କୋଲକାତା,୨୪।୧୧(ପି.ଟି.)- ତୃତୀୟ ଦିବସରେ ଆଉ ମାତ୍ର ୪୭ ମିନିଟ୍ରେ ଭାରତ ଔପଚାରିକତା ପୂରଣ କରିଥିଲା। ପିଙ୍କ୍ ବଲ୍ରେ ଐତିହାସିକ ଇଡେନ ଗାର୍ଡେନ୍ସରେ ଖେଳାଯାଇଥିବା ଦିବାରାତ୍ର ଭିତ୍ତିକ ଦ୍ୱିତୀୟ ଟେଷ୍ଟ ମ୍ୟାଚ୍ରେ ବାକିଥିବା ୪ ଉଇକେକେଟ ଅକ୍ତିଆର କରି ଭାରତ ରବିବାର ବାଂଲାଦେଶକୁ ଏକ ଇନିଂସ ୪୬ ରନରେ ପରାସ୍ତ କରିଛି। ଏଥିସହିତ ଭାରତ ଘରୋଇ ମାଟିରେ କ୍ରମାଗତ ଦ୍ୱାଦଶ ସିରିଜ ବିଜୟ ହାସଲ କରି ରେକର୍ଡ କରିଛି। ଦ୍ୱିତୀୟ ଥର ପାଇଁ ଏହି ସିରିଜରେ ଭାରତ ୩ ଦିନ ମଧ୍ୟରେ ଇନିଂସ ବିଜୟ ହାସଲ କରିଛି। ବିରାଟ କୋହଲିଙ୍କ ନେତୃତ୍ୱରେ ଭାରତ ପ୍ରଥମଥର ପାଇଁ ଦିବାରାତ୍ର ଟେଷ୍ଟ ଖେଳି ବିଜୟୀ ହୋଇଛି। ଏଥିସିହିତ ୨ ମ୍ୟାଚ୍ ବିଶିଷ୍ଟ ଏହି ସିରିଜ୍ ରେ ଭାରତ ୨-୦ରେ ସିରିଜ କ୍ଲିନ୍ ସୁଇପ୍ କରିଛି। ପ୍ରଥମ ଇନିଂସରେ ୫ ଓ ଦ୍ୱିତୀୟ ଇନିଂସରେ ୪ ଉଇକେଟ ହାସଲ କରି ଭାରତୀୟ ଅଭିଜ୍ଞ ଦ୍ରୁତ ବୋଲର ଇଶାନ୍ତ ଶର୍ମା ପ୍ଲେୟାର ଅଫ୍ ଦି ମ୍ୟାଚ୍ ବିବେଚିତ ହୋଇଛନ୍ତି। ଦୁଇଟି ଯାକ ଟେଷ୍ଟରେ ପ୍ରଭାବୀ ପ୍ରଦର୍ଶନ କରି ସେ ପ୍ଲୟାର ଅଫ ଦି ସିରିଜ ମଧ୍ୟ ବିବେଚିତ ହୋଇଛନ୍ତି। ଏହି ବିଜୟ ସହ ଭାରତ ୬୦ ପଏଣ୍ଟ ହାସଲ କରିଛି। ଏଥିସହ ବିଶ୍ୱ ଟେଷ୍ଟ ଚାମ୍ପିୟନଶିପ୍ରେ ଭାରତ ୭ଟି ମ୍ୟାଚ୍ ଖେଳି ମୋଟ ୩୬୦ ପଏଣ୍ଟ ହାସଲ କରି ତା’ର ଶୀର୍ଷ ସ୍ଥାନକୁ ଆହୁରି ଦୃଢ଼ କରିଛି।
ଟସ୍ ଜିତି ବାଂଲାଦେଶ ପ୍ରଥମ ଇନିଂସରେ ୩୦.୩ ଓଭରରେ ୧୦୬ ରନ କରି ଅଲଆଉଟ ହୋଇଥିଲା। ଜବାବରେ ଭାରତ ପ୍ରଥମ ଇନିଂସ ଆରମ୍ଭ କରି ୮୯.୪ ଓଭରରେ ୯ ଉଇକେଟ ହରାଇ ୩୪୭ରନରେ ଇନିଂସ ଘୋଷଣା କରି ୨୪୧ ରନର ମହତ୍ତ୍ୱପୂର୍ଣ୍ଣ ଅଗ୍ରଣୀ ହାସଲ କରିଥିଲା। ଏହାପରେ ଦ୍ୱିତୀୟ ଇନିଂସ ଆରମ୍ଭ କରି ବାଂଲାଦେଲ ୪୧.୧ ଓଭରରେ ୧୯୫ ରନ କରି ଆଉଟ ହେବା ସହ ଇନିଂସ ପରାଜୟ ବରଣ କରିଛି।
ଅସମାପ୍ତ ଦ୍ୱିତୀୟ ଇନିଂସ ସ୍କୋର ୧୫୨/୬ରୁ ଖେଳ ଆରମ୍ଭ କରି ବାଂଲାଦେଶ ୪୬ ମିନିଟରେ ବାକି ୪ ଉଇକେଟ ହରାଇଥିଲା। ଓଭରନାଇଟ୍ ବ୍ୟାଟ୍ସମ୍ୟାନ ମୁସ୍ଫିକର ରହିମ ୫୯ ରନରୁ ଖେଳ ଆରମ୍ଭ କରି ୭୪ ରନର ଲଢୁଆ ଅର୍ଦ୍ଧଶତକୀୟ ପାଳି ଖେଳି ଉମେଶ ଯାଦବଙ୍କ ବଲ୍ରେ କଭରରେ ରବୀନ୍ଦ୍ର ଜାଡେଜାଙ୍କୁ କ୍ୟାଚ୍ ଦେଇ ଆଉଟ ହୋଇଥିଲେ। ତାଙ୍କ ପୂର୍ବରୁ ଇବାଦତ୍ ହୋସେନ ଖାତାଖୋଲିବା ପୂର୍ବରୁ ଉମେଶ ବଲ୍ରେ କୋହଲିଙ୍କୁ କ୍ୟାଚ୍ ଦେଇ ଆଉଟ ହୋଇଥିଲେ। ଶେଷ ଉଇକେଟ ଭାବେ ଅଲ ଅମିନ ହୋସେନ ୨୧ ରନ କରି ଉମେଶଙ୍କ ବଲ୍ ଉଇକେଟକିପର ରିଦ୍ଧିମାନ ଶାହାଙ୍କୁ କ୍ୟାଚ୍ ଦେଇ ପ୍ୟାଭିଲିୟନ ଫେରିଥିଲେ। ଆବୁ ଜାଏଦ ୨ ରନ କରି ଅପରାଜିତ ରହିଥିଲେ। ବୋଲିଂରେ ଭାରତ ତରଫରୁ ଉମେଶ ସର୍ବାଧିକ ୫, ଇଶାନ୍ତ ୪ ଉଇକେଟ ଅକ୍ତିଆର କରିଥିଲେ। ଶନିବାର ମହମୁଦୁଲ୍ଲା ୩୯ ରିଟାୟାର୍ଡ ହର୍ଟ ହୋଇଥିଲେ ଓ ବ୍ୟାଟିଂ କରିବାକୁ ଆସି ନ ଥିଲେ। ଏସ୍ଜି ପିଙ୍କ୍ ବଲ୍ରେ ଖେଳାଯାଇଥିବା ଏହି ମ୍ୟାଚ୍ରେ ପ୍ରଥମ ଇନିଂସରେ କୋହଲି ୧୩୬ ରନର ଶତକୀୟ ପାଳି ଖେଳି କ୍ୟାରିୟରର ୨୭ତମ ଟେଷ୍ଟ ଶତକ ହାସଲ କରିଥିଲେ ଓ ମୋଟ ଉପରେ ୭୦ତମ ଅନ୍ତର୍ଜାତୀୟ ଶତକ ଅର୍ଜନ କରିଥିଲେ। ବଲ୍ ଦୃଷ୍ଟିକୋଣରୁ ଦେଖିବାକୁ ଗଲେ ଭାରତ ଏହା ପୂର୍ବରୁ ଆଫଗାନିସ୍ତାନକୁ ହରାଇ ଦ୍ରୁତତମ ବିଜୟ ହାସଲ କରିଥିଲା। ଭାରତ ୧୦୨୮ଟି ବଲ୍ରେ ଆଫଗାନିସ୍ତାନକୁ ଏକ ଇନିଂସ ଓ ୨୬୨ ରନରେ ହରାଇଥିଲା। ଉଭୟ ଘରୋଇ ଓ ବିଦେଶୀ ପରିବେଶ୍ରେ ଭାରତ ପାଇଁ ଏହା କ୍ରମାଗତ ସପ୍ତମ ଟେଷ୍ଟ ବିଜୟ ସାବ୍ୟସ୍ତ ହୋଇଛି। ପୂର୍ବରୁ ଅନୁଷ୍ଠିତ ୩ ମ୍ୟାଚ୍ ବିଶିଷ୍ଟ ଟି୨୦ ସିରିଜରେ ଭାରତ ୨-୧ରେ ବିଜୟ ହାସଲ କରିଥିଲା।
ସଂକ୍ଷିପ୍ତ ସ୍କୋର:
ବାଂଲାଦେଶ ପ୍ରଥମ ଇନିଂସ- ୩୦.୩ ଓଭରରେ ୧୦୬ ଅଲଆଉଟ।
ଭାରତ ପ୍ରଥମ ଇନିଂସ- ୮୯.୪ ଓଭରରେ ୩୪୭/୯(ଇନିଂସ ଘୋଷଣା)।
ବାଂଲାଦେଶ ଦ୍ୱିତୀୟ ଇନିଂସ- ୪୧.୧ ଓଭରରେ ୧୯୫
(ମୁସ୍ଫିକର- ୭୪, ମହମୁଦୁଲ୍ଲା- ୩୯, ଅଲ- ଅମିନ ହୋସେନ- ୨୧, ଉମେଶ- ୫/୫୩, ଇଶାନ୍ତ- ୪/୫୬)।