ମୁମ୍ବାଇ,୨୫-୯: ଭାରତୀୟ ରିଜର୍ଭ ବ୍ୟାଙ୍କ(ଆର୍ବିଆଇ) ଆର୍ଥିକ ଅନୀୟମିତତା ଅଭିଯୋଗରେ ପଞ୍ଜାବ ଆଣ୍ଡ ମହାରାଷ୍ଟ୍ର କୋଅପରେଟିଭ ବ୍ୟାଙ୍କ ଲିମିଟେଡ(ପିଏମ୍ସି ବ୍ୟାଙ୍କ), ମୁମ୍ବାଇର ଦୈନନ୍ଦିନ କାର୍ଯ୍ୟ ଉପରେ ୬ ମାସ ପର୍ଯ୍ୟନ୍ତ କଟକଣା ଜାରି କରିଛି। କେନ୍ଦ୍ରୀୟ ବ୍ୟାଙ୍କର ନିର୍ଦ୍ଦେଶ ମୁତାବକ ବ୍ୟାଙ୍କ ଆକାଉଣ୍ଟଧାରୀମାନେ ନିଜ ଆକାଉଣ୍ଟରୁ ଦୈନିକ ମାତ୍ର ୧ହଜାର ଟଙ୍କା କାଢ଼ିପାରିବେ ବୋଲି ଆର୍ବିଆଇର ଚିଫ୍ ଜେନେରାଲ ମ୍ୟାନେଜର ଯୋଗେଶ ଦୟାଲ କହିଛନ୍ତି। ଏଥିସହିତ ବ୍ୟାଙ୍କ କୌଣସି ନୂଆ ଋଣ ଜାରି କରିପାରିବ ନାହିଁ। ଆର୍ବିଆଇର କଟକଣା ଜାରି ଖବର ପ୍ରଚାରିତ ହେବା ମାତ୍ରେ ପିଏମ୍ସି ବ୍ୟାଙ୍କର ମୁମ୍ବାଇରେ ଥିବା ପ୍ରତ୍ୟେକ ଶାଖାରେ ଗ୍ରାହକଙ୍କ ଭିଡ ପରିଲକ୍ଷିତ ହୋଇଛି। ପିଏମ୍ସି ବ୍ୟାଙ୍କର ଏକାଧିକ ରାଜ୍ୟରେ ଶାଖା ରହିଛି। ମହାରାଷ୍ଟ୍ର, ଦିଲ୍ଲୀ, କର୍ନାଟକ, ଗୋଆ, ଗୁଜରାଟ, ଆନ୍ଧ୍ରପ୍ରଦେଶ ଏବଂ ମଧ୍ୟପ୍ରଦେଶରେ ଶାଖା ରହିଛି। ୧୯୮୪ରେ ମୁମ୍ବାଇର ଏକ ଛୋଟିଆ ଘରେ ପ୍ରତିଷ୍ଠା ହୋଇଥିବା ଏହି ବ୍ୟାଙ୍କର ବର୍ତ୍ତମାନ ୬ ରାଜ୍ୟରେ ୧୩୭ ଶାଖା ରହିଛି।
ପିଏମ୍ସି ବ୍ୟାଙ୍କ ଅନୀୟମିତତା ମାମଲାରେ ଜଡିତ ଥିବା ଅଭିଯୋଗରେ ପ୍ରବର୍ତ୍ତନ ନିର୍ଦ୍ଦେଶାଳୟ(ଇଡି) ଏନ୍ସିପି ମୁଖ୍ୟ ଶରଦ ପାଓ୍ବାର, ତାଙ୍କ ପୁତୁରା ଅଜିତ ପାଓ୍ବାର ଓ ବ୍ୟାଙ୍କର ପୂର୍ବତନ ୭୦ ଅଧିକାରୀଙ୍କ ବିରୋଧରେ ଏତଲା ଦାଏର କରିଛି।