![](https://www.dharitri.com/wp-content/uploads/2019/05/1-56.jpg)
ଛୋଟ ପିଲାମାନଙ୍କୁ ଉତ୍ତମ ବ୍ୟବହାର ସମ୍ପର୍କରେ ଶିକ୍ଷା ଦେବା ପ୍ରତ୍ୟେକ ଅଭିଭାବକଙ୍କ ଦାୟିତ୍ୱ। କାରଣ ଏହା ପିଲାର ବର୍ତ୍ତମାନ ସହିତ ଭବିଷ୍ୟତକୁ ସୁନ୍ଦରକରି ଗଢ଼ି ତୋଳିବାରେ ସାହାଯ୍ୟ କରିଥାଏ। ମାତ୍ର ଅଜାଣତରେ ଅଭିଭାବକ ଏମିତି କିଛି ଭୁଲ କରିଥାନ୍ତି, ଯାହାର ପ୍ରଭାବ ସିଧାସଳଖ ପିଲାଙ୍କ ଉପରେ ପଡ଼ିଥାଏ। ଫଳରେ ପିଲାମାନଙ୍କଠାରେ ଏହାର ନକାରାତ୍ମକ ପ୍ରଭାବ ଦେଖିବାକୁ ମିଳିଥାଏ। ଅଜାଣତରେ ଅଭିଭାବକ କରୁଥିବା କେତୋଟି ଭୁଲ…
ବିନା କାରଣରେ ଗାଳି କରିବା:
ଭୁଲ ସମସ୍ତଙ୍କ ଦ୍ୱାରା ହୋଇଥାଏ। ବଡ ପିଲା ହେଉ ଅବା ଛୋଟ। କିନ୍ତୁ ଛୋଟ ପିଲା ଭୁଲ କଲେ ଅଭିଭାବକ ସେମାନଙ୍କୁ ଗାଳି କରିଥାନ୍ତି। ବେଳେବେଳେ ଆବଶ୍ୟକଠାରୁ ଅଧିକ ଗାଳି କରିଥାନ୍ତି। ଏପରି କରିବା ଦ୍ୱାରା ପିଲାମାନଙ୍କ ଉପରେ ଏହାର ଖରାପ ପ୍ରଭାବ ପଡ଼ିଥାଏ।
ଅନ୍ୟ ସମ୍ମୁଖରେ ଗାଳି କରିବା:
ପିଲାମାନଙ୍କୁ ଅନୁଶାସନ ମଧ୍ୟରେ ରଖିବା ଭଲ କଥା। ହେଲେ ଅଧିକାଂଶ ଅଭିଭାବକ ପିଲାମାନଙ୍କୁ ଗାଳି କରିବା ସମୟରେ ଭୁଲି ଯାଇଥାନ୍ତି ଯେ, ସେମାନେ କାହା ସମ୍ମୁଖରେ ପିଲାମାନଙ୍କୁ ଗାଳି କରୁଛନ୍ତି। ବାହାର ଲୋକଙ୍କ ସମ୍ମୁଖରେ ଗାଳି କରିବା ଦ୍ୱାରା ପିଲାମାନେ ନିଜକୁ ଲଜ୍ଜିତ ମନେ କରିଥାନ୍ତି।
ଉତ୍ସାହିତ ନ କରିବା:
ସବୁ ସମୟରେ ପିଲାମାନଙ୍କୁ ଉପଦେଶ ଦେବା ଖରାପ କଥା। ପିଲା ଯେତେବେଳେ ନିଜେ କୌଣସି କାମ କରୁଛି ସେତେବେଳେ ତା’ର ଭୁଲ ବାହାର କରିବା ପରିବର୍ତ୍ତେ ତାକୁ ସବୁବେଳେ ଉତ୍ସାହିତ କରିବା ଆବଶ୍ୟକ। ଏପରି କରିବା ଦ୍ୱାରା ପିଲାର ଆତ୍ମବିଶ୍ୱାସ ବୃଦ୍ଧି ପାଇଥାଏ।
ଅନ୍ୟସହ ତୁଳନା କରିବା:
ପ୍ରତ୍ୟେକ ପିଲା ପରସ୍ପରଠାରୁ ସମ୍ପୂର୍ଣ୍ଣ ଭିନ୍ନ। କିଏ ପାଠ ପଢ଼ାରେ ଭଲ ତ ଆଉ କିଏ ଡ୍ରଇଂରେ। ନିଜ ପିଲାର ଟ୍ୟାଲେଣ୍ଟକୁ ଜାଣନ୍ତୁ ଏବଂ ଅନ୍ୟ ପିଲା ସହ ତୁଳନା କରନ୍ତୁ ନାହିଁ। ଏପରି କରିବା ଦ୍ୱାରା ପିଲା ଉପରେ ଚାପ ପଡ଼ିଥାଏ।