ଜଗତ୍ସିଂହପୁର ଅଫିସ,୧୦ା୨: ଜଗତ୍ସିଂହପୁର ଜିଲାରେ ପାଖାପାଖି ୧,୧୦,୦୦୦ ଲୋକଙ୍କୁ ପ୍ରଧାନମନ୍ତ୍ରୀ (ପିଏମ୍) କିଷାନ ଯୋଜନାରେ ସହାୟତା ରାଶି ପ୍ରଦାନ କରାଯାଇଛି। ଏଥିମଧ୍ୟରେ ହିତାଧିକାରୀଙ୍କୁ ୨,୦୦୦ ଟଙ୍କା ଲେଖାଏ ୪ଟି କିସ୍ତିରେ ୮,୦୦୦ ଟଙ୍କା ମିଳି ସାରିଲାଣି। କିନ୍ତୁ ଅନେକ ହିତାଧିକାରୀଙ୍କୁ କିଷାନ କ୍ରେଡିଟ୍ କାର୍ଡ (କେସିସି) ଦିଆଯାଇନାହିଁ। ଯେଉଁ କାରଣରୁ ପିଏମ୍ କିଷାନ ଯୋଜନାରେ ସହାୟତା ପାଇଥିବା ଚାଷୀଙ୍କୁ କେସିସିରେ ଋଣ ସହାୟତା ମିଳିପାରୁ ନାହିଁ। ଏନେଇ ଗତ ୮ରୁ ୨୩ ତାରିଖ ପର୍ଯ୍ୟନ୍ତ ସ୍ବତନ୍ତ୍ର ଅଭିଯାନ ମାଧ୍ୟମରେ ସମସ୍ତ ପିଏମ୍ କିଷାନ ହିତାଧିକାରୀଙ୍କୁ କେସିସି ଦିଆଯିବା ପାଇଁ ନିଷ୍ପତ୍ତି ନିଆଯାଇଛି। ରବିବାର ସ୍ଥାନୀୟ ଯୋଗଧାରୀସ୍ଥିତ ରିସେଟି ନୂଆ ବିଲ୍ଡିଂରେ ଅନୁଷ୍ଠିତ ଖବରଦାତା ସମ୍ମିଳନୀରେ ଏହା କୁହାଯାଇଛି। ଏଥିରେ ଏଲ୍ଡିଏମ୍ ସତୀଷ ପାତ୍ର ଓ ନାବାର୍ଡ ଜିଲା ଉନ୍ନୟନ ପରିଚାଳକ ବିଶ୍ୱଭୂଷଣ ମହାନ୍ତି ଯୋଗଦେଇ କହିଥିଲେ, କେସିସିରେ ସର୍ବାଧିକ ୩ ଲକ୍ଷ ଟଙ୍କା ପର୍ଯ୍ୟନ୍ତ ଋଣ ସହାୟତା ଯୋଗାଯାଇପାରେ। ଚାଷୀ ଠିକ ସମୟରେ ଋଣ ପରିଶୋଧ କରିଦେଲେ କେନ୍ଦ୍ର ସରକାର ମୋଟ ସୁଧର ୩% ରିହାତି ହିସାବ କରି ଫେରସ୍ତ କରିବା ବ୍ୟବସ୍ଥା ରହିଛି। ଏଥିସହ ରାଜ୍ୟ ସରକାର ମଧ୍ୟ ମଝିରେ ମଝିରେ ଛାଡ କରିଥାନ୍ତି। ତେଣୁ ଚାଷୀ ଏହାର ଫାଇଦା ଉଠାଇବା ଜରୁରୀ। ଯେଉଁମାନଙ୍କ କେସିସି କାର୍ଯ୍ୟକ୍ଷମ ନାହିଁ ସେମାନେ ଏହାକୁ କ୍ରୀୟାଶୀଳ କରିବାକୁ ପଡିବ। ମୋଟାମୋଟି ଭାବରେ ଚାଷୀ ଓ ଚାଷର ଉନ୍ନତି ପାଇଁ ସରକାର କେସିସି ଉପରେ ଗୁରୁତ୍ୱାରୋପ କରୁଛନ୍ତି ବୋଲି କୁହାଯାଇଥିଲା।