ସମର ଭ୍ୟାକେଶନ ପିଲାଙ୍କ ପାଇଁ ଯେତିକି ଖାସ୍ ବାପାମା’ଙ୍କ ପାଇଁ ସେତିକି ଗୁରୁତ୍ୱପୂର୍ଣ୍ଣ। ଏହି ସମୟରେ ପିଲାଙ୍କୁ ବିଜି ରଖିବା ପାଇଁ ଯେକୌଣସି କ୍ଲାସ୍ରେ ଭର୍ତ୍ତି କରିଦେବାଟା ଠିକ୍ ନୁହେଁ। ପ୍ରଥମେ ତା’ର ପସନ୍ଦ ନାପସନ୍ଦକୁ ବୁଝନ୍ତୁ ଓ ସେମାନଙ୍କ ବ୍ୟକ୍ତିତ୍ୱ ବିକାଶ ହେବାଭଳି କ୍ଲାସ୍କୁ ପଠାନ୍ତୁ। ଜାଣନ୍ତୁ ସେନେଇ କିଛି ଟିପ୍ସ…।
ପବ୍ଲିକ୍ ସ୍ପିକିଂ
ପବ୍ଲିକ୍ ସ୍ପିକିଂ କେବଳ ପିଲାଙ୍କ ପାଇଁ ନୁହେଁ ବରଂ ପ୍ରତ୍ୟେକଙ୍କ ପାଇଁ ଜରୁରୀ। ଏହାଦ୍ୱାରା ସେ ନିଜ କଥାକୁ ଅନ୍ୟ ଜଣଙ୍କ ଆଗରେ ଠିକ୍ ଭାବେ ପରିପ୍ରକାଶ କରିପାରିବ। ଆତ୍ମବିଶ୍ୱାସ ବଢ଼ିବା ସହ କୌଣସି ପ୍ରକାର ପ୍ରେଜେଣ୍ଟେଶନ ବେଳେ ସେ ଭୟଭୀତ ହେବନାହିଁ।
ଡ୍ୟାନ୍ସ, ଡ୍ରାମା, ଆକ୍ଟିଂ
ଏହା ହେଉଛି ଏପରି କ୍ଷେତ୍ର, ଯେଉଁଠି ପିଲାଙ୍କୁ ଷ୍ଟେଜ୍ରେ ନିଜ କଳା ପ୍ରଦର୍ଶନ କରିବାର ସୁଯୋଗ ମିଳିଥାଏ। ଏହାଦ୍ୱାରା ପିଲାଙ୍କ ଆତ୍ମବିଶ୍ୱାସ ବଢ଼ିବା ସହ ବ୍ୟକ୍ତିତ୍ୱରେ ଉତ୍ତମ ପରିବର୍ତ୍ତନ ଆସିଥାଏ।
ସ୍ପୋର୍ଟସ
ପିଲାର ଯେଉଁ ସ୍ପୋର୍ଟସ ପ୍ରତି ରୁଚି ଅଛି ତାକୁ ସେହି ଦିଗରେ ଉତ୍ସାହିତ କରନ୍ତୁ। ଆଜିକାଲି ଅଧିକାଂଶ ପିଲାଙ୍କ ଶରୀରରେ ଭିଟାମିନ୍ ଡି୩ ଏବଂ ଭିଟାମିନ୍ ବି୧୨ କମ୍ ରହୁଛି। କାରଣ ସାରାଦିନ ଘରେ ରହି ଗ୍ୟାଜେଟ୍ସରେ ବ୍ୟସ୍ତ ରହୁଥିବାରୁ ସେମାନଙ୍କ ଶରୀରର ଏକ୍ସରସାଇଜ୍ ହୋଇପାରୁନି। ତେଣୁ ସମର୍ ଭ୍ୟାକେଶନରେ ପିଲାକୁ ଏପରି କ୍ଲାସ୍କୁ ପଠାନ୍ତୁ, ଯେଉଁ ଆଉଟ୍ଡୋରରେ ସ୍ପୋର୍ଟସ ଶିଖାଯାଉଥିବ।
ପ୍ରାକ୍ଟିକାଲ ସାଇନ୍ସ
ବହି ପଢ଼ି ପିଲା ଯେତିକି ଶିଖି ନ ପାରିବେ ତା’ଠାରୁ ଅଧିକ ପ୍ରାକ୍ଟିକାଲ କ୍ଲାସ ଯାଇ ଏକ୍ସପେରିମେଣ୍ଟ କରି ଶିଖିପାରିବେ।
କୁକିଂ
ପୁଅ ହେଉ ଅବା ଝିଅ, ରୋଷେଇର ବେସିକ୍ ଜ୍ଞାନ ରହିବା ଆବଶ୍ୟକ। ପିଲାମାନେ ବି ଜାଣିବା ଦରକାର ଯେ ରୋଷେଇ କରିବାରେ କିପରି ପରିଶ୍ରମର ଆବଶ୍ୟକତା ରହିଛି। ଏହା ଦ୍ୱାରା ସେମାନେ ଆଉ ଖାଦ୍ୟ ନଷ୍ଟ କରିବେ ନାହିଁ।