ବିଜେପୁର,୨୩ା୪(ଡି.ଏନ୍.ଏ.) : କୋଭିଡ-୧୯ମୁକାବିଲା ପାଇଁ ସାରା ଦେଶରେ ଲକ୍ଡାଉନ୍ ଅବ୍ୟାହତ ରହିଛି। ଏଭଳି ସମୟରେ ପୁଅ ପାଇଁ ବରଗଡ଼ ଜିଲା ବିଜେପୁର ବ୍ଲକ ଅନ୍ତର୍ଗତ ଖରମୁଣ୍ଡା ଗ୍ରାମରେ ମା’ଙ୍କ ସମେତ ୫ଜଣ ସଦସ୍ୟ ହୋମ୍ କ୍ବାରାଣ୍ଟାଇନରେ ରହିବାକୁ ପଡ଼ିବା ଅଞ୍ଚଳରେ ଚର୍ଚ୍ଚାର ବିଷୟ ହୋଇଛି।
ସୂଚନାନୁଯାୟୀ, ଏହି ପଞ୍ଚାୟତ ସଦରମହକୁମାର ଈଶ୍ବର ମେହେର ହାରଭେଷ୍ଟର ଡ୍ରାଇଭର ଭାବେ କାମ କରନ୍ତି। ଭଦ୍ରକ ଜିଲାର ଜଣେ ମାଲିକଙ୍କ ନିକଟରେ ହାର୍ଭେଷ୍ଟରର ଡ୍ରାଇଭର କାମ କରିବାକୁ ପୂର୍ବରୁ ଚୁକ୍ତି ହୋଇଥିଲା। ହେଲେ ଲକ୍ଡାଉନ୍ କଟକଣା ଯୋଗୁ ସେ ନିର୍ଦ୍ଦିଷ୍ଟ ସମୟରେ ଉକ୍ତ ମାଲିକଙ୍କ ପାଖରେ ପହଞ୍ଚି ପାରି ନ ଥିଲେ। ଫଳରେ ମାଲିକ ସିଧାସଳଖ ଏକ କାର୍ ନେଇ ମଙ୍ଗଳବାର ରାତିରେ ଖରମୁଣ୍ଡାରେ ପହଞ୍ଚିଥିଲେ। ସଂପୃକ୍ତ ମାଲିକଙ୍କ ସହ ଆଉ ଜଣେ ତାଙ୍କର ଘରକୁ ଆସି କିଛି ସମୟ କଥାବାର୍ତ୍ତା ହେବା ପରେ ତାଙ୍କୁ ନେଇ ସେମାନେ ଭଦ୍ରକ ଫେରି ଯାଇଥିଲେ। ଏହି ଖବର ଗାଁରେ ବୁଧବାର ପ୍ରଚାରିତ ହେବା ପରେ ସ୍ଥାନୀୟ ସରପଞ୍ଚ ସୁବାସିନୀ ଡନସନା ତାଙ୍କର ଘରକୁ କଣ୍ଟା ପକାଇ ଘେରି ଦେଇଥିଲେ। ତେଣୁ ଉକ୍ତ ପରିବାରର ଈଶ୍ବର ମେହେରଙ୍କ ମା’, ସ୍ତ୍ରୀଙ୍କ ସହିତ ତିନିଜଣ ପିଲା ବନ୍ଦୀ ହୋଇ ରହିଯାଇଥିଲେ। ଦିନତମାମ ଏହି ପରିବାର ବନ୍ଦୀ ହୋଇଥିବାର ଭିଡିଓ ଭାଇରାଲ ହେବା ପରେ ସନ୍ଧ୍ୟାରେ ବିଜେପୁର ବିଡିଓ ପଦ୍ମନାଭ ସାମନ୍ତରାୟ ଉକ୍ତ ଗ୍ରାମରେ ପହଞ୍ଚି ସଂପୃକ୍ତ ପରିବାରକୁ ଉଦ୍ଧାର କରିଥିଲେ। ଗୁରୁବାରରୁ ୧୪ଦିନ ପାଇଁ ସେମାନଙ୍କୁ ହୋମ୍ କ୍ବାରାଣ୍ଟାଇନରେ ରହିବାକୁ ବିଡିଓ ପରାମର୍ଶ ଦେଇଥିଲେ। ତେଣୁ ତାଙ୍କର ଖାଦ୍ୟପେୟ ପାଇଁ ପ୍ରଶାସନ ପକ୍ଷରୁ ରାଶନ ସାମଗ୍ରୀ ଯୋଗାଇ ଦିଆଯାଇଛି। ସେହିପରି ପାନୀୟ ଓ ସ୍ନାନ ଶୌଚ ପାଇଁ ଟ୍ୟାଙ୍କରଟିଏ ଯୋଗାଇ ଦିଆଯାଇଥିବା ଜଣାପଡ଼ିଛି।