ଭୁବନେଶ୍ୱର, ୭।୧୨(ବ୍ୟୁରୋ): ପ୍ରଦେଶ କଂଗ୍ରେସ କମିଟି(ପିସିସି) ସଭାପତି ନିରଞ୍ଜନ ପଟ୍ଟନାୟକଙ୍କୁ ଦାୟିତ୍ୱଶୂନ୍ୟ କରିବା ଲାଗି ଦଳ ଭିତରେ କନ୍ଦଳ ଉଗ୍ରରୂପ ନେଲାଣି। ନିରଞ୍ଜନଙ୍କ ବିରୋଧରେ ଗୋଟିଏ ଗୋଷ୍ଠୀ ପୂରା ଦମ୍ରେ ଲାଗିପଡିଛନ୍ତି। କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧୀଙ୍କୁ ଦଳଦଳ ହୋଇ ନେତାମାନେ ଭେଟିବାକୁ ଯିବା ଆରମ୍ଭ କଲେଣି। ଗୋଟିଏ ଗୋଷ୍ଠୀ ସୋନିଆଙ୍କୁ ଭେଟି ଫେରିବା କ୍ଷଣି ଆଉ ଗୋଟିଏ ଗୋଷ୍ଠୀ ଦିଲ୍ଲୀ ଗସ୍ତ କରି ସଭାପତି ପରିବର୍ତ୍ତନ କଥା କହିବାକୁ ଯାଇଛନ୍ତି। ଏହି କ୍ରମରେ ଛାତ୍ର କଂଗ୍ରେସ ମଧ୍ୟ ବିଭିନ୍ନ ଗୋଷ୍ଠୀରେ ବିଭକ୍ତ ହୋଇ ସଭାପତି ପରିବର୍ତ୍ତନ ପ୍ରକ୍ରିୟାରେ ଅଂଶଗ୍ରହଣ କରିଛି। ଏଭଳି ସ୍ଥିତିରେ ଦଳ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ନେବାରେ ମଧ୍ୟ ଫେଲ ମାରିଲାଣି। ସେପଟେ ବିଧାୟକ ଗୋଷ୍ଠୀରେ ମଧ୍ୟ ପିସିସି ସଭାପତି ପରିବର୍ତ୍ତନ କଥାକୁ ନେଇ ଭିନ୍ନମତ ପ୍ରକାଶ ପାଇବା ଆରମ୍ଭ ହୋଇଥିବା ବିଶେଷ ସୂତ୍ରରୁ ଜଣାପଡିଛି।
ଛାତ୍ର କଂଗ୍ରେସର ଗୋଟିଏ ଗୋଷ୍ଠୀ ଶୁକ୍ରବାର ୟୁନିଟ୍ ୯ସ୍ଥିତ ରେଡକ୍ରସ ଭବନଠାରେ ଏକ ବନ୍ଧୁମିଳନ କାର୍ଯ୍ୟକ୍ରମ କରିବା ସହ ଖବରଦାତା ସମ୍ମିଳନୀ ଜରିଆରେ ନିରଞ୍ଜନଙ୍କ ନେତୃତ୍ୱ ଉପରେ ଦୋଷ ଲଦିଛନ୍ତି। ଉପସ୍ଥିତ ଛାତ୍ର କଂଗ୍ରେସ ରାଜ୍ୟ ସଂଯୋଜକ ବିପ୍ଲବ କେଶରୀ ପରିଡା, ମୁଖପାତ୍ର ଅଖିଲେଶ ଯାଦବ, ସଂଯୋଜକ ମହମ୍ମଦ ଉମରଅଲିମ ପ୍ରମୁଖ କହିଛନ୍ତି, ଛାତ୍ରୀଛାତ୍ରମାନଙ୍କୁ ଏକାଠି କରି ରାଜ୍ୟର ବିଭିନ୍ନ ସମୟରେ ଆନ୍ଦୋଳନ କରିବାକୁ ଚାହିଁଲେ ମଧ୍ୟ ପିସିସି ସଭାପତିଙ୍କ ସହଯୋଗ ମିଳୁନାହିଁ। ଛାତ୍ର କଂଗ୍ରେସ ଆଗକୁ ଆଗେଇ ପାରୁନାହିଁ। ୧୯୯୦ରେ ଛାତ୍ର କଂଗ୍ରେସର ଦୃଢ କାର୍ଯ୍ୟକ୍ରମ ପାଇଁ ୧୯୯୫ରେ ଓଡ଼ିଶାରେ ଦଳ ସରକାରକୁ ଆସିଥିଲା। ବର୍ତ୍ତମାନ ସ୍ଥିତିରେ କଟକ-ବାରବାଟୀ ବିଧାୟକ ମହମ୍ମଦ ମୋକିମଙ୍କୁ ଯଦି ପିସିସି ସଭାପତି କରାଯାଏ ତେବେ ଦଳ ଭଲ ପ୍ରଦର୍ଶନ କରିବ ବୋଲି ସେମାନେ ଯୁକ୍ତି ରଖିଛନ୍ତି। ମୋକିମଙ୍କ ଭଳି ଜଣେ ଯୁବ ନେତାଙ୍କୁ ଦାୟିତ୍ୱ ଦେଲେ ଦଳରେ ଛାତ୍ର, ଯୁବ ଓ ମହିଳାମାନେ ସକ୍ରିୟତାର ସହ କାର୍ଯ୍ୟ କରିବେ ବୋଲି ସେମାନେ କହିଛନ୍ତି।
ଅପରପକ୍ଷରେ କଂଗ୍ରେସ ରାଜ୍ୟ କାର୍ଯ୍ୟାଳୟଠାରେ ଶୁକ୍ରବାର ଆୟୋଜିତ ଖବରଦାତା ସମ୍ମିଳନୀରେ ରାଜ୍ୟ ଛାତ୍ର କଂଗ୍ରେସ ସଂଯୋଜକ ଆଦିତ୍ୟ ପ୍ରୀତମ ଦାସ, ସୌମ୍ୟ ପ୍ରକାଶ ମିଶ୍ର, ନିରଞ୍ଜନ ନାୟକ ପ୍ରମୁଖ କହିଛନ୍ତି, ଯେଉଁମାନେ ନିରଞ୍ଜନଙ୍କୁ ସଭାପତି ପଦରୁ ହଟାଇ ମୋକିମଙ୍କ ସପକ୍ଷରେ ଯୁକ୍ତି ରଖୁଛନ୍ତି ସେମାନେ ଦଳରେ ଅନାମଧେୟ। ନିକଟରେ ନିତ୍ୟ ବ୍ୟବହାର୍ଯ୍ୟ ସାମଗ୍ରୀର ଅହେତୁକ ଦର ବୃଦ୍ଧି, ଉକତ୍ଟ ବେକାରି ସମସ୍ୟା ଏବଂ ନାରୀ ନିର୍ଯାତନା ପ୍ରସଙ୍ଗରେ ଦଳ ଆନ୍ଦୋଳନ ଜାରି ରଖିଛି। ଏପରି ସ୍ଥିତିରେ ରେଡକ୍ରସ ଭବନରେ ଯେଉଁ ଛାତ୍ର ନେତା ପିସିସି ସଭାପତିଙ୍କ ବିରୋଧରେ ମତ ରଖୁଛନ୍ତି ସେମାନେ ଆନ୍ଦୋଳନ ସମୟରେ କୋଉଠି ଥିଲେ। ଏହି ଛାତ୍ର କଂଗ୍ରେସ ବୋଲାଉଥିବା ନେତାମାନେ ଦଳର ନୀତି, ଆଦର୍ଶକୁ ବିରୋଧ କରିବା ସହିତ ସମାନ। ସେମାନଙ୍କ ବିରୋଧରେ ଦୃଢ଼ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ନେବାକୁ ରାଷ୍ଟ୍ରୀୟ ଛାତ୍ର କଂଗ୍ରେସ(ଏନ୍ଏସ୍ୟୁଆଇ) ଅଧ୍ୟକ୍ଷ ନୀରଜ କୁନ୍ଦନଙ୍କୁ ଦୃଢ଼ ଦାବି କରିବୁ ବୋଲି ସେମାନେ କହିଛନ୍ତି।
ଅପରପକ୍ଷରେ ଦିଲ୍ଲୀ ଗସ୍ତ କରିଥିବା ମହିଳା କଂଗ୍ରେସର ନେତ୍ରୀମାନେ ସୋନିଆଙ୍କୁ ଭେଟିବା ଲାଗି ସମୟ ନେଇଥିଲେ ସୁଦ୍ଧା ସଫଳ ହୋଇପାରିନାହାନ୍ତି। ଦିଲ୍ଲୀରେ ଥିବା ଜଣେ ବରିଷ୍ଠ ନେତ୍ରୀ କହିଛନ୍ତି, ଶନିବାର ସୁଦ୍ଧା ସୋନିଆଙ୍କୁ ନିଶ୍ଚୟ ଦେଖାହେବା ଲାଗି ସମୟ ମିଳିଯିବ। ଶୁକ୍ରବାର କେନ୍ଦ୍ରର ବରିଷ୍ଠ ନେତା ଗୁଲାମ ନବୀ ଆଜାଦ, କେ.ସି. ଭେନୁଗୋପାଲ, ବି.କେ. ହରିପ୍ରସାଦଙ୍କ ସହ ସାକ୍ଷାତ କରିଛନ୍ତି। ଏହାସହିତ ସେମାନେ ଦିଲ୍ଲୀ ଯିବାପରେ ଅହମ୍ମଦ ପଟେଲ, ମୁକୁଲ ଓ୍ବାସନିକ, ଅହମ୍ମଦ ପଟେଲଙ୍କୁ ମଧ୍ୟ ସାକ୍ଷାତ କରିଛନ୍ତି। ଏହି ଟିମ୍ ମଧ୍ୟ ନିରଞ୍ଜନଙ୍କୁ ସଭାପତି ପଦରୁ ହଟାଇବା ପାଇଁ ବାରମ୍ବାର ଦାବି କରିଚାଲିଛି। ଏଭଳି ସ୍ଥିତିରେ ପିସିସି ସଭାପତି ପଟ୍ଟନାୟକ କୌଣସି ପ୍ରତିକ୍ରିୟା ଦେବା ପାଇଁ ମନା କରିଦେଇଛନ୍ତି।