ରାଇସୁଆଁ, ୨୦।୧(ଡି.ଏନ.ଏ.)-ସରକାର ଗରିବ ଅସହାୟଙ୍କ ଚିକିତ୍ସା ପାଇଁ ମାଗଣା ଯୋଜନା କରି ଚାଲିଛନ୍ତି। ମାତ୍ର ପ୍ରଶାସନିକ ସ୍ତରରେ ଆନ୍ତରିକତାର ଅଭାବ ଯୋଗୁଁ ବହୁ ଗରିବ ଏହି ଯୋଜନାରୁ ବଞ୍ଚିହେଉଛନ୍ତି। ଏହିପରି ଏକ ଘଟଣା ଦେଖିବାକୁ ମିଳିଛି କେନ୍ଦୁଝର ଜିଲା ବାଂଶପାଳ ବ୍ଲକ ଅନ୍ତର୍ଗତ ବିନିନ୍ଦା ଗ୍ରାମର ବିଶୁ ଦେହୁରୀ ଏବଂ ଶୁଶିଳା ଦେହୁରୀଙ୍କ ଦେଢବର୍ଷ ଶିଶୁଙ୍କ କ୍ଷେତ୍ରରେ। ଜନ୍ମବେଳେ ପିଠିରେ ଛୋଟ ଆବୁଟିଏ ହୋଇଥିବା ବେଳେ ଏହା ଧିରେ ଧିରେ ବଢିବା ସହ ଶିଶୁଟି ଯନ୍ତ୍ରଣାରେ ଛଟପଟ ହେବା ସହ ଖାଇବା ପିଇବା ମଧ୍ୟ ଠିକ ଭାବରେ କରୁ ନ ଥିବା ଦେଖିବାକୁ ମିଳିଛି। ପରିବାର ପକ୍ଷରୁ କୁହାଯାଇଛି କି ବହୁ ବାର କେନ୍ଦୁଝର ମୁଖ୍ୟ ଚିକିତ୍ସାଳୟକୁ ଚିକିତ୍ସାପାଇଁ ନେଇଥିଲେ ମଧ୍ୟ କେନ୍ଦୁଝରର ଡାକ୍ତରମାନେ ବଡବଡ ଡାକ୍ତରଖାନାକୁ ନେବାପାଇଁ ପାରାମର୍ଶ ଦେଇଛନ୍ତି। ମାତ୍ର ବାପାମା’ ଦିନମଜୁରିଆ ଭାବେ କାମଧନ୍ଦା କରିଚଳୁଥିବା ବେଳେ ଆର୍ଥିକ ଅନାଟନ ଯୋଗୁଁ ଶିଶୁଟିକୁ ବଡ ଡାକ୍ତରଖାନାକୁ ନେବାକୁ ଅକ୍ଷମତା ପ୍ରକାଶ କରିଛନ୍ତି। ସ୍ଥାନୀୟ ଜନସାଧାରଣ କହିଛନ୍ତି ଶିଶୁଟିର ଚିକିତ୍ସା ଶୀଘ୍ର ନ ହେଲେ ଆହୁରି ଗୁରୁତର ଅବସ୍ଥାକୁ ଚାଲିଯିବା ସୁନିଶ୍ଚିତ। ଜିଲାପ୍ରଶାସନ ଏବଂ ସ୍ବାସ୍ଥ୍ୟବିଭାଗ ତୁରନ୍ତ ଶିଶୁଟିକୁ ଚିକିତ୍ସା ଯୋଗାଇ ଦେବାକୁ ସ୍ଥାନୀୟ ଅଞ୍ଚଳର ବହୁ ଜନସାଧାରଣ ଜିଲାପ୍ରଶାସନ ନିକଟରେ ଦାବି କରିଛନ୍ତି।
