ମୁଜାଫରାବାଦ,୨୩ା୧୦: ପାକ୍-ଅଧିକୃତ କଶ୍ମୀର(ପିଓକେ)ରେ ଇସ୍ଲାମାବାଦର ବର୍ବରତା ସୀମା ଟିପିଛି। ପିଓକେ ରାଜଧାନୀ ମୁଜାଫରାବାଦରେ ମଙ୍ଗଳବାର ସ୍ବାଧୀନତା ସପକ୍ଷରେ ଆୟୋଜିତ ଏକ ଶୋଭାଯାତ୍ରା ବେଳେ ପୋଲିସ ଲାଠିମାଡ଼ କରିଛି। ଏଥିରେ ୨ ଜଣଙ୍କ ଜୀବନ ଯାଇଥିବାବେଳେ ୮୦ରୁ ଊର୍ଦ୍ଧ୍ୱ ଆହତ ହୋଇଛନ୍ତି।
ଅକ୍ଟୋବର ୨୨ରେ ପାକିସ୍ତାନୀ ସେନା ଜମ୍ମୁ-କଶ୍ମୀର ଉପରେ ଆକ୍ରମଣ କରି ଏହାର ଏକ ଅଂଶକୁ ଦଖଲ କରିଥିଲା, ଯାହାକୁ ପିଓକେ ବୋଲି କୁହାଯାଉଛି। ସେବେଠୁ ପିଓକେ ଏବଂ ଗିଲ୍ଗିଟ୍ ବାଲତିସ୍ତାନବାସୀ ପ୍ରତିବର୍ଷ ଅକ୍ଟୋବର ୨୨କୁ କଳାଦିବସ ଭାବେ ପାଳନ କରିଆସୁଛନ୍ତି। ଏହି ପରିପ୍ରେକ୍ଷୀରେ ମଙ୍ଗଳବାର ବିଭିନ୍ନ ରାଜନୈତିକ ଦଳ ପକ୍ଷରୁ ଅଲ୍ ଇଣ୍ଡିପେଣ୍ଡେଣ୍ଟ ପାର୍ଟିଜ୍ ଆଲାଏନ୍ସ (ଏଆଇପିଏ) ବ୍ୟାନରରେ ବିକ୍ଷୋଭ ପ୍ରଦର୍ଶନ କରାଯାଇଛି। ସମ୍ପୃକ୍ତ ଭୂଖଣ୍ଡକୁ ପାକିସ୍ତାନ କବଳରୁ ମୁକ୍ତ କରିବା ପାଇଁ ସ୍ଥାନୀୟ ଲୋକେ ମଙ୍ଗଳବାର ଶୋଭାଯାତ୍ରା କରୁଥିବାବେଳେ ପୋଲିସ ସେମାନଙ୍କୁ ଘଉଡ଼ାଇବାକୁ ଯାଇ ଲାଠି ଚଳାଇଛି। ଲାଠିମାଡ଼ରେ ୨ ବିକ୍ଷୋଭକାରୀଙ୍କ ମୃତ୍ୟୁ ଘଟିଥିବାବେଳେ ଶତାଧିକ ଲୋକ ଆହତ ହୋଇଛନ୍ତି। ଜଣେ ବିକ୍ଷୋଭକାରୀ କହିଛନ୍ତି, ଆମେ ଶାନ୍ତିପୂର୍ଣ୍ଣ ଭାବେ ୭୨ତମ ଆକ୍ରମଣ ଦିବସ ପାଳନ କରୁଥିଲୁ। ପୋଲିସ ଲୁହବୁହା ବାଷ୍ପ ପ୍ରୟୋଗ କରି ଲାଠିଚାର୍ଜ କରିଛି। ପ୍ରଶାସନ ଏପରି ଅଭିମୁଖ୍ୟ ଦେଖାଇଲେ ଆମେ କୌଣସି ସ୍ତରକୁ ବି ଯାଇପାରୁ। କାରଣ ଆମ ସ୍ବରକୁ ଶୁଣାଯାଉ ବୋଲି ଆମେ ଚାହୁଁ। ପ୍ରକାଶ ଯେ, ଗତବର୍ଷ ଅକ୍ଟୋବର ୨୨ରେ ମଧ୍ୟ ମୁଜାଫରାବାଦ, କୋଟ୍ଲି, ଗିଲ୍ଗିଟ, ରାଓ୍ବଲପିଣ୍ଡି ଓ ଅନ୍ୟ କେତେକ ଅଞ୍ଚଳରେ ଅନୁରୂପ ବିକ୍ଷୋଭ ପ୍ରଦର୍ଶନ କରାଯାଇଥିଲା।