଚିନ୍ତାରେ। ଏଥିପାଇଁ ବିଭାଗୀୟ ମନ୍ତ୍ରୀଙ୍କ ଅଧ୍ୟକ୍ଷତାରେ ଘନ ଘନ ବୈଠକ ବସୁଥିବା ବେଳେ ଜାନୁୟାରୀରୁ ଦର ହ୍ରାସ ପାଇବା ନେଇ ମନ୍ତ୍ରୀ କହିଥିଲେ। ତେବେ ପୂର୍ବରୁ କଂଗ୍ରେସ ପକ୍ଷରୁ ପିଆଜ କିଲୋ ୪୦ଟଙ୍କାରେ ବିକ୍ରି କରାଯାଇ ଦରବୃଦ୍ଧିର ପ୍ରତିବାଦ କରାଯାଇଥିଲା।