ବାରିପଦା ଅଫିସ, ୪ା୨- ପଣ୍ଡିତ ରଘୁନାଥ ମୁର୍ମୁ (ପିଆରଏମ୍) ମେଡ଼ିକାଲ କଲେଜ ଓ ହସ୍ପିଟାଲରେ ବିପର୍ଯ୍ୟସ୍ଥ ସ୍ବାସ୍ଥ୍ୟସେବା ବିରୋଧରେ ସୋମବାର ଭଞ୍ଜସେନାର କାର୍ଯ୍ୟକର୍ତ୍ତା ଜିଲା ପ୍ରଶାସନ ଜରିଆରେ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଏକ ଦାବିପତ୍ର ପ୍ରଦାନ କରିଛନ୍ତି। ଲାଗି ରହିଥିବା ଅବ୍ୟବସ୍ଥାକୁ ସଜାଡ଼ିବା ଓ ସୁପରିଟେଣ୍ଡଙ୍କୁ ବହିଷ୍କାର କରିବା ଦାବିରେ ଏହି ଦାବିପତ୍ର ଅତିରିକ୍ତ ଜିଲାପାଳ ବ୍ରଜବନ୍ଧୁ ଭୋଳଙ୍କୁ ପ୍ରଦାନ କରିଛନ୍ତି। ଦାବିପତ୍ରରେ ଭଞ୍ଜସେନା ପକ୍ଷରୁ ଦର୍ଶାଯାଇଛି ଯେ, ବହୁ ଦାବି ପରେ ଜିଲା ମୁଖ୍ୟ ଚିକିତ୍ସାଳୟ ପଣ୍ଡିତ ରଘୁନାଥ ମୁର୍ମୁ ଓ ମେଡ଼ିକାଲ କଲେଜ ହେଲା। ବର୍ତ୍ତମାନ ଏହି ଡାକ୍ତରଖାନା ଉପରେ ଜିଲା ତଥା ଆଖପାଖ ପଡ଼ୋଶୀ ଜିଲାର ରୋଗୀମାନେ ସ୍ବାସ୍ଥ୍ୟସେବା ପାଇଁ ନିର୍ଭର କରୁଛନ୍ତି। ମାତ୍ର ଉତ୍ତମ ସ୍ବାସ୍ଥ୍ୟ ସେବା ମିଳିବା ବଦଳରେ ରୋଗୀମାନେ ହଇରାଣ ହେଉଛନ୍ତି। ସମୟସମୟରେ ଚିକିତ୍ସା ଅବହେଳାରୁ ରୋଗୀ ମୃତ୍ୟୁମୁଖରେ ମଧ୍ୟ ପଡୁଛନ୍ତି। ତେଣୁ ଆଗାମୀ ୧୫ ଦିନ ଭିତରେ ଏହି ମେଡିକାଲର ସୁପରିଟେଣ୍ଡେଣ୍ଟଙ୍କୁ ବହିଷ୍କାର କରିବା ପାଇଁ ସେନା ପକ୍ଷରୁ ଦାବି କରାଯାଇଛି। ଯଦି ଏହା ନ କରାଯାଏ ତାହେଲେ ସୁପରିଟେଣ୍ଡେଣ୍ଟଙ୍କୁ ହସ୍ପିଟାଲ ପରିସର ମଧ୍ୟକୁ ପଶିବା ପାଇଁ ଦିଆଯିବ ନାହିଁ ବୋଲି ସେନାର ସଭାପତି ପିଣ୍ଟୁ ମାଇତି ଏକ ପ୍ରେସ୍ ଇସ୍ତାହାରରେ ଜଣାଇଛନ୍ତି। ସେହିଭଳି ମେଡ଼ିକାଲରେ ୫-ଟି ଠିକ୍ ଭାବେ କାର୍ଯ୍ୟକ୍ଷମ କରା ନ ଯିବା ଭଳି ୩ ଦଫା ଦାବି ଉପସ୍ଥାପନ କରାଯାଇଛି। ଅନ୍ୟମାନଙ୍କ ମଧ୍ୟରେ ସେନାର ଯୁବ ଛାତ୍ର ସଂଯୋଜକ ରାକେଶ ବେହେରା, ମୁଖପାତ୍ର ଜ୍ୟୋତିରଞ୍ଜନ ପୃଷ୍ଟି, ସାଧାରଣ ସମ୍ପାଦକ ମାନସ ବେହେରା, ସହର ସଭାପତି ମନୋରଞ୍ଜନ ମିଶ୍ର, ସହର ଉପସଭାପତି ଏସ୍. କେ. ରାଜା ଖାନ, ଅମରଦୀପ ମହାନ୍ତ, ପଙ୍କଜ କରନ, ରାକେଶ ମହାନ୍ତି, ଦୀପକ ସିଂ ପ୍ରମୁଖ ଉପସ୍ଥିତ ଥିଲେ।