ଛୋଟ ପିଲାଙ୍କର ବର୍ତ୍ତମାନ ପିଢ଼ି ସ୍ମାର୍ଟଫୋନ୍। ଟ୍ୟାବ୍ଲେଟ୍ ଏବଂ ଅନ୍ୟ ଇଣ୍ଟରନେଟ୍ ଯୁକ୍ତ ବୈଦ୍ୟୁତିକ ଉପକରଣ ବ୍ୟବହାର କରି ସେମାନେ ଆଗକୁ ବଢ଼ି ଚାଲିଛନ୍ତି। ଏହାକୁ ନେଇ ଅନେକ ଅଭିଭାବକ ଚିନ୍ତିତ। ନିକଟରେ ହୋଇଥିବା ଏକ ଗବେଷଣାରୁ ଜଣାପଡ଼ିଛି, ଏହି ସ୍ମାର୍ଟଫୋନ୍ ଏବଂ ଟ୍ୟାବ୍ଲେଟ୍ ପିଲାଙ୍କ ସ୍ମରଣ ଶକ୍ତି ହ୍ରାସ କରିବାରେ ଲାଗିଛି। ବୈଜ୍ଞାନିକଙ୍କ ଅନୁସାରେ, ପିଲାଙ୍କ ବିକାଶଶୀଳ ମସ୍ତିଷ୍କ ଉପରେ ଏହାର ଗୁରୁତର ପ୍ରଭାବ ପଡୁଛି। ନ୍ୟାଶନାଲ୍ ଇନ୍ଷ୍ଟିଚ୍ୟୁଟ୍ ଅଫ୍ ହେଲ୍ଥର ବୈଜ୍ଞାନିକମାନେ କିଛି କିଶୋରଙ୍କ ମସ୍ତିଷ୍କରେ ସଂଜ୍ଞାନାତ୍ମକ ବିକାଶର ଗବେଷଣା କରି ଏହି ତଥ୍ୟ ହାସଲ କରିଛନ୍ତି। ଗବେଷଣାରେ ଆମେରିକାର ୯ ଏବଂ ୧୦ ବର୍ଷ ବୟସର ପ୍ରାୟ ୧୧ହଜାର ପିଲାଙ୍କୁ ସାମିଲ କରାଯାଇଥିଲା। ସେମାନଙ୍କ ମସ୍ତିଷ୍କ ସ୍କାନ୍ରୁ ଜଣାପଡ଼ିଛି, ସ୍କ୍ରିନ୍ରେ ଅଧିକ ସମୟ ବିତାଉଥିବା ପିଲାଙ୍କ ସ୍ମୃତିଶକ୍ତି ଧୀରେଧୀର କ୍ଷୀଣ ହୋଇଥାଏ। ସେମାନେ ଠିକ୍ରେ କୌଣସି କଥା ମନେରଖିବା କିମ୍ବା କୌଣସି ଶବ୍ଦ ମଧ୍ୟରେ ଥିବା ମହତ୍ତ୍ୱପୂର୍ଣ୍ଣ ଅନ୍ତରକୁ ବୁଝିବାରେ ଅସମର୍ଥ ଥିଲେ। ବୈଜ୍ଞାନିକଙ୍କ ମତରେ, ପିଲାଦିନ ଏଭଳି ଏକ ସମୟ, ଯେତେବେଳେ ସେମାନଙ୍କ ମସ୍ତିଷ୍କ ଧୀରେଧୀରେ ବିକାଶ ଆଡ଼କୁ ଗତିକରେ; ସେତେବେଳେ ପିଲାଙ୍କ ସ୍ମରଣଶକ୍ତି ମଜଭୁତ କରିବାକୁ ବିଭିନ୍ନ ପ୍ରକାର ପ୍ରୟାସ କରାଯାଇଥାଏ। କିନ୍ତୁ ବର୍ତ୍ତମାନ ମୋବାଇଲ୍ ଏବଂ ଟ୍ୟାବ୍ଲେଟ୍ରେ ଦୀର୍ଘ ସମୟ ଅପଚୟ କରିବା ଦ୍ୱାରା ବାହାର ଦୁନିଆ ବିଷୟରେ ଜାଣିବା କିମ୍ବା କୌଣସି ଘଟଣା ମନେରଖିବା ପ୍ରକ୍ରିୟାକୁ ସେମାନଙ୍କ ମସ୍ତିଷ୍କ ସହଜରେ ଗ୍ରହଣ କରିପାରୁ ନାହଁି। ଏହା ଭବିଷ୍ୟତ ପାଇଁ ଏକ ବିପଜ୍ଜନକ ସଙ୍କେତ କହିଲେ ଅତ୍ୟୁକ୍ତି ହେବ ନାହଁି।