ବୌଦ୍ଧ,୭ା୬(ସ୍ବ.ପ୍ର.): ବୌଦ୍ଧ ସହର ନିକଟବର୍ତ୍ତୀ ମୁରୁଷୁଣ୍ଡି ପଞ୍ଚାୟତର ସରଣ୍ଡା ଗ୍ରାମରେ ପିତାଙ୍କୁ ହତ୍ୟା ଅଭିଯୋଗରେ ପୁଅ ଅଟକ ଥିବା ଜଣାପଡ଼ିଛି। ମିଳିଥିବା ସୂଚନା ଅନୁଯାୟୀ, ଗୁରୁବାର ବିଳମ୍ବିତ ରାତିରେ ସଦାଶିବ ପାତ୍ର (୪୫) ପ୍ରଚୁର ମଦ୍ୟପାନ କରି ଘରକୁ ଫେରିବା ପରେ ଗୋଟିଏ ଛୁରୀ ଧରି ସ୍ତ୍ରୀ ଯଶୋବନ୍ତୀ ଏବଂ ପୁଅ ଆଶିଷ(୧୯)ଙ୍କ ସହ ଝଗଡ଼ା କରିଥିଲେ। ଏନେଇ ପିତାପୁତ୍ରଙ୍କ ମଧ୍ୟରେ ମାଡପିଟ୍ ଲାଗିଥିଲା। ଫଳରେ ସଦାଶିବ ତଳେ ପଡ଼ିଯାଇଥିଲେ। ସେହି ସମୟରେ ସେ ହାତରେ ଧରିଥିବା ଛୁରୀଟି ତାଙ୍କ ବେକରେ ପଶିଯାଇଥିବା ସ୍ତ୍ରୀ ଯଶୋବନ୍ତୀ ପ୍ରକାଶ କରିଛନ୍ତି। ଶୁକ୍ରବାର ସକାଳୁ ବୌଦ୍ଧ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ତଦନ୍ତ ପରେ ସମସ୍ତ ସତ୍ୟାସତ୍ୟ ଜଣାପଡ଼ିବ ବୋଲି ପୋଲିସ କହିଛି।