ନୂଆଦିଲ୍ଲୀ,୧୧ା୮ : ଜମ୍ମୁ-କଶ୍ମୀରରୁ ଅନୁଚ୍ଛେଦ ୩୭୦ ହଟିବାକୁ ନେଇ ଉତ୍ତେଜନା ଲାଗି ରହିଥିବାବେଳେ ପାକ୍ ଅଧିକୃତ କଶ୍ମୀର (ପିଓକେ)ରେ ଥିତ୍ବା ଆତଙ୍କବାଦୀ ଶିବିରଗୁଡିକ ପୁଣିଥରେ ସକ୍ରିୟ ହୋଇଉଠିଛନ୍ତି। ଅନ୍ତର୍ଜାତୀୟ ସୀମାକୁ ଲାଗି ରହିଥିବା ପିଓକେରେ ୧୨ରୁ ଅଧିକ ଆତଙ୍କବାଦୀ ଶିବିରକୁ ଇସ୍ଲାମାବାଦ ପୁନଃସକ୍ରିୟ କରାଇଥିବା ଜଣାପଡିଛି। ଆର୍ଥତ୍କ କାର୍ଯ୍ୟାନୁଷ୍ଠାନ ଟାସ୍କଫୋର୍ସ (ଏଫ୍ଏଟିଏଫ୍) ଆତଙ୍କବାଦୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ମେ ମାସକୁ ଡେଡ୍ଲାଇନ ଧାର୍ଯ୍ୟ କରିବା ପରେ ପିଓକେରୁ ଅଧିକାଂଶ ଆତଙ୍କବାଦୀ ଶିବିର ଶୂନ୍ୟ ହୋଇଯାଇଥିଲା। ଆତଙ୍କବାଦୀ ନେତାଙ୍କ ବିରୋଧରେ ଇସ୍ଲାମାବାଦ କାର୍ଯ୍ୟାନୁଷ୍ଠାନ ଗ୍ରହଣ କରିବା ପରେ ସେମାନେ ଅନ୍ୟତ୍ର ପଳାୟନ କରିଥିଲେ। ଏବେ କୋଟ୍ଲି, ରାଓ୍ବଲକୋଟ୍, ବାଗ୍ ଏବଂ ମୁଜାଫରାବାଦରେ ଆତଙ୍କବାଦୀମାନଙ୍କୁ ପାକ୍ ସେନା ସହାୟତା ଯୋଗାଇ ଦେଉଥିବାରୁ ଭାରତୀୟ ସୁରକ୍ଷାବଳ ହାଇଆଲର୍ଟରେ ରହିଛି।
ଭାରତରେ ପୁଲ୍ଓ୍ବାମା ଭଳି ଆକ୍ରମଣ ଘଟିଲେ ସେଥିପାଇଁ ଇସ୍ଲାମାବାଦ ଦାୟୀ ରହିବ ନାହିଁ ବୋଲି ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ୍ ଖାନ୍ ପାର୍ଲାମେଣ୍ଟର ମିଳିତ ଅଧିବେଶନରେ କହିଥିଲେ। ଇମ୍ରାନଙ୍କ ଏଭଳି ମନ୍ତବ୍ୟ ଆତଙ୍କବାଦୀଙ୍କୁ ଉତ୍ସାହିତ କରିଛି। ଜେଇଏମ୍, ଏଲ୍ଇଟି ଏବଂ ସେମାନଙ୍କୁ କରାୟତ୍ତ କରୁଥିବା ଆଇଏସ୍ଆଇ ସଂସ୍ଥା ଏବେ ସକ୍ରିୟ ହୋଇଉଠିଛନ୍ତି। ଗୋଇନ୍ଦା ରିପୋର୍ଟ ଅନୁଯାୟୀ, ମୁଜାଫରାବାଦର ଫଗୁସ୍ ଓ କୁନ୍ଦ ଶିବିରରେ ୧୫୦ରୁ ଊର୍ଦ୍ଧ୍ୱ ଆତଙ୍କବାଦୀ ଏକାଠି ହୋଇଛନ୍ତି। ସେଠାରେ ଆତଙ୍କବାଦୀ ପ୍ରଶିକ୍ଷଣ ଶିବିର ଚାଲିଛି। ଅନୁପ୍ରବେଶ ଲାଗି ସେମାନେ ଯୋଜନା କରୁଛନ୍ତି। ଜେଇଏମ୍ ମୁଖ୍ୟ ମାସୁଦ ଆଝାର୍ଙ୍କ ଭାଇ ଇବ୍ରାହିମ୍ ଅତହର ପିଓକେରେ ଅଛନ୍ତି। ସୀମା ସ୍ଥିତିନେଇ ଜାତୀୟ ସୁରକ୍ଷା ପରାମର୍ଶଦାତା ଅଜିତ୍ ଡୋଭାଲ ରାଜ୍ୟ ଡିଜିପି, ଆଇବି ନିର୍ଦ୍ଦେଶକ, ବରିଷ୍ଠ ଅଧିକାରୀ ଓ ସେନା ମୁଖ୍ୟଙ୍କ ସହ ଆଲୋଚନା କରିଥିବା ଜଣାପଡ଼ିଛି।