ଶଙ୍କରାଖୋଲ,୨୧ା୧୧(ଡି.ଏନ୍.ଏ.) – ଚକାପାଦ ବ୍ଲକ ଚାହାଳି ପଞ୍ଚାୟତରେ ହିତାଧିକାରୀ ୩ ମାସର ସାମଗ୍ରୀ ପାଇ ନ ଥିବା ଅଭିଯୋଗ ହୋଇଥିଲା। ସାମଗ୍ରୀ ହେରଫେର କରିଥିବା ନେଇ କାର୍ଯ୍ୟନିର୍ବାହୀ ଅଧିକାରୀ ସୂର୍ଯ୍ୟନାରାୟଣ ସାହୁ ଓ ଯୋଗାଣ ସହାୟକ ସାରଥୀ କହଁରଙ୍କ ନାମରେ ଚକାପାଦ ଥାନାରେ ବିଡିଓ ଅନିଲ କୁମାର ପଟ୍ଟନାୟକ ଏତଲା ଦେଇଛନ୍ତି। ପ୍ରକାଶ ଯେ, ସରକାରଙ୍କ ନିର୍ଦ୍ଦେଶ ପ୍ରକାରେ ଆଗୁଆ ୩ ମାସର ପିଡିଏସ୍ ସାମଗ୍ରୀ ଦେବାର ନିୟମ ରହିଛି। ଉକ୍ତ ପଞ୍ଚାୟତର ୫ଟି ଓ୍ବାର୍ଡର ହିତାଧିକାରୀ ସାମଗ୍ରୀ ପାଇ ନ ଥିବା ବିଡିଓଙ୍କୁ ଅଭିଯୋଗ କରିଥିଲେ। ବୁଧବାର ବିଡିଓ ପଟ୍ଟନାୟକ ଓ ଯୋଗାଣ ନିରୀକ୍ଷକ ମଳୟ କୁମାର ବେହେରା ଉକ୍ତ ପଞ୍ଚାୟତକୁ ଯାଇ ତଦନ୍ତ କରିଥିଲେ। ପିଡିଏସ୍ ସାମଗ୍ରୀ ସହ ୨ଲକ୍ଷ ୯୨ହଜାର ୮୧୨ଟଙ୍କା ଜମା ପାଣ୍ଠିରୁ ହେରଫେର ହୋଇଥିବାବେଳେ ୨୨ ରାଶନ କାର୍ଡରେ ହିତାଧିକାରୀଙ୍କୁ ସାମଗ୍ରୀ ଦିଆ ଯାଇ ନ ଥିବା ଜଣାପଡିଥିଲା। ଏହାପରେ ବିଡିଓ ପଟ୍ଟନାୟକ ଉଭୟଙ୍କ ନାମରେ ଥାନାରେ ଏତଲା ଦେଇଥିଲେ।
