ପିପିଲି,୧୧ା୫(ଡି.ଏନ.ଏ): ରାଜ୍ୟରେ କରୋନା ଆକ୍ରାନ୍ତ ସଂଖ୍ୟା ଦିନକୁ ଦିନ ବୃଦ୍ଧି ପାଉଥିବାବେଳେ ପିପିଲି ଅଞ୍ଚଳରେ ଲୋକମାନେ ସାମାଜିକ ଦୂରତ୍ୱକୁ ମାନୁ ନ ଥିତ୍ବାବେଳେ ବିନା ମାସ୍କରେ ବୁଲୁଛନ୍ତି। ତୃତୀୟ ପର୍ଯ୍ୟାୟ ତାଲା ବନ୍ଦ ନିୟମରେ ପ୍ରଶାସନ କେତେକାଂଶରେ କଟକଣାକୁ କୋହଳ କରିଛନ୍ତି। ପ୍ରଚଳିତ ନିୟମ ମୁତାବକ, ସକାଳ ୭ରୁ ସନ୍ଧ୍ୟା ୭ଟା ଯାଏଁ ସମସ୍ତ ଦୋକାନ ବଜାର ଖୋଲା ରହୁଛି। ଅନ୍ୟ ସବୁ ବନ୍ଦ ଥିବାବେଳେ ଦୋକାନ ବଜାର ଖୋଲିବା ଦିନଠାରୁ ଭିଡ଼ ରହୁଥିବାବେଳେ ଗ୍ରାହକ ଏବଂ ଦୋକାନୀମାନଙ୍କ ମଧ୍ୟରେ ସାମାଜିକ ଦୂରତ୍ୱ ରହୁନି। ସ୍ଥାନୀୟ ପୋଲିସ ପକ୍ଷରୁ ବଜାର ଅଞ୍ଚଳରେ ଡାକବାଜି ଯନ୍ତ୍ର ଯୋଗେ ବ୍ୟବସାୟୀଙ୍କୁ ସାମାଜିକ ଦୂରତ୍ୱ ପାଳନ କରିବା, ବିନା ମାସ୍କରେ ନ ବାହାରିବା ପାଇଁ ଲୋକଙ୍କୁ ସଚେତନ କରାଯାଉ ଥିଲେ ମଧ୍ୟ ଅନେକେ ଏହାକୁ ବେଖାତିର କରୁଥିବାର ଦେଖିବାକୁ ମିଳୁଛି। ଆଇନ ଅବମାନନା ହେତୁ ଲୋକମାନେ ଜରିମାନା ଦେଉଥିଲେ ମଧ୍ୟ ସୁଧୁରୁ ନାହାନ୍ତି। ପୋଲିସ ବିଭିନ୍ନ ସ୍ଥାନରେ ବାହାରେ ଛେପ ନ ପକାଇବା, ମାସ୍କ ପିନ୍ଧିବା, ସାମାଜିକ ଦୂରତ୍ୱ ପାଳନ କରିବା ଆଦି ସଚେତନ ବାର୍ତ୍ତା ଲେଖାଥିବା ଫ୍ଲେକ୍ସ ପୋଷ୍ଟର ଲଗାଇଛି। ସନ୍ଧ୍ୟା ୭ଟା ହେଲେ ପୋଲିସ ବଜାର ଅଞ୍ଚଳରେ ପାଟ୍ରୋଲିଂ କରି ଦୋକାନୀ, ଗ୍ରାହକଙ୍କୁ ସଚେତନ କରାଉଛି। ଏଭଳି କ୍ଷେତ୍ରରେ ଯାଞ୍ଚକୁ ଆହୁରି ଅଧିକ କଡାକଡି କରାଯିବା ଜରୁରୀ ବୋଲି ସାଧାରଣରେ ମତ ପ୍ରକାଶ ପାଇଛି।
