ଆନନ୍ଦପୁର,୨୭। ୬(ସ୍ବ.ପ୍ର.)- କେନ୍ଦୁଝର ଜିଲା ଆନନ୍ଦପୁର ଅତିରିକ୍ତ ଜିଲା ଦୌରାଜଜ୍ ରାଜେଶ ଦାଶ ୨୦୧୬ ମସିହାରେ ଘଟିଯାଇଥିବା ଏକ ହତ୍ୟା ମାମଲାର ବିଚାର କରି ପିତୃହନ୍ତା ପୁତ୍ରକୁ ଆଜୀବନ କାରାଦଣ୍ଡର ରାୟ ଶୁଣାଇଛନ୍ତି। ଆନନ୍ଦପୁର ଥାନା ଅନ୍ତର୍ଗତ ବଞ୍ଚୋ ଗ୍ରାମର ଦେବକାନ୍ତ ରାଉତ(୪୬) ନିଜ ବାପା ନାରାୟଣ ରାଉତଙ୍କୁ ୨୦୧୬ ମସିହା ଜୁନ ୨୩ ତାରିଖ ସନ୍ଧ୍ୟା ସମୟରେ କୁରାଢୀରେ ହାଣି ହତ୍ୟା କରିଥିଲେ।
ଘଟଣା ଦିନ ଦେବକାନ୍ତ ବଞ୍ଚୋ ଛକରେ ରହୁଥିବା ବାପାଙ୍କ ପାଖକୁ ଆସୁ ୨୦ ହଜାର ଟଙ୍କା ମାଗିଥିଲା ଏବଂ ମାଆଙ୍କ ସହିତ ଝଗଡା କରିଥିଲା। ମା’ଙ୍କଠାରୁ ଆଲମିରାର ଚାବିକାଠି ଛଡେଇ ନେଇ ଟଙ୍କା, ସୁନା ରୁପା ଗହଣା ଆଦି ନେଇଯାଉଥିବାବେଳେ ବାପା ନାରାୟଣ ଏହାର ବିରୋଧ କରିଥିଲେ। ଫଳରେ ଉତ୍ତ୍ୟକ୍ତ ହୋଇ ଦେବକାନ୍ତ ସାଥିରେ ଆଣିଥିବା ଏକ ଧାରୁଆ କୁରାଢୀରେ ତାଙ୍କ ବାପା ନାରାୟଣଙ୍କୁ ଆଘାତ କରିଥିଲେ। ଫଳରେ ନାରାୟଣଙ୍କ ଡାହାଣପାଖ ମୁଣ୍ଡରେ ଗଭୀର ଆଘାତ ଲାଗିଥିଲା ଓ ସେ ଗୁରୁତର ହୋଇପଡିଥିଲେ। ଭୁବନେଶ୍ୱରସ୍ଥିତ ଏକ ଘରୋଇ ଡାକ୍ତରଖାନାରେ ଚିକିତ୍ସିତ ହେଉଥିବାବେଳେ ୨୦୧୬ ମସିହା ଜୁନ ୨୮ ତାରିଖରେ ତାଙ୍କର ମୃତ୍ୟୁ ହୋଇଥିଲା। ମା’ ତିଳୋତ୍ତମାଙ୍କ ଏତଲା ଅନୁଯାୟୀ ଆନନ୍ଦପୁର ଥାନାରେ ଏକ ମାମଲା (ନଂ.୧୦୬/୨୬.୬.୨୦୧୬) ରୁଜୁ କରାଯାଇଥିଲା। ମାନ୍ୟବର ଅତିରିକ୍ତ ଜିଲା ଦୌରାଜଜ୍ ଏସ.ଟି. କେସ୍ ନଂ ୫୩/୨୦୧୯/୨୦୧୭/୧୬ରେ ଭାରତୀୟ ଦଣ୍ଡବିଧି ଆଇନର ୪୫୦ ଦଫା ଅନୁଯାୟୀ ୧୦ ବର୍ଷ ଜେଲ ଦଣ୍ଡ ଓ ୨୦ ହଜାର ଟଙ୍କା ଜରିମାନା କରିଥିବାବେଳେ ଜରିମାନା ଅନାଦେୟ ଅଧିକ ୧ ବର୍ଷ କାରାଦଣ୍ଡରେ ଦଣ୍ଡିତ କରିଥିଲେ। ଅନ୍ୟପକ୍ଷେ ଭାରତୀୟ ଦଣ୍ଡବିଧି ଆଇନର ୩୦୨ ଦଫା ଅନୁଯାୟୀ ଅଭିଯୁକ୍ତ ଦେବକାନ୍ତଙ୍କୁ ଆଜୀବନ କାରାଦଣ୍ଡ ଓ ୨୦ ହଜାର ଟଙ୍କା ଜରିମାନା ଏବଂ ଜରିମାନା ଅନାଦେୟ ଅଧିକ ଏକ ବର୍ଷ ଜେଲଦଣ୍ଡରେ ଦଣ୍ଡିତ କରିଛନ୍ତି। ସରକାରଙ୍କ ପକ୍ଷରୁ ଆଇନଜୀବୀ ମହେନ୍ଦ୍ର ମହାପାତ୍ର ଏହି ମାମଲାର ପରିଚାଳନା କରୁଥିଲେ।
