ନୂଆଦିଲ୍ଲୀ,୧୧ା୧(ପି.ଟି.): ପ୍ରାୟ ୩୦୦ ଆତଙ୍କବାଦୀ ଭାରତରେ ଅନୁପ୍ରବେଶ ଲାଗି ସୀମା ସେପଟେ ଅପେକ୍ଷା କରିଛନ୍ତି। ପାକ୍ ଅଧିକୃତ କଶ୍ମୀରରେ ୫୦ ଆଫଗାନ୍ ଆତଙ୍କବାଦୀଙ୍କ ସହ ଏମାନେ ଜେଇଏମ୍ ଆତଙ୍କବାଦୀ ଶିବିରରେ ପ୍ରଶିକ୍ଷଣ ନେଉଛନ୍ତି। ପାକିସ୍ତାନ ଗୋଇନ୍ଦା ସଂସ୍ଥା ଆଇଏସ୍ଆଇ ଓ ପାକ୍ସେନାର ସହଯୋଗକ୍ରମେ ଏହି ପ୍ରଶିକ୍ଷଣ ଚାଲିଛି। ପିଓକେରେ ଏବେ ପ୍ରାୟ ୫୦ ଆତଙ୍କବାଦୀ ଲଞ୍ଚ୍ପ୍ୟାଡ୍ ସକ୍ରିୟ ଥିବା ଜଣାପଡ଼ିଛି। ସୀମାକୁ ଲାଗିଥିବା ଜମ୍ମୁ-କଶ୍ମୀରର ନିଲମ୍, ଲିପା ଓ ଟଙ୍ଗଧର ଭ୍ୟାଲିରେ ଏହି ଆତଙ୍କବାଦୀ ଲଞ୍ଚ୍ପ୍ୟାଡ୍ ସବୁ ରହିଛି। ଭାରତୀୟ ଗୋଇନ୍ଦା ସଂସ୍ଥା ପକ୍ଷରୁ ସରକାରଙ୍କୁ ଦିଆଯାଇଥିବା ରିପୋର୍ଟରେ ଏଭଳି ଚାଞ୍ଚଲ୍ୟକର ତଥ୍ୟ ଦିଆଯାଇଛି।
ନିଲମ୍ ଭ୍ୟାଲିରେ ସେନା କାର୍ଯ୍ୟାନୁଷ୍ଠାନରେ ପ୍ରାୟ ୬ରୁ ୧୦ ପାକ୍ ସମର୍ଥତ୍ତ ଆତଙ୍କବାଦୀ ନିହତ ହେବାର ୩ ମାସ ପରେ ଏଭଳି ଚିତ୍ର ସାମ୍ନାକୁ ଆସିଛି। ଭାରତରେ ଅନୁପ୍ରବେଶ କରି ଏମାନେ ଜମ୍ମୁ-କଶ୍ମୀର ଏବଂ ଅନ୍ୟ ଗୁରୁତ୍ୱପୂର୍ଣ୍ଣ ସ୍ଥାନରେ ବଡ଼ ଆତଙ୍କବାଦୀ ଆକ୍ରମଣ କରିବାର ଆଶଙ୍କା ରହିଥିବା ଗୋଇନ୍ଦା ରିପୋର୍ଟରେ ସତର୍କ କରାଯାଇଛି। ସାଧାରଣତନ୍ତ୍ର ଦିବସ ପୂର୍ବରୁ ଏଭଳି ଗୋଇନ୍ଦା ରିପୋର୍ଟ ମିଳିବା ପରେ ସରକାର ପଦକ୍ଷେପ ଗ୍ରହଣ କରିଛନ୍ତି। ଭାରତର ବିଭିନ୍ନ ସହରରେ ଏଥିଲାଗି ହାଇଆଲର୍ଟ ଜାରି କରାଯାଇଛି। ବାଲାକୋଟ୍ ଏୟାର୍ଷ୍ଟାଇକ୍ ପରେ ‘ପିଓକେ’ର ଅନେକ ଆତଙ୍କବାଦୀ ଶିବିର ଭାରତ ଧ୍ୱଂସ କରିଥିବାବେଳେ ଏବେ ଏଗୁଡ଼ିକ ପୁଣି ସକ୍ରିୟ ହୋଇଉଠିଛି। କେରନ୍ ଓ ପୁଞ୍ଚ୍ ସେକ୍ଟର ନିକଟରେ ପାକ୍ କମାଣ୍ଡୋମାନେ ପ୍ରସ୍ତୁତ ହେଉଥିବା ଜଣାପଡ଼ିଛି। ଜେଇଏମ୍ ମୁଖ୍ୟ ମାସୁଦ ଆଝାରଙ୍କ ଭାଇ ମୁଫ୍ତି ରୌଫ୍ ଅସ୍ଗର ଭାରତରେ ଆକ୍ରମଣ କରିବା ଲାଗି ଯୋଜନା କରୁଥିବା ଗୋଇନ୍ଦା ରିପୋର୍ଟରୁ ପ୍ରକାଶ। ୩୭୦ ଅନୁଚ୍ଛେଦ ଉଠିଯିବା ପରେ ଏମାନେ ରକ୍ତମୁଖା ହୋଇପଡ଼ିଥିବା ଜଣାପଡ଼ିଛି।