ପର୍ଲା, ୧୩।୧୨(ଡି.ଏନ.ଏ.)- ଖାସ୍କରି ଖରାଦିନେ ଲୋକ୍ ପାଏନ୍ ଲାଗି ଗୁଲ୍ଗୁଲା ହେବାର ଦେଖ୍ବାକେ ମିଲ୍ସି। ହେଲେ ଆଏଜ୍ ବି ଏନ୍ତା କେତେ ଗଁା ଅଛେ ଯେନ୍ଠାନେ ଲୋକ୍ ବରଷା ୪ ମାସକ ଛାଡ଼ିଦେଲେ ବଛରକୁତା ପିଇଲା ପାଏନ୍ ଲାଗି ଦହଗଁଜ୍ ହେଉଛନ୍। ଏନ୍ତା ଗୁଟେ ଉଦାହରନ୍ ଦେଖ୍ବାକେ ମିଲିଛେ କଳାହାଣ୍ଡି ଜିଲା ଧର୍ମଗଡ଼ ବ୍ଲକ ଛଞ୍ଚାଣବାହାଲି ପଁଚେତ୍ ଚନାମୁଣ୍ଡା ଗଁାରେ।
ସୂଚନା ଅନ୍ସାରେ ଚନାମୁଣ୍ଡା ଗଁାର ଲୋକ୍ ସଂଖ୍ୟା ପାଖାପାଖି ୭ଶହ। ଗଁାରେ ଲୁକ୍କର ପିଇଲା ପାଏନ୍ ସୁବିଧା ଲାଗି ୩ଟା ନଲ୍ଚୁଅଁା ରହିଛେ। ହେଲେ ୨ଟା ତିଆର ହେଲା ଦିନୁ ଅଚଲ ହେଇ ପଡ଼ିରହିଛେ। ଯେନ୍ ଗୁଟେ ନଲ୍ଚୁଅଁା ଚଲୁଛେ ସେଥ୍ରୁ ବଡ଼ାକଷ୍ଟେ ପାଏନ୍ ବାହାରୁଛେ। ଗଁାବାସୀକର ଅଭିଯୋଗକେ ଆଧାର କରି ପରଶାସନ ତରଫୁ ୨୦୧୭ ସାଲେ ଗଁାରେ ଗୁଟେ ସୋଲାର ନଲ୍ଚୁଅଁା ଥାପନ କରାଯାଇଥିଲା। ହେଲେ ସେଟା ବି ଦିନାକେତେ ଚଲ୍ଲା ଉତାରୁ ଅଚଲ ହେଇ ପଡ଼ିଛେ। ଏନ୍ତାଥି ଗଁାବାସୀ ପିଇଲା ପାଏନ୍ ଲାଗି ବଡ଼ା ଦହଗଁଜ୍ ହେଉଥିବାର ଦେଖ୍ବାକେ ମିଲୁଛେ। ଗଁାର ପିଲାଛୁଆ, ବୁଢ଼ାବୁଢ଼ିନୁ ବାଲଟି, ଗରା ଧରି ୨ କି.ମି. ଦୂରେ ଥିବାର ଗୁଟେ ନଲ୍ଚୁଅଁାରୁ ପାଏନ୍ ଦୁହାରୁଛନ୍। ଗଁାର କେତେ ଲୋକ୍ ମୋଟରସାଇକେଲ, ସାଇକେଲରେ ବି ପାଏନ୍ ଦୁହାରୁଥିବାର ଦେଖ୍ବାକେ ମିଲୁଛେ। ଶୀତ୍ ଦିନେ ଯଦି ପିଇଲା ପାଏନ୍ ଲାଗି ଏତେ ଗୁଲ୍ଗୁଲା ଖରା ଝାଉରେ ଗଁାବାସୀକର ଅବସ୍ତା କା’ଣା ହେବା ବଲି ସେମାନେ ପରଶାସନକେ ପ୍ରଶ୍ନ କରିଛନ୍। ଇ ଘଟନାକେ ନେଇ ଗଁାବାସୀକର ଭିତରେ ଦିନୁଦିନ୍କେ ଅସନ୍ତୋଷ ବଢ଼ତେଲ ଯାଉଛେ। ସେନ୍ତା ଯେତେ ଜଲ୍ଦି ହେବା ଗଁାବାସୀକର ଲାଗି ପିଇଲା ପାଏନ୍ର ବେବସ୍ତା କରାଯାଉ, ନାଇଁହେଲେ ଆଏବାର ଦିନେ ଆଂଦୋଲନ କରାଯିବା ବଲି ଗଁାର ଦୁର୍ଯ୍ୟଧନ ରଣା, ରାଜୀବ ନାଏକ, ପଦ୍ମିନୀ ନାଏକ, ମୁକୁନ୍ଦ ରଣା, ମଙ୍ଗଲ ରଣା, ହେମ କାଣ୍ଡ, ନିଲାଧର ରଣା, ମୋହନ କୋଟା ପରମୁଖ କହିଛନ୍। ଇ ବାବ୍ଦେ ଥାନୀଅ ସରପଁଚ୍ ବଳରାମ ପୂଝାରୀକୁଁ ପଚରାଲାରୁ ଗଁାରେ ଯେନ୍ଠାନେ ବି ନଲ୍ଚୁଅଁା କୁଡ଼ଲେ ପାଏନ୍ ନାଇଁ ବାହାରବାର। ସେଟା ଆମର ମୁଡ଼ଦୁଖା ହେଇଛେ ବଲି ସେ କହିଥିଲେ। ସେନ୍ତା ଇ ବାବ୍ଦେ ଧର୍ମଗଡ଼ ବିଡିଓ ଗୋପାଳ କୃଷ୍ଣ ମିଶ୍ରକୁଁ ପଚ୍ରାଲାରୁ ଇ ବାବ୍ଦେ ମୋର ପାସେ ସୂଚନା ନାଇଁଥାଇ। ଯେତେ ଜଲ୍ଦି ହେବା ଗଁାବାସୀକର ଲାଗି ପିଇଲା ପାଏନ୍ର ସୁବିଧା କରାଯିବା ବଲି ସେ କହିଥିଲେ।