Indore: Indian cricket team bowler Ishant Sharma during a practice session ahead of their first Test scheduled to start on November 14 against Bangladesh, in Indore, Tuesday, Nov. 12, 2019. (PTI Photo/Kamal Kishore) (PTI11_12_2019_000179B)
ଇନ୍ଦୋର, ୧୩।୧୧(ପି.ଟି.)-ଭାରତ ଓ ବାଂଲାଦେଶ ମଧ୍ୟରେ ପ୍ରଥମ କ୍ରିକେଟ ଟେଷ୍ଟ ଏଠାରେ ଗୁରୁବାରଠାରୁ ଆରମ୍ଭ ହେବ। ଏହାପରେ କଲିକତାର ଇଡେନ ଗାର୍ଡେନରେ ଦ୍ୱିତୀୟ ଟେଷ୍ଟ ୨୨ ତାରିଖରୁ ଖେଳାଯିବ। କୋଲକାତାରେ ଭାରତ ପ୍ରଥମଥରପାଇଁ ଦିବାରାତ୍ର ଟେଷ୍ଟ ଖେଳିବାକୁ ଯାଉଥିବାରୁ ଏଠାରେ ଉଭୟ ପିଙ୍କ୍ ଏବଂ ରେଡ୍ ବଲ୍ରେ ଅଭ୍ୟାସ କରିଛି। ନେଟ୍ସ ସେନନରେ ପ୍ରଥମେ ଅଧିନାୟକ ବିରାଟ କୋହଲି ପିଙ୍କ୍ ବଲ୍ରେ ପ୍ରାକ୍ଟିସ କରି ଅଭିଜ୍ଞତା ହାସଲ କରିଛନ୍ତି। ପରେ ଅନ୍ୟ ଖେଳାଳିମାନେ ମଧ୍ୟ ତାହା କରିଛନ୍ତି।
ଭାରତୀୟ ଦଳ ଫ୍ଲଡ୍ ଲାଇଟ୍ରେ ନେଟ୍ସ କରିନାହିଁ। ଦିନରେ ପାରମ୍ପରିକ ରେଡ୍ ବଲ୍ ଅଭ୍ୟାସ ସେସନରେ ସେମାନେ ଏସଜି ପିଙ୍କ୍ ବଲ୍ ଥ୍ରୋ କରି ଅଭ୍ୟାସ କରିଛନ୍ତି। ଭାରତୀୟ ଦଳର ଅଭ୍ୟାସ ପାଇଁ ଗ୍ରାଉଣ୍ଡରେ ତିନୋଟି ନେଟ୍ ଲଗାଯାଇଛି। ଗୋଟିଏ ଦ୍ରୁତ ବୋଲରଙ୍କ ପାଇଁ, ଗୋଟିଏ ସ୍ପିନରଙ୍କ ପାଇଁ ଏବଂ ଆଉ ଗୋଟିଏ ଥ୍ରୋ କରିବା ପାଇଁ। ଟିମ୍ ମ୍ୟାନେଜମେଣ୍ଟର ଅନୁରୋଧକ୍ରମେ ଥ୍ରୋଡାଉନ୍ ନେଟ୍କୁ ପଡ଼ିଆର ଅନ୍ୟ ଏକ ଦିଗରେ ଲଗା ଯାଇଛି। ସେଠାରେ ସ୍ବତନ୍ତ୍ର ପ୍ରାକ୍ଟିସ ଟର୍ଫ ଏବଂ କଳା ସାଇଟ୍-ସ୍କ୍ରିନ୍ ଲଗାଯାଇଛି। ଥ୍ରୋଡାଉନ୍ ସ୍ପେଶାଲିଷ୍ଟ ରାଘବେନ୍ଦ୍ର ଓ ଶ୍ରୀଲଙ୍କାର ନୂଆନ ସେନାଭିରନେତ୍ଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଭାରତୀୟ ଦଳର ନେଟ୍ସ ସେସନ ଅନୁଷ୍ଠିତ ହୋଇଛି। ଅଧିନାୟକ ବିରାଟ ଡିଫେନ୍ସିଭ୍ ଶଟ୍ ଖେଳିବାରେ ମନୋନିବେଶ କରିଥିଲେ ଏବଂ ପିଙ୍କ୍ ବଲ୍କୁ ସହଜରେ ଖେଳିଥିଲେ। ଯୁବ ରିଜର୍ଭ ଓପନର ଶୁବମନ ଗିଲ୍ ବାଉନ୍ସ ବଲ୍କୁ ହିଟ୍ କରିଥିଲେ। ପ୍ରଥମ ଟେଷ୍ଟ ପୂର୍ବରୁ ଭାରତ ଟ୍ରେନିଂ ପାଇଁ ମାତ୍ର ୨ ଦିନ ସମୟ ପାଇଛି। ହାତରେ ଅଧିକ ସମୟ ନ ଥିବାରୁ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ ପକ୍ଷରୁ ନ୍ୟାଶନାଲ କ୍ରିକେଟ ଏକାଡେମୀ(ଏନସିଏ)ରେ ରାହୁଲ ଡ୍ରାଭିଡ୍ଙ୍କ ତତ୍ତ୍ୱାବଧାନରେ ଅଜିଙ୍କ୍ୟ ରାହାନେ, ମୟଙ୍କ ଅଗ୍ରଓ୍ବାଲ, ଚେତେଶ୍ୱର ପୂଜାରା ଓ ମହମ୍ମଦ ସାମିଙ୍କ ପରି ଟେଷ୍ଟ ସ୍ପେଶାଲିଷ୍ଟଙ୍କ ପାଇଁ ଲାଇଟ୍ରେ ନେଟ୍ସର ବ୍ୟବସ୍ଥା କରାଯାଇଛି।
ନେଟ୍ସରେ ଭୁବନେଶ୍ୱର
ହାମଷ୍ଟ୍ରିଙ୍ଗ୍ ଇଞ୍ଜୁରି ଓ ସାଇଡ୍ ଷ୍ଟ୍ରେନ୍ରୁ ସୁସ୍ଥ ହୋଇଥିବା ଦ୍ରୁତ ବୋଲର ଭୁବନେଶ୍ୱର କୁମାର ଭାରତୀୟ ଦଳର ସ୍କିଲ୍ ସେସନରେ ଯୋଗଦେଇ ନିଜକୁ ପରୀକ୍ଷା କରିଛନ୍ତି। ଭୁବନେଶ୍ୱର ଏବେ ରିହାବିଲିଟେଶନର ଅନ୍ତିମ ପର୍ଯ୍ୟାୟରେ ପହଞ୍ଚତ୍ଛନ୍ତି। ତେଣୁ ସେ କେତେ ପରିମାଣରେ ସୁସ୍ଥ ହୋଇଛନ୍ତି ତାହା ଟିମ୍ ମ୍ୟାନେଜମେଣ୍ଟ ମଧ୍ୟ ପରୀକ୍ଷା କରିଛି। ଓ୍ବେଷ୍ଟଇଣ୍ଡିଜରେ ଅନୁଷ୍ଠିତ ଦିନିକିଆ କ୍ରିକେଟ ସିରିଜ ଅବସରରେ ଭୁବନେଶ୍ୱର ଆହତ ହୋଇଥିଲେ। ଏହାପରେ ସେ ଏନସିଏରେ ରିହାବିଲିଟେଶନ ପ୍ରୋଗ୍ରାମରେ ସାମିଲ ହୋଇଥିଲେ। ”ଭୁବି ସ୍କିଲ୍ ସେସନରେ ଭାଗ ନେବାକୁ ଏଠାକୁ ଆସିଛନ୍ତି। ସେ କେତେ ଫିଟ୍ ହୋଇଛନ୍ତି ତାହା ଟିମ୍ ମ୍ୟାନେଜମେଣ୍ଟ ଦେଖିବାକୁ ଚାହୁଁଛି“ ବୋଲି ଦଳୀୟ ସୂତ୍ରରୁ ପ୍ରକାଶ କରାଯାଇଛି। ଭୁବନେଶ୍ୱର ପ୍ରଥମେ ଫିଲ୍ଡିଂ କୋଚ୍ ଆର. ଶ୍ରୀଧରଙ୍କ ସହିତ କିଛି ସମୟ ଆଲୋଚନା କରିବାପରେ ନେଟ୍ସରେ କିଛି ସମୟ ପାଇଁ ଯୋଗ ଦେଇଥିଲେ। ସେ ଫୁଲ୍ ରନ୍-ଅପ୍ରେ କିଛି ବଲ୍ ପକାଇଥିଲେ ହେଁ ପୂରା ଫିଟ୍ ନ ଥିବା ଜଣା ପଡ଼ିଥିଳା। ଯଶପ୍ରୀତ ବୁମ୍ରାଙ୍କ ଉପରୁ କାର୍ଯ୍ୟଭର ହ୍ରାସ କରିବାପାଇଁ ମ୍ୟାନେଜମେଣ୍ଟ ଭୁବନେଶ୍ୱରଙ୍କ ଉପରେ ନଜର ରଖିଛି। ତେବେ ସେ ପୂରା ଫିଟ୍ ହେବାପରେ ଯାହାକିଛି ନିଷ୍ପତ୍ତି ନିଆଯାଇପାରିବ। ଭୁବନେଶ୍ୱରଙ୍କୁ ଫିଟ୍ କରାଇବା ପାଇଁ ଫିଜିଓ ନୀତୀନ ପଟେଲ ଓ ଟ୍ରେନର ନିକ୍ ଓ୍ବେବ୍ଙ୍କ ଭୂମିକା ମଧ୍ୟ ଗୁରୁତ୍ୱପୂର୍ଣ୍ଣ ରହିବ।