ପୋଚେଫଷ୍ଟ୍ରୁମ,୨୯।୧: ଚଳିତ ଅଣ୍ଡର୍-୧୯ ବିଶ୍ୱକପରେ ଡିଫେଣ୍ଡିଂ ଚାମ୍ପିୟନ ଭାରତ ତା’ର ଦମଦାର ପ୍ରଦର୍ଶନ ଜାରି ରଖି ଟୁର୍ଣ୍ଣାମେଣ୍ଟର ସେମିଫାଇନାଲରେ ସ୍ଥାନ ପକ୍କା କରିନେଇଛି। ଭାରତ ସୁପର୍ ଲିଗ କ୍ୱାର୍ଟରଫାଇନାଲ ମୁକାବିଲାରେ ଶକ୍ତିଶାଳୀ ଅଷ୍ଟ୍ରେଲିଆକୁ ୭୪ ରନରେ ହରାଇ କ୍ରମାଗାତ ତୃତୀୟଥର ଅନ୍ତିମ-୪ରେ ପହଞ୍ଚିଛି। ବୋଲିଂ ପାଇଁ ଅନୁକୂଳ ସେନୱେସ ପାର୍କରେ ଟସ୍ ହାରି ପ୍ରଥମେ ବ୍ୟାଟିଂ କରିଥିବା ଭାରତ ନିର୍ଦ୍ଧାରିତ ୫୦ ଓଭରରେ ୯ ଉଇକେଟ ହରାଇ ୨୩୩ ରନ କରିଥିଲା। ଜବାବରେ ସାମ ଫେନିଙ୍ଗ (୭୫)ଙ୍କ ଲୁଆ ଇନିଂସ ସତ୍ତ୍ୱେ ଅଷ୍ଟ୍ରେଲିଆ ୪୩.୩ ଓଭରରେ ସମସ୍ତ ଉଇକେଟ ହରାଇ ୧୫୯ ରନ କରି ପରାସ୍ତ ହୋଇଛି। ଭାରତ ପକ୍ଷରୁ କାର୍ତ୍ତିକ ତ୍ୟାଗି ୨୪ ରନ ଦେଇ ୪ଟି ଉଇକେଟ ନେଇ ମ୍ୟାନ୍ ଅଫ୍ ଦ ମ୍ୟାଚ୍ ବିବେଚିତ ହୋଇଥିଲେ। କିନ୍ତୁ ଖୁବ୍ କମ୍ ଲୋକ ଜାଣନ୍ତି ୧୭ବର୍ଷୀୟ କାର୍ତ୍ତିକ ଦିନେ ପିତାଙ୍କ ସହ ଜମିରେ କୃଷି କାମ କରୁଥିଲେ। କ୍ରିକେଟ ଖେଳରେ ରୁଚି ରଖିଥିବାରୁ ସେ ବେଳେବେଳେ ପ୍ରାକ୍ଟିସ କରୁଥିଲେ। ପୁଅକୁ ଟ୍ରେନିଂ ଦେବା ପାଇଁ ପିତାଙ୍କ ପାଖରେ ଅର୍ଥର ଅଭାବ ଥିଲା। କିନ୍ତୁ ସେ ଶ୍ରମିକ ଭାବେ କାର୍ଯ୍ୟକରି ପୁଅକୁ କ୍ରିକେଟ ଟ୍ରେନିଂ ଦେଇଥିଲେ। ପିତାଙ୍କ ସଂଘର୍ଷର ଫଳ ସେତେବେଳେ ମିଳିଥିଲା ଯେତେବେଳେ କାର୍ତ୍ତିକ କୁଚ ବିହାରୀ ଟ୍ରଫିରେ ଭଲ ପ୍ରଦର୍ଶନ କରି ଉତ୍ତର ପ୍ରଦେଶ ରଣଜୀ ଦଳରେ ସ୍ଥାନ ପାଇଥିଲେ। ପରେ ସେ ଅଣ୍ଡର-୧୯ ଭାରତୀୟ ଦଳରେ ସ୍ଥାନ ପାଇଁ ବିଶ୍ୱକପ୍ ଦଳରେ ସାମିଲ ହୋଇଥିଲା। ଏଥିପାଇଁ ଅନେକ ସଘର୍ଷ କରିବାକୁ ପଡିଛି, ମୋ ଯୋଗୁ ଏହା ସମ୍ଭବ ହୋଇଛି ବୋଲି କାର୍ତ୍ତିକ କହିଛନ୍ତି।