ସୋରଡ଼ା,୧୧ା୬(ଡି.ଏନ୍.ଏ.): ଗଞ୍ଜାମ ଜିଲା ସୋରଡ଼ା ବ୍ଲକ ହୁକୁମା ପଞ୍ଚାୟତ ନୂଆଗାଁ ଗ୍ରାମର ଅଜୟ ମଲିକଙ୍କ ପୁଅ ରଞ୍ଜନ (୨୭) ତାମିଲନାଡୁର କୋଏମ୍ବାଟୁରର ପେରିୟାନାଇକେନପାଲୟମ ଥାନା ଅଞ୍ଚଳର ଏକ ଘରୋଇ କମ୍ପାନୀରେ ଶ୍ରମିକ ଭାବେ କାର୍ଯ୍ୟ କରୁଥିଲେ। ଗୁରୁବାର ସେଠାରେ ନିଜ ବାସସ୍ଥଳୀରେ ବିଶ୍ରାମ ନେଉଥିବା ବେଳେ ରାତିରେ କୌଣସି ବିଷାକ୍ତ ଜନ୍ତୁ କାମୁଡ଼ି ଦେବାରୁ ଅସୁସ୍ଥ ଅନୁଭବ କରିଥିଲେ। ସେଠାରେ ଥିବା ତାଙ୍କ ବନ୍ଧୁମାନେ ରଞ୍ଜନଙ୍କୁ ନିକଟସ୍ଥ ମେଡିକାଲ ନେଇଥିଲେ। ଶୁକ୍ରବାର ମଧ୍ୟରାତ୍ରରେ ରଞ୍ଜନଙ୍କ ମୃତ୍ୟୁ ଘଟିଥିବା ସମ୍ପର୍କୀୟଙ୍କ ପାଖକୁ ଖବର ଆସିଥିଲା । ଶନିବାର ସକାଳୁ ସମାଜସେବୀ ଜାନକୀ ବଲ୍ଲଭ ପଟ୍ଟନାୟକଙ୍କୁ ସମ୍ପର୍କୀୟମାନେ ଯୋଗାଯୋଗ କରି ମୃତଦେହ ନିଜ ଗ୍ରାମକୁ ଆଣିବା ପାଇଁ ସହଯୋଗ ମାଗିଥିଲେ। ଉପଖଣ୍ଡ ଶ୍ରମ ବିଭାଗ ଓ ଜିଲା ପ୍ରଶାସନକୁ ଏ ସମ୍ପର୍କରେ ଅବଗତ କରାଇବା ସହ ମୃତଦେହ ଆଣିବା ଲାଗି ଅନୁରୋଧ କରିଥିଲେ। ଖୋଦ ଜିଲାପାଳ ଏଥିରେ ତତ୍ପରତା ପ୍ରକାଶ କରିଥିବା ଜଣାପଡ଼ିଛି। ସେଠାରେ ମୃତଦେହ ବ୍ୟବଚ୍ଛେଦ କରାଯାଇଛି। ଏ ସମ୍ପର୍କରେ ଗଞ୍ଜାମ ଜିଲାପାଳ ବିଜୟ ଅମୃତ କୁଲାଙ୍ଗେଙ୍କ ସହ ଯୋଗାଯୋଗ କରିବାରୁ ସେ କହିଛନ୍ତି, ପେରିୟାନାଇକେନପାଲୟମ ଥାନା ଓ ସେଠାକାର ପ୍ରଶାସନ ସହ କଥାବାର୍ତ୍ତା ଚାଲିଛି । ଅନ୍ୟପଟେ ଗ୍ରାମରେ ଶୋକାକୁଳ ପରିବେଶ ସୃଷ୍ଟି ହୋଇଛି। ଆଇନଜୀବୀ ପ୍ରଦୀପ ଶେଖର ପାଳ ପରିବାର ସମ୍ପର୍କୀୟମାନଙ୍କୁ ଧୈର୍ଯ୍ୟ ଧରିବାକୁ ଆଶ୍ୱାସନା ଦେଇଛନ୍ତି।
