ଭୁବନେଶ୍ୱର,୧୦ା୬(ବ୍ୟୁରୋ): ଚିହ୍ନଟ ହୋଇଥିବା ମାଇକ୍ରୋ ପ୍ରୋଜେକ୍ଟ ଅଞ୍ଚଳର ୮୮୮ଟି ଗ୍ରାମକୁ ନୂତନ ପିଭିଟିଜି (ଦୁର୍ବଳ ତଥା ଅନୁନ୍ନତ ଶ୍ରେଣୀର ଜନଜାତି ଗୋଷ୍ଠୀ) ଗ୍ରାମଭାବେ ରାଜ୍ୟ ସରକାର ସ୍ବୀକୃତି ଦେଇଛନ୍ତି। ଏହାସହ ପ୍ରାଚୀନ ଜନଜାତିଙ୍କ ସର୍ବାଙ୍ଗୀନ ବିକାଶ ନିମନ୍ତେ ଢେଙ୍କାନାଳ, ଯାଜପୁର ଓ କେନ୍ଦୁଝରଠାରେ ୩ଟି ନୂତନ ମାଇକ୍ରୋ ପ୍ରୋଜେକ୍ଟ ପ୍ରତିଷ୍ଠା କରାଯାଇଛି।
ଅନୁସୂଚିତ ଜନଜାତିଙ୍କ ମଧ୍ୟରେ ପ୍ରାଚୀନ ଜନଜାତି ଗୋଷ୍ଠୀ ଆର୍ଥିକ ଏବଂ ସାମାଜିକଭାବେ ଅନୁନ୍ନତ ତଥା ଦୁର୍ବଳ ଶ୍ରେଣୀରେ ରହିଛନ୍ତି। ଭାରତରେ ଚିହ୍ନଟ ୭୫ ପ୍ରାଚୀନ ଜନଜାତି ଗୋଷ୍ଠୀଙ୍କ ମଧ୍ୟରୁ ୧୩ ପିଭିଟିଜି ଓଡ଼ିଶାର ୧୨ଟି ଜିଲାରେ ବସବାସ କରିଥାନ୍ତି। ସେମାନଙ୍କର ସର୍ବାଙ୍ଗୀନ ବିକାଶ ନିମନ୍ତେ ଓଡ଼ିଶାରେ ୧୭ଟି ମାଇକ୍ରୋ ପ୍ରୋଜେକ୍ଟ ଏଜେନ୍ସି ପ୍ରତିଷ୍ଠା କରାଯାଇଥିଲା। ଏହାଦ୍ୱାରା ୫୪୧ଟି ଗ୍ରାମ୍ୟବସତିର ୯୦ ହଜାର ପିଭିଟିଜି ସରକାରଙ୍କ ବିଭିନ୍ନ ଯୋଜନା ଓ କାର୍ଯ୍ୟକ୍ରମ ଦ୍ୱାରା ଉପକୃତ ହେଉଛନ୍ତି। ଏହି କାର୍ଯ୍ୟକ୍ରମକୁ ଆଉପାଦେ ଆଗକୁ ନେଇ ରାଜ୍ୟ ସରକାର ଆହୁରି ୧ ଲକ୍ଷ ୫ ହଜାର ପିଭିଟିଜିକୁ ଚିହ୍ନଟ କରି ସ୍ବୀକୃତି ପ୍ରଦାନ କରିଛନ୍ତି। ଏମାନେ ୧୧ ଜିଲାର ୨୯ଟି ବ୍ଲକ ଅନ୍ତର୍ଗତ ୮୮୮ଟି ଅତିରିକ୍ତ ଗ୍ରାମ ବା ବସତିରେ ବସବାସ କରୁଛନ୍ତି। ସେହି ଗ୍ରାମଗୁଡ଼ିକୁ ରାଜ୍ୟ ସରକାର ଚିହ୍ନଟକରି ପିଭିଟିଜିରେ ଅନ୍ତର୍ଭୁକ୍ତ କରିଛନ୍ତି। ଏହାବ୍ୟତୀତ ବୀରହୋର୍, ଜୁଆଙ୍ଗ ଓ ପାଉଡି ଭୂୟାଁ ଭଳି ୩ଟି ପ୍ରାଚୀନ ଜନଜାତି ଗୋଷ୍ଠୀର ୫୫ ହଜାର ଜନଜାତି ୩ ଜିଲାର ୭୬ଟି ଗ୍ରାମପଞ୍ଚାୟତର ୨୫୦ ଗ୍ରାମରେ ବସବାସ କରୁଛନ୍ତି। ଏମାନଙ୍କ ପାଇଁ ଏବେ ୩ଟି ନୂତନ ମାଇକ୍ରୋ ପ୍ରୋଜେକ୍ଟ ଏଜେନ୍ସି ପ୍ରତିଷ୍ଠା କରାଯାଇଛି। ଯାଜପୁର ଜିଲା ସୁକିନ୍ଦାରେ ବୀରହୋର୍ ଓ ଜୁଆଙ୍ଗ ଉନ୍ନୟନ ଏଜେନ୍ସି, ଢେଙ୍କାନାଳରେ ଜୁଆଙ୍ଗ ଉନ୍ନୟନ ଏଜେନ୍ସି ଏବଂ କେନ୍ଦୁଝର ଜିଲା ବାଂଶପାଳ ବ୍ଲକ୍ କାର୍ଯ୍ୟାଳୟରେ ପାଉଡି ଭୂୟାଁ ଉନ୍ନୟନ ଏଜେନ୍ସି ପ୍ରତିଷ୍ଠା ହୋଇଛି। ପିଭିଟିଜି ଗ୍ରାମଭାବେ ସ୍ବୀକୃତି ମିଳିବା ପରେ ଏବଂ ନୂତନ ମାଇକ୍ରୋ ପ୍ରୋଜେକ୍ଟ ଏଜେନ୍ସି ଗଠିତ ହୋଇଥିବା ଅଞ୍ଚଳର ୧୩ଟି ପ୍ରାଚୀନ ଜନଜାତି ଗୋଷ୍ଠୀର ୧ଲକ୍ଷ ୬୦ହଜାର ଜନଜାତି କେନ୍ଦ୍ର ଓ ରାଜ୍ୟ ସରକାରଙ୍କର ବିଭିନ୍ନ ଯୋଜନା ଦ୍ୱାରା ଉପକୃତ ହେବେ। ଫଳରେ ଏସବୁ ଯୋଜନାରେ ଉପକୃତ ପ୍ରାଚୀନ ଜନଜାତି ସଂଖ୍ୟା ୨ ଲକ୍ଷ ୫ ହଜାରରେ ପହଞ୍ଚତ୍ଥିବା ସରକାରୀ ସୂଚନା ରହିଛି।