ଖୁଣ୍ଟା,୪ା୨(ଡ଼ି.ଏନ୍.ଏ.)-ପୁଅର ଦରମା ଟଙ୍କା ମଞ୍ଜୁର ପାଇଁ ମା’ବାପାଙ୍କୁ ଆମରଣ ଅନଶନରେ ବସିବାକୁ ପଡ଼ିଛି । ଏପରି ଘଟଣା ଘଟିଛି ମୟୂରଭଞ୍ଜ ଜିଲା ଖୁଣ୍ଟା ବ୍ଲକ ଅଧୀନ ଡୁକୁରା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ। ଉକ୍ତ ସ୍ବାସ୍ଥ୍ୟ କେନ୍ଦ୍ରରେ ସହକାରୀ ଡାକ୍ତର ରୂପେ କାର୍ଯ୍ୟରତ ସଂକଳ୍ପ କୁମାର ପରିଡାଙ୍କ ଦରମା ଟଙ୍କା ଜାଣିଶୁଣି ଆକ୍ରୋଶ ମୂଳକ ଭାବେ ଅଟକାଇ ରଖାଯାଇଛି ବୋଲି ସଂକଳ୍ପଙ୍କ ମା’ ଜ୍ୟୋସ୍ନାମୟୀ ବେହେରା ଖୁଣ୍ଟା ଥାନାରେ ଲିଖିତ ଅଭିଯୋଗ କରିବା ସହିତ ସୋମବାର ଅପରାହ୍ନ ୧ଟା ୩୦ମିଠାରୁ ସ୍ବାସ୍ଥ୍ୟକେନ୍ଦ୍ର ପରିସରରେ ଆମରଣ ଅନଶନରେ ବସିଥିଲେ। ଏଥିରେ ସଂକଳ୍ପଙ୍କ ବାପା ଡା. ବିନୋଦ ଚନ୍ଦ୍ର ପରିଡ଼ା ମଧ୍ୟ ସାମିଲ ହୋଇଥିଲେ। ଅନ୍ୟପକ୍ଷେ ଉକ୍ତ ଘଟଣାକୁ ମେଡିକାଲ ଅଫିସର ଦାସମାତ ମାର୍ଣ୍ଡି ଖଣ୍ଡନ କରିବା ସହିତ ଡା. ସଂକଳ୍ପଙ୍କ ବିରୋଧରେ ଖୁଣ୍ଟା ଥାନାରେ ପାଲଟା ଅଭିଯୋଗ କରିଛନ୍ତି। ଗତ ୧ ତାରିଖ ଦିନ ଡାକ୍ତର ସଂକଳ୍ପ ସ୍ବାସ୍ଥ୍ୟ କେନ୍ଦ୍ରରେ ଫାଇଲପତ୍ର ଫିଙ୍ଗା ଫିଙ୍ଗି କରିବା ସହିତ ଜାତିଆଣ ନେଇ ବିଭିନ୍ନ ପ୍ରକାର ଗାଳିଗୁଲଜ କରିଥିଲେ ବୋଲି ଉକ୍ତ ଅଭିଯୋଗରେ ଦର୍ଶାଇଛନ୍ତି। ତେବେ ଆସନ୍ତାକାଲି ସୁଦ୍ଧା ଦରମା ପ୍ରଦାନ କରାଯିବ ବୋଲି ପ୍ରତିଶ୍ରୁତି ମିଳିବା ପରେ ଅନଶନ ପ୍ରତ୍ୟାହୃତ ହୋଇଥିବା ଜଣାପଡ଼ିଛି।