ଭୁବନେଶ୍ୱର,୧୫।୧୧(ବ୍ୟୁରୋ): ଯାଜପୁର ଜିଲା ହରିଦାସପୁର ପିଇଓ ସ୍ମିତାରାଣୀ ବିଶ୍ୱାଳଙ୍କ ରହସ୍ୟଜନକ ମୃତ୍ୟୁ ଘଟଣାକୁ ଆତ୍ମହତ୍ୟା ବୋଲି ଗୁରୁବାର ଗୃହ ରାଷ୍ଟ୍ରମନ୍ତ୍ରୀ ଦିବ୍ୟଶଙ୍କର ମିଶ୍ର ବିଧାନସଭାରେ କହିବାକୁ ନେଇ ପୁଣି ରାଜନୀତି ସରଗରମ। ଶୁକ୍ରବାର ଏକ ଖବରଦାତା ସମ୍ମିଳନୀ କରି ଭାଜପା ଏହାକୁ ନିନ୍ଦା କରିଛି। ସ୍ମିତାରାଣୀ ହତ୍ୟା ଏବଂ ବଳାତ୍କାର ଘଟଣାକୁ ଆତ୍ମହତ୍ୟାର ରୂପ ଦେବା ଲାଗି ଚାଲିଥିବା ଷଡ଼ଯନ୍ତ୍ର ଉପରେ ମନ୍ତ୍ରୀ ମୋହର ମାରିଥିବା ସେ କହିଛନ୍ତି। ଏହାଦ୍ୱାରା ଜଣେ କର୍ମଜୀବୀ ମହିଳାଙ୍କୁ ନ୍ୟାୟ ଦେବାକୁ ସରକାର ବିଫଳ ହୋଇଛନ୍ତି।
ସ୍ମିତାଙ୍କ ବାପା ଦେଇଥିବା ବୟାନ ମଧ୍ୟ ଚିନ୍ତାଜନକ। ଥାନାରେ ଅଭିଯୋଗ କରିବା ବଦଳରେ ଜଣେ ପୋଲିସ ଅଧିକାରୀ ତାଙ୍କ ଝିଅ ଆତ୍ମହତ୍ୟା କରିଛି ବୋଲି ଲେଖିବା ପାଇଁ ବାଧ୍ୟ କରିଥିଲେ ବୋଲି ସେ କହିଛନ୍ତି। ପୋଷ୍ଟମର୍ଟମ ରିପୋର୍ଟରେ ଶ୍ୱାସରୁଦ୍ଧ ହୋଇ ତାଙ୍କ ମୃତ୍ୟୁ ଘଟିଥିବା ବାହାରିଥିବା ବେଳେ ଗୃହରେ ମନ୍ତ୍ରୀ ରିପୋର୍ଟରେ ଆତ୍ମହତ୍ୟାଜନିତ ମୃତ୍ୟୁ ବୋଲି ଲେଖାଯାଇଥିବା କହିଛନ୍ତି। ସେ ଏହାକୁ କେଉଁ ସୁତ୍ରରୁ ଜାଣିଲେ ବୋଲି ଭାଜପା ପ୍ରଶ୍ନ କରିଛି।
ବିଧାନସଭାରେ ମୋସନ ଆସିବା ସହ ସିବିଆଇ ତଦନ୍ତ ପାଇଁ ରୁଲିଙ୍ଗ ହେବ ବୋଲି ଆଶା ରଖିଥିଲୁ। ହେଲେ କଂଗ୍ରେସ-ବିଜେଡି ଏକାଠି ହୋଇ ଘଟଣାର ଦିଗକୁ ବଦଳାଇଦେଲେ। ହେଲେ ଭାଜପା ତାର ଲଢ଼େଇ ଜାରି ରଖିବ। ତେବେ ରାଜ୍ୟ ସରକାର ଯାଜପୁର ଏସ୍ପି ଏବଂ ମହିଳା କମିଶନର ଅଧ୍ୟକ୍ଷାଙ୍କୁ ତୁରନ୍ତ ବହିଷ୍କାର କରନ୍ତୁ। ଏଥିସହ ଘଟଣାର ନିରପେକ୍ଷ ତଦନ୍ତ ପାଇଁ ସିବିଆଇକୁ ଦାୟିତ୍ୱ ହସ୍ତାନ୍ତର କରାଯାଉ ବୋଲି ଭାଜପା ଦାବି କରିଛି।