ନୂଆଦିଲ୍ଲୀ, ୧୦ା୯ (ପି.ଟି.): ପାକିସ୍ତାନୀ ସେନାର ଅତ୍ୟାଚାର ଯୋଗୁ ପାକ୍ ଅଧିକୃତ କଶ୍ମୀର (ପିଓକେ)ରେ ବିଦ୍ରୋହର ନିଅଁା ଜଳିଛି। ସେଠାରେ ରହୁଥିବା ଲୋକେ ଖୋଲାଖୋଲି ଭାବେ ପାକିସ୍ତାନକୁ ବିରୋଧ କରିବା ସହ ରାଜରାସ୍ତାରେ ବିକ୍ଷୋଭ ପ୍ରଦର୍ଶନ କରିଛନ୍ତି। ଶହ ଶହ ବିକ୍ଷୋଭକାରୀ ପୋଲିସ ଉପରକୁ ଢେଲାମାଡ଼ କରିବା ସହ କେତେକ ଗାଡ଼ିରେ ନିଆଁ ଲଗାଇ ଦେଇଛନ୍ତି। ପରିସ୍ଥିତିକୁ ନିୟନ୍ତ୍ରଣ କରିବା ଲାଗି ପୋଲିସ ଲାଠିଚାଳନା କରିବାରୁ ପରିସ୍ଥିତି ବିସ୍ଫୋରକ ରୂପ ନେଇଥିଲା। ପାକ୍ ଅଧିକୃତ କଶ୍ମୀରରେ ପାକିସ୍ତାନୀ ସେନା ମାନବାଧିକାର ଉଲ୍ଲଂଘନ କରିବା ସହ ଅତ୍ୟାଚାର ଜାରି ରଖିଛି ବୋଲି ବିକ୍ଷୋଭକାରୀ ଅଭିଯୋଗ କରିଛନ୍ତି। ଏହା ତୁରନ୍ତ ବନ୍ଦ କରାଯିବା ଦରକାର ବୋଲି ପିଓକେବାସୀ ଦାବି କରିଛନ୍ତି। ବିଶ୍ୱ ସମୁଦାୟ ଏହା ଉପରେ ହସ୍ତକ୍ଷେପ ନ କଲେ ପରିସ୍ଥିତି ଉଗ୍ରରୂପ ଧାରଣ କରିବ ବୋଲି ଚେତାବନୀ ଦିଆଯାଇଛି।
ସୋସିଆଲ ମିଡିଆରେ ଏ ସମ୍ପର୍କିତ ଭିଡିଓ ଭାଇରାଲ ହେବାରେ ଲାଗିଛି। କଶ୍ମୀରରେ ଭାରତ ମାନବାଧିକାର ଉଲ୍ଲଂଘନ କରୁଛି ବୋଲି ପାକିସ୍ତାନ ଅଭିଯୋଗ କରିଆସୁଥିବାବେଳେ ପିଓକେ ସ୍ଥିତି ସବୁ ସତ ଲୋକଲୋଚନକୁ ଆଣିଛି। ପିଓକେର ବିକାଶ ପରିବର୍ତ୍ତେ ବିନାଶ ରଚିଛି। ବେଲୁଚିସ୍ତାନ ଭଳି ପିଓକେରେ ପାକ୍ ବିରୋଧୀ ଆନ୍ଦୋଳନ ବଢିବାରେ ଲାଗିଛି। ୩୭୦ ଧାରା ଉଚ୍ଛେଦ ପରେ ପିଓକେ ଦଖଲ ଲାଗି ଭାରତ ଚେତାବନୀ ଦେଇଥିବାବେଳେ ସେଠାରେ ପାକ୍ ସେନା ବିରୋଧୀ ପ୍ରଦର୍ଶନ ଭାରତକୁ ଖୋରାକ୍ ଯୋଗାଇଛି। ଜାତିସଂଘ ସାଧାରଣ ଅଧିବେଶନରେ ଭାରତ ଓ ପାକିସ୍ତାନର ପ୍ରଧାନମନ୍ତ୍ରୀ କଶ୍ମୀର ନେଇ ନିଜ ମତ ରଖିବାକୁ ଯାଉଛନ୍ତି। ଅନ୍ତର୍ଜାତୀୟ ମଞ୍ଚରେ କଶ୍ମୀରକୁ ନେଇ ପାକିସ୍ତାନ ପ୍ରସଙ୍ଗ କରିବାକୁ ଉଦ୍ୟମ କରୁଥିବାବେଳେ ପିଓକେବାସୀଙ୍କ ଉଗ୍ର ପ୍ରଦର୍ଶନ ଚିନ୍ତା ବଢାଇଦେଇଛି।